Galatɩ 3 - ZE'ELEGO PAALEGA

Nɔze'elego bii Sakerɛ

¹ Yamam Galatia gɔɔnɔ wa! Ani n yuum ya? Bihɛ ya, dagi ya ninin, la nɛrekuuŋɔ la nini ti ba daa kpa' Yezu Kiresta la?

² Yele yinɛ se'ere ma'a ti mam bɔta ti n baŋɛ ya zi'an dela, Yamam to'e Fa'a Sia la doohe la yan tuni ze'elego la yɛla se'em bii, yan nam sɛla ti ya wum la?

³ Yamam ba' gaam la bala? Yamam en pɔhɛ la Fa'a Sia la, ya nyaa ba'aheri mɛ la inganɛ?

⁴ Yamam en nyɛ yɛla wa zo'e se'em wa dela yoo? Wuu la han sirum dɛna la yoo.

⁵ La yi han dɛna bala, Yinɛ bo' ya Fa'a Sia la, gee tum kirehi ya puan la doohe la ze'elego la tuuma bii yan nam sɛla ti ya wum la zuo?

⁶ Wuu Aberaham yuum nam, “Yinɛ, ti Yinɛ bo' en tuntɔɔnɛ,”

⁷ bala ya nyɛ ya, sɛba en nam la en de Aberaham yaahi.

⁸ Yinɛ gɔŋɔ la en pun bihɛ nyɛ ti, Yinɛ wan dikɛ sɛba en ka pa'ahɛ Yuuduma puan la naaɛ la a mɛŋa ba sakerɛ zuo la, a te'ele muulɛ faarɛ yelehum wa bo' Aberaham mɛ yeti, “Sɛba en ka pa'ahɛ Yuuduma puan la woo wan nyɛ sum la fum puan.”

⁹ Dina wa zuo, sɛba en nam la nyɛti sum mɛ la Aberaham se'em en daa nam la.

¹⁰ Gee sɛba woo en dikɛ ba mɛhi delum ze'elego tuuma la, nɔpɔtɛ en dole ba. Se'ere en sɔi la, la gulehɛ biŋe yeti, “Nɔpɔtɛ en dole se'em woo en ka dole gee ka nana sɛla woo n gulehɛ biŋe ze'elego gɔŋɔ la puan la.”

¹¹ Nananawa, la kɔ'ɔm niiɛ mɛ gã'a ti nɛra ka boi ka tara tuure Yinɛ nɛŋan ze'elego la dɔlega puan. Se'ere en sɔi la, “Se'em en de tuntɔɔdaana, wan vɔna la sakerɛ puan.”

¹² Gee ze'elego la ka yagɛ sakerɛ zuo. Gee lan tugum dɛna se'em la dela, “Fum se'em woo en dole ze'elego la tuuma la wan vɔna mɛ la yele aŋa.”

¹³ Kiresta yɔ to'e tɔ mɛ ze'elego pɔtɛ la puan bahɛ, doohe eŋa ti nɔpɔtɛ dɔla en tumam zuo la. Se'ere en sɔi la, la gulehɛ biŋe yeti, “Nɔpɔtɛ en dole se'em woo en yule tia zuo.”

¹⁴ La iŋɛ ŋwana ti Yezu Kiresta puan, Aberaham sum la wan paaɛ sɛba en dagi Yuuduma la, ti tumam me to'e Fa'a Sia nɔbiŋere la sakerɛ puan.

Yinɛ biŋe nuurɛ la Aberaham

¹⁵ N suurɔ wa, n bo'ori ya la vom puan makerɛ. Nɛra han diŋɛ biŋe a nuurɛ, se'em ka pa'aheri se'ere bii zageha dɛ.

¹⁶ Nananawa, Yinɛ yuum biŋe nɔya la bo' la Aberaham la a yaaŋa. La ka yeti, “La a Yaahi” wuu ba zo'e mɛ. Gee la yeti, “La fum yaaŋa,” de vuurɛ dela, nɛra ayima, se'em en de Kiresta la.

¹⁷ Mam n boti n yele se'ere la dela, ze'elego la n wa'am yuum kɔbehi sinaahi la yuum pihitã pooren na la, kan ta'am saalum Yinɛ nɔpu'ulegɔ la ti a pun pu'ulɛ la, ti ze'elego nyaa ta'am saalum nɔbiŋere la.

¹⁸ Se'ere en sɔi la, Yinɛ bo'olum la han ze'eti ni la ze'elego la puan na, la yi' ka le ze'ele nɔbiŋere la puan. Gee Yinɛ dikɛ bu bo' la Aberaham doohe nɔbiŋere la puan.

Ze'elego la vuurɛ

¹⁹ Ŋwani ti ze'elego la yi' bɔna? Yinɛ dikɛ ku pa'ahɛ la tu be'em zuo, gura ti Aberaham yaaŋa la ta wa'am na, se'em ti Yinɛ biŋe nuurɛ la en la. Ku me ze'ele la suŋereba la zi'an doohe nupu'ŋmɛ'ɛra la puan.

²⁰ Nananawa, nupu'ŋmɛ'ɛra gani nɛreyinɛ mɛ, gee Yinɛ mɛŋa dela ayima.

²¹ Ze'elego la yi' ka sakɛ bo' Yinɛ nɔbiŋere la bii? La kan dɛna bala! Se'ere en sɔi la, ba han bo' ni ze'elego seko en wan bo' ni vom, tuntɔɔnɛ yi' wan ze'ele la ze'elego la puan na.

²² Gee Yinɛ gɔŋɔ la yeti, sɛla woo boi la be'em paŋa la puan, ti sɛla ti Yinɛ biŋe nuurɛ doohe sakerɛ n boi Yezu Kiresta puan la, wan dikɛ bo' la sɛba n nam la.

²³ Nananawa, sakerɛ saŋa n daa nan ka paaɛ la, ze'elego la daa pagɛ tu mɛ, gee gura tɔ, tara tara ti sakerɛ saŋa la nyaa ta paaɛ.

²⁴ Bala, ze'elego la en daa de se'em en guri tu, tara tara ti Kiresta ta wa'am na, ti tu nyaa naaɛ la Yinɛ dɔla tu sakerɛ puan.

²⁵ Gee nananawa ti sakerɛ wa'am na la, tu ka le bɔna se'em en ni guri tu la nu'uhen,

²⁶ Se'ere en sɔi la, Yezu Kiresta puan, ya za'a dela Yinɛ kɔma doohe sakerɛ puan.

²⁷ Beni zuo, wuu ya zo'e zo'e en to'e ko'om sua Kiresta puan la, ya pi' ya mɛhi mɛ la Kiresta.

²⁸ Dinɛ zuo, Yuuduma buuri bii Giriki buuri ka le bɔna, da'aberɛ bii fai daana ka le bɔna, buraa bii pɔka ka le bɔna. Se'ere en sɔi la, ya za'a dela buyina Kiresta Yezu puan.

²⁹ Ti fum se'em n de Kiresta dinɛ, fum yi dela Aberaham yaaŋa, dɛna asooe sɔna daana wuu nɔbiŋere la en de se'em la.