Galatɩ 2 - ZE'ELEGO PAALEGA

Pɔɔl la tuntuneba basɛba

¹ Ti yuum pia la anaahi ta tole, ti n le zom Yerusalɛm la Banabase, tara Taitusi pa'ahɛ.

² Mam kiŋɛ la dela n nyɛ la lilegere. Ti mam paaɛ dikɛ sɛla woo biŋe ba nɛŋan (la dela mam la nɛheduma sɛba ti ba loohe la ma'a) doohe faarɛ yelehum la ti mam muula bɔ'ɔra sɛba en ka pa'ahɛ Yuuduma puan la, ti n baŋɛ ti mam tuni sɛla la, gee pun tum sɛla la, kan bahɛ yoo.

³ Gee Taitusi se'em en yuum pun bɔna la mam la, ba ka pɛregɛ en ti a ŋma, la en pun dɛna Giriki la.

⁴ Gee doohe la pumpɔreŋɔ sakereba ti nɛreba li'ihɛ tari ba na la, sɛba en iŋɛ bããlam kɛ̃ ti ba bihɛ fai sɛka ti tumam tara Kiresta Yezu puan, la ba ta'am bahɛ ti tu lebege yamehi la,

⁵ tu pun ka nam bo' ba la fii me, ti faarɛ yelehum la yelemɛŋerɛ ta'am bɔna la ya saŋa woo.

⁶ Ti sɛba en me daa wan deni nɛheduma la, (ban daa sirum de sɛba en bala, gee ba daa ka boi ba tɔka mam zi'an. Se'ere en sɔi la, Yinɛ ka lugehe nɛreba).

⁷ Gee la daa dagi bala, nɛheduma wa en nyɛ ti Yinɛ en dikɛ faarɛ yelehum wa bo' ti n muulɛ sɛba en ka ŋma la, wuu Pita ti Yinɛ dikɛ faarɛ yelehum wa bo' en ti a muulɛ bo' sɛba en ŋma la,

⁸ (se'ere en sɔi la, eŋa se'em daana en tum Pita puan, ti a dɛna tuntuna bo' sɛba en ŋma la, bala mɛa ti a tum doohe mam puan, tum mam sɛba en ka pa'ahɛ Yuuduma puan la zi'an).

⁹ Bala, Yemesi, Kaifase, la Yɔn, sɛba ti ba mina ba ti ba dela tiŋasuka nyuuhe la, en ta baŋɛ zu'uhegɔ seko ti Yinɛ dikɛ bo' mam la, ba daa kɔkɛ mam la Banabase mɛ, pa'alɛ ti tu dela buyina tuunɛ la puan. Gee nyaa sakɛ ti tumam kina sɛba en ka pa'ahɛ Yuuduma puan la zi'an, ti bamam me kina Yuuduma la zi'an.

¹⁰ Ba yele tu la yele yinɛ ma'a, ti tu tɛra naheduma yele, sɛla ti mam pun mu'ɛ nini ti n iŋɛ en bala.

Pɔɔl zɛregɛ Pita

¹¹ Gee Kaifase en ta wa'am Antiyoke tinkãtɛ na la, mam yuum ze'ele la a nɛŋan zɛregɛ en, se'ere en sɔi la, a tuue mɛ.

¹² Han dagena sansɛka ti nɛreba basɛba ze'ele Yemesi zi'an wa'am na la, Pita ni lagum naaɛ me la sɛba en ka pa'ahɛ Yuuduma puan wa dita. Gee nɛreba la en paaɛ na la, a fooe a mɛŋa lebe la pooren a ma'a. Se'ere en sɔi la, a zoti la sɛba en ŋma la.

¹³ Ti Yuuduma basɛba me lagum pa'ahɛ a birekɔgenɛ wa puan, ti la bahɛ ti Banabase me lagum pa'ahɛ ba birekɔgenɛ wa puan.

¹⁴ Gee mam en ta nyɛ ti ba itegɔ la ka dole faarɛ yelehum la yelemɛŋerɛ la, ti n yele Kaifase ba za'a nɛŋan yeti, “La fum en pun dɛna Yuu nɛra wa, han vɔna wuu se'em en dagi Yuu nɛra, gee ka vɔna wuu se'em en de Yuu nɛra, ŋwani ti fum wan ta'am pɛregɛ sɛba en dagi Yuuduma ti ba vɔna wuu Yuu nɛreba?”

Sakerɛ en bo'ori Yuuduma la sɛba en dagi Yuuduma faarɛ

¹⁵ Tumam mɛhi dela Yuu buuri tu dɔgum puan, gee dagi be'em duma sɛba en ka pa'ahɛ Yuuduma buuri la puan.

¹⁶ Gee la bala za'a, tu mi' ti nɛra de ma'a la Yinɛ dagi la en tuni ze'elego la, gee en tari sakerɛ Yezu Kiresta puan. Ti tumam wa'am na nam Yezu Kiresta, ti tu dɛna ma'a la Yinɛ tu sakerɛ Kiresta puan, gee dagi tumam en tuni ze'elego tuuma se'em. Beni zuo, nɛra ka boi n wan ta'am dɛna ma'a la Yinɛ eŋa en tuni ze'elego tuuma la.

¹⁷ Gee tumam han tiregera ti tu dɛna ma'a la Yinɛ doohe Kiresta puan la han dɛna be'emduma, Kiresta nyaa dela be'emduma yameŋa bii? La kan ta'am dɛna bala!

¹⁸ Gee mam han le mɛta yele sɛ'a ti mam tabelɛ gbi' bahɛ, n yi pa'alɛ ti n dela be'em ita.

¹⁹ Se'ere en sɔi la, ze'elego la puan, mam ki mɛ bo' ze'elego la, ti n ta'am vɔna bo' Yinɛ. Ba kpa' mam mɛ la Kiresta,

²⁰ La le dagena mam mɛŋa en vɔi, gee la dela Kiresta en vɔi mam puan. Ti vom sebo ti n vɔna inganɛ puan nananawa, n vɔi mɛ la sakerɛ Yinɛ Dayua la, se'em en nɔŋɛ mam gee dikɛ a mɛŋa kaabɛ bo' mam la puan.

²¹ Mam ka zagehɛ Yinɛ zu'uhegɔ la. Se'ere en sɔi la, nɛra han ka tara tuure doohe ze'elego la puan, Kiresta kum la yi dela yoo.