Filipi 4 - ZE'ELEGO PAALEGA

¹ Dinɛ zuo, n suŋɛ duma ti n nɔŋɛ, gee bɔta ti n nyɛ ya paaɛ paaɛ wa, mam nyɛɛma la mam na'am muŋa wa. Ze' ya kankaŋi Daana la puan, sadɔɔ kuna puan, n sunɔŋerɛ wa.

Kpemehego

² N beleni Eyodia, la Sintike, ti ba dɛna putɛ'yinɛ Daana la puan.

³ Gee yɛta fum se'em ti mam la fum bɔna yɔgehega kayima puan wa yeti, fum suŋɛ pɔgehi wa. Se'ere en sɔi la, si lagum zabɛ mɛ suŋɛ mam faarɛ yelehum wa tuuma puan. Bamam la Kilɛmɛnti la basɛba la en de mam tuntuneba taaba la, sɛba yu'ura en boi vom gɔŋɔ la puan la.

⁴ Nyɛɛni ya Daana la puan saŋa woo. Le yɛ'ɛha, n yeti, nyɛɛni ya.

⁵ Bahɛ ya ti ya sigehe n mɛŋa la niiɛ bo' nɛra woo. Daana la pɔri na.

⁶ Da fabele ya sɛsɛla yele, gee sɛla woo puan, doohe ya pu'uhegɔ, gee suhega, la fara bu'a puan, bahɛ ti Yinɛ baŋɛ yan boti sɛla la.

⁷ Ti Yinɛ suma'ahum la n gani bɔkerɛ za'a la, gu'ura ya suya la ya ti'ihegɔ sɛ ti zɛ'a kankaŋi Yezu Kiresta puan.

⁸ Ba'ahegɔ za'a, n suurɔ, sɛla woo en de yelemɛŋerɛ, sɛla woo en tari na'ahegɔ, sɛla woo en de ma'a, sɛla woo en ka tari dɛgerɔ, sɛla woo en peere puurɛ, sɛla woo n nari. Sɛla han bɔna di mi'a, sɛla en boi nara pɛka, ti'iheri ya yele ana wa yele.

⁹ Tara ya yele sɛ'a ti ya zamehɛ, gee to'e, gee wum, gee nyɛ mam puan la tuna, ti suma'ahum Yinɛ la, wan bɔna la ya.

Pɔɔl bo' fara Filipiduma fara la ba bo'olum la

¹⁰ Mam nyɛɛni la nyɛɛmkãtɛ Daana la puan nananawa, ti ba'ahegɔ za'a, ya malum ihege yan daa ti'iheri n yele se'em la mɛ. Yelemɛŋerɛ, ya yuum ti'iheri n yele, gee ya yuum ka nyɛ yɔ'ɔ pa'alɛ dɛ.

¹¹ Dagi mam n yeti ŋwana wa dela, n boti la sɛla ya zi'an. Se'ere en sɔi la, mam zamehɛ mɛ ti sadɔɔ seko woo puan, n nini tigɛ la sɛla ti n tara mɛ.

¹² Mam mi' mam tari n mɛŋa se'em mɛ, n han ta sige, gee mina mam tari n mɛŋa se'em, n han le ta zom paaɛ paaɛ. Yele ana wa, de se'ere puan, la yɛla za'a puan, mam zamehɛ la sugelum yele se'ere en boi putigerɛ puan, la kom puan, tara zo'e zo'e puan, la ka tari puan.

¹³ Mam ta'am iŋɛ sɛla woo se'em daana en bo'ori mam paŋa la puan.

¹⁴ Gee sadɔɔ seko woo puan, ya daa iŋɛ la itesuŋɔ, la yan lagum di mam nimbu'ɔ la.

¹⁵ Yamam Filipiduma sirum mi' ti, faarɛ yelehum pɔhega dabeha la puan ha la, mam en bahɛ Masedoniya la, lageŋɔ daa ka boi lagum tum bo' mam bu'a bii to'ore yɛla wa puan, han dagena yamam ma'a.

¹⁶ Mam a daa pun ta bɔna Tɛsalonika timpaberɛ ha la, ya bo' mam suŋɛ me na gaŋɛ buyina.

¹⁷ Dagi la n eere la bo'olum la, gee mam eere la nyuurɔ seto n wan kã'ahɛ zo'e zo'e beŋe bo' ya la.

¹⁸ Ya kɔ'ɔm yɔ mam la za'a za'a, ti n tara gaŋɛ. Ya kɔ'ɔm tigehɛ mam mɛ suŋa suŋa, yele yele wuu mam nyaa to'e ya bo'olum la ti ya dikɛ tum Epafurodituse na la. Bo dela nyuuŋo suŋɔ kaabegɔ bo'olum. Bo dela kaabegɔ n tigeri Yinɛ nini.

¹⁹ Bala zuo, Mam Yinɛ wa wan tigeha ya sɛla woo ti ya bɔta, doohe la a tarega sum sebo n boi Yezu Kiresta puan la.

²⁰ Pɛka dɛna tu Yinɛ, la tu Sɔ la dinɛ wuuha wuuha. Taari.

Ba'ahegɔ pu'uhegɔ la ka'a

²¹ Pu'uhɛ nɛresunduma la za'a en boi Kiresta Yezu puan la. N suurɔ n boi la mam ka'lam pu'uheri ya na.

²² Nɛresunduma la woo pu'uheri ya na, yele yele wuu timbihera nɛŋadaana la yireduma la.

²³ Tu Daana Yezu Kiresta zu'uhegɔ bɔna la ya Sia puan.