Galatɩ 1 - ZE'ELEGO PAALEGA

Pu'uhegɔ

¹ Mam Pɔɔl en de tuntuna, dagena la asaala en tum mam bii asaala en bo' mam sore, gee la doohe la Yezu Kiresta puan, la Yinɛ en de Sɔ la, vo'e Yezu a kum puan na la,

² la lageŋɔ nɛreba la za'a en boi la mam ka'lam la en guleheri bɔ'ɔra yamam Galatia timpaberɛ Lageŋɔ la za'a na.

³ Zu'uhegɔ bɔna la ya, ti suma'ahum en ze'ele tu Sɔ Yinɛ, la tu Daana Yezu Kiresta zi'an bɔna la ya,

⁴ eŋa se'em en dikɛ a mɛŋa bo' tumam be'em zuo, ti a faaɛ tɔ be'em buuri sankana wa puan bahɛ, doohe tu Yinɛ n de tu Sɔ la sumboolum en de se'em la,

⁵ eŋa se'em daana ti suŋa dɛna a dinɛ wuuha wuuha. Taari.

Faarɛ yelehum ka le bɔna zi'an

⁶ La iŋɛ mam la pakerɛ la yamam en pilum zageha se'em en yi' ya doohe Kiresta zu'uhegɔ puan la, gee ŋmɛregɛ dɔla sɛla ti ba yi'ira faarɛ yelehum sebo en boi bu tɔka,

⁷ dagi ti faarɛ yelehum bu sebo en boi ha, gee basɛba en boi, tulena ya puti'ira, bɔta ti ba tee Kiresta faarɛ yelehum la.

⁸ Gee la han pun dɛna la tumam, bii Yinɛ suŋera en ze'ele saazuo ha sige na, muulɛ faarɛ yelehum sebo en boi bu tɔka la tumam en muulɛ sebo bo' ya la, ka' be'o sige a daana zuo!

⁹ Ɛ̃ɛ, wuu tumam en pun yele ya ni se'em la, n le yele ya pa'ahɛ yeti, se'em han wa'am na muulɛ faarɛ yelehum sebo n boi bu tɔka la yan pun to'e sebo la, ka' be'o sige a daana zuo!

¹⁰ Nananawa, mam nyaa eere la saaleba sakɛ bo' mam yoi? Bii n eere la Yinɛ sakɛ bo' mam? Bii n tugum nyaa zigera ti n pee la saaleba puya? Mam han kelum dole ni la n pɛɛra saaleba puya, mam kan deni Kiresta yameŋa.

Pɔɔl di buurɔ ti a dela Yinɛ tuntuna

¹¹ Se'ere en sɔi la, n boti ya baŋɛ mɛ, n suurɔ, ti faarɛ yelehum la ti n muulɛ bo' ya wa, ka ze'ele la asaala zi'an na.

¹² Mam ka to'e bɔ asaala zi'an, bii n zamehɛ bu mɛ, gee mam to'e bu la Yezu Kiresta en niiɛ a mɛŋa pa'alɛ mam la zi'an.

¹³ Ya wum ya, gee me ka bu'ura mam en daa vɔi se'em Yuuduma pu'uhegɔ la puan. Mam daa gbiregeri mɛ, mɛleha Yinɛ lageŋɔ la, zigera n sagum kɔ.

¹⁴ Mam daa ba' tole la nɛŋa Yuuduma pu'uhegɔ la puan n nɛreba tiŋasuka, gana mam la sɛba en de zuo taaba zo'e zo'e. Se'ere en sɔi la, n daa ba' mu'ɛ la nini la n yaabeduma pa'alegɔ la.

¹⁵ Gee Yinɛ, se'em en daa gaŋɛ mam ze'ele gee ti ba baŋɛ dɔgɛ mam la nini tigɛ la mam mɛ, ti a yi' mam doohe a zu'uhegɔ la puan,

¹⁶ ti a lilege a Dayua la pa'alɛ mam, ti n ta'am muulɛ Kiresta yele bo' tihi. Mam daa ka sɔhɛ bo' asaala sɛka,

¹⁷ bii n zom Yerusalɛm sɛba en pun dɛna Yezu tuntuneba mam yia la zi'an, gee mam yehe mɛ bilam bilam kiŋɛ Arebiya tinkãtɛ puan, ti pooren ti n lebe Damasekuse tinkãtɛ.

¹⁸ Yuuma atã en tole, ti n zom Yerusalɛm ti n ta limehe Kaifase guum, gee kɛ̃ la en dabeha pia la anuu.

¹⁹ Gee n ka nyɛ tuntuna se'em bini, han dagena Yemesi en de Daana suuɔ la.

²⁰ Mam guleheri sɛla bɔ'ɔra ya wa, Yinɛ nɛŋan ti n zɛ'a wa, n ka pareni!

²¹ Pooren ti n kiŋɛ Siriya la Kilikiya sɔ'ɔlum puan,

²² gee bala ma'a ti n nan dela saana bo' Yudiya lageŋɔ la en boi Kiresta puan la.

²³ Ba yeen wum la nɛreba en yeti, “Se'em en yuum nameheri tu la, nyaa muuli la sakerɛ se'ere ti a yuum zigera a sagum la.”

²⁴ Ti ba pɛgɛ Yinɛ mam zuo.