Galatɩ 4 - ZE'ELEGO PAALEGA

¹ Mam n yeti se'ere n ŋwana, asooe sɔna duma la han nan dɛna kɔma, ba ka nyanɛ yamehi, la bamam pun sɔna lɔgerɔ la za'a la.

² Ba kelum bɔna la bihereba la pa'aleba nu'uhen, gura daan se'ere ti Sɔ la looe la ta paaɛ.

³ La ani la bala mɛa bo' tumam. Tumam en daa nan de kɔma la, tu daa dela da'aba bo' sɛɛhi se'ehi en sɔi timpaberɛ wa zuo wa.

⁴ Gee Yinɛ saŋa la en daa ta pirɛ paaɛ la, Yinɛ tum la a Dayua, ti pɔka dɔgɛ ka, dɔgɛ ka doohe ze'elego la,

⁵ ti a ta'am yɔ to'e sɛba en boi ze'elego la puan bahɛ, ti Yinɛ ta'am to'e tu ti tu dɛna a kɔma.

⁶ Tumam en de a kɔma la zuo, ti Yinɛ tum a Dayua Sia la tu suya puan na, ti tu tana kaahɛ yeti, “Aba! N Sɔ!”

⁷ Bala, fum le dagena da'aberɛ, gee Yinɛ mɛŋa bia. Ti fum han dɛna la a bia, fum dela la asooe sɔna daana Yinɛ puan.

Pɔɔl fabele Galatiyaduma yele

⁸ Wunse'eren ha la, yan daa nan ka mi' Yinɛ la, ya yuum dela da'aba bo' nɛreba en dagi yina.

⁹ Gee Nananawa, ti ya nyaa wa'am na baŋɛ Yinɛ la, bii n yeti, Yinɛ n baŋɛ ya la, ŋwani ti yamam wan le ŋmɛregɛ dɔla tɔregɔ la, nɔŋɔ sɛɛhi se'ehi en sɔi timpaberɛ wa zuo wa? Ŋwani ti ya le bɔta ti ya dɛna da'aba bo' ba le yɛ'ɛha?

¹⁰ Ya na'aheri la dabeha asɛ'a, ŋmarehi sise'ehi, sahi sise'ehi, la yuuma a sɛ'a.

¹¹ Dabeem en tari mam, ti mam tum sɛla bo' ya la wan bahɛ yoo.

¹² N suurɔ, n beleni ya mɛ, ani ya wuu mam la, se'ere en sɔi la, mam ani mɛ wuu yamam la. Ya ka iŋɛ se'ere se'ere tuue mam.

¹³ Ya mi' ti n daa ka paaɛ n mɛŋa mam daa muulɛ faarɛ yelehum la bo' ya yia la.

¹⁴ La mam bã'a la en daa makɛ ya bihɛ la, ya daa ka keheri mam, bii ya zagehɛ mam. Gee ya daa to'e mam mɛ wuu Yinɛ suŋera la, to'e mam wuu Yezu Kiresta la.

¹⁵ Beni en iŋɛ ya putɛ'sunɛ la ti ya daa tara la? Se'ere en sɔi la, mam yeti mɛ la ninmu'urɛ ti la han wan ta'am ni iŋɛ ni, ya wan kpigɛ ni ya nini bo' ni mam.

¹⁶ Mam nyaa lebege la ya dima la mam yele ya yelemɛŋerɛ wa?

¹⁷ Ba yeen ita mɛ gee ba tari la puti'irɛ se'ere ha. Ba boti ba yelege ya mɛ, ti ya bɔna la ba.

¹⁸ La ani suŋa ti ya nɔŋɛ mam la putɛ'sunɛ saŋa woo, gee dagi sansɛka ti n bɔna la ya ma'a.

¹⁹ N kɔmbibehi wa, yamam sɛba zuo ti n le bɔna wuŋerɛ puan wuu n viregere mɛ la, gura ti Kiresta naanɛ ta to'e ya wa.

²⁰ Mam boti ni ti n boni mɛ la ya nananawa, gee tee ni n kua, se'ere en sɔi la, mam maam mɛ la ya.

Hega la Saara makerɛ

²¹ Yele ya mam, yamam sɛba en boti ya dɛna ze'elego la da'aba wa, dagi ze'elego la ti ya wan kɛleha?

²² Se'ere en sɔi la, la gulehɛ biŋe yeti, Aberaham yuum tari la dayɔɔhi siyi, ti kayima yuum dɛna a pɔge da'aberɛ la bia, ti kayima la me dɛna a mɛŋa pɔga, en dagi da'aberɛ la bia.

²³ Kayima la, se'em en de da'aberɛ la bia la, ba dɔgɛ kaŋa doohe la inganɛ puan, gee kayima la me a mɛŋa pɔga la n dagi da'aberɛ la bia la, ba dɔgɛ kaŋa doohe la nɔbiŋere puan.

²⁴ Yele ana wa dela makerɛ. Pɔgesina wa ze'ele bo' la nɔpu'ulegɔ buyi'. Pɔka kayima, yelemɛŋerɛ, dela Hega, ze'ele Senai Zoore la zuo, dɔgera kɔma en de da'aba.

²⁵ Hega dela Senai Zoore en boi Arebiya timpaberɛ. La ze'ele bo' la zina Yerusalɛm wa, Se'ere en sɔi la, pɔka wa boi la da'aberɛ puan la ka kɔma.

²⁶ Gee pɔka kayima la me ze'ele bo' la Yerusalɛm sɛka en boi saazuo ha la. A dagi da'aberɛ gee me dɛna tu ma.

²⁷ Se'ere en sɔi la, la gulehɛ yeti, “Nyɛɛna, kundɔgerɛ wa, fum se'em en ka dɔgɛ kɔma wa, kɛ̃ baaŋa puan la fum voole, fum se'em en ka tabelɛ nyɛ dɔgum too wa. Se'ere en sɔi la, pɔgesɛka en de ze'kpaahenɛ la kɔma zo'e mɛ gana pɔgesɛka en ele la kɔma.”

²⁸ Nananawa, yamam n suurɔ wa, ya dela nɔbiŋere la kɔma, wuu Aziki la.

²⁹ Gee wuu bisɛka ti ba dɔgɛ doohe inganɛ puan la, en yuum mɛlehɛ bisɛka ti ba dɔgɛ doohe Sia puan la se'em la, la dela bala mɛa nananawa.

³⁰ Gee Yinɛ gɔŋɔ la puan yeti bu? La yeti, “Dige ya da'aberɛ la, la ka bia la ti ba yehe. Se'ere en sɔi la, da'aberɛ la bia la kan lagum tɔrɛ lɔgerɔ la, la pɔgesɛka en de a mɛŋa pɔga la en dagi da'aberɛ la bia.”

³¹ Bala, n suurɔ, tumam dela kɔma, dagena pɔgesɛka n de da'aberɛ la kɔma, gee tu dela pɔgesɛka en dagi da'aberɛ la kɔma.