Filipi 3 - ZE'ELEGO PAALEGA

Yelemɛŋerɛ Tuntɔɔnɛ

¹ Ba'ahegɔ za'a, n suurɔ wa, nyɛɛni ya Daana la puan. N gulehɛ yele sɛ'a ti n pun gulehɛ bo' ya yia la le bo' ya, dagi daaŋɔ bo' mam. Han dɛna yamam me, la suŋeri ya mɛ.

² Mini ya baahi la yele, mini ya be'em tuntuneba la yele, mini ya sɛba ti inganɛ wa ŋmaa dɛna ba ninmu'urɛ la yele!

³ Bihɛ ya, tumam en de sɛba n sirum ŋma la, tumam en de sɛba n na'aheri Yinɛ Fa'a Sia la puan, gee ŋmɛ'ɛra tu nyu'ɔ Yezu Kiresta puan, ka dikɛ tu mɛhi delum inganɛ malema,

⁴ la mam en pun tara sore ti n ŋmɛ'ɛra nyu'ɔ la inganɛ la. Se'em han bɔna ha tara se'ere zuo ti a wan ŋmɛ'ɛra nyu'ɔ la a inganɛ, mam yi tari gana bala.

⁵ Ba ŋma mam la dabeha anii daarɛ, mam dela Izirale buuri, yehe Benyamin yizuo puan, dɛna Hiburu, ti Hiburu pɔga la buraa naaɛ taaba dɔgɛ. La han dɛna la ze'elego la, mam dela Farasii paaɛ paaɛ,

⁶ la han dɛna la ninmu'urɛ, mam en daa dole mɛleha lageŋɔ la, la han dɛna la tuuntɔɔ vom doohe ze'elego la puan, mam ka tari tuure.

⁷ Gee ba han pun tara nyuurɔ seto woo, mam bihɛ ba za'a ti ba dela zaŋa Kiresta zuo.

⁸ Sɛla en gani bala dela, mam bihɛ sɛla woo ti ba dela zaŋa beni zuo, tibehum sebo en gani za'a en boi mam n baŋɛ Yezu Kiresta en de mam Daana la. Eŋa zuo, ti mam bɔregɛ sɛla woo bahɛ, gee biha ba ti ba dɛna sɔgerɔ, ti n ta'am tara Kiresta,

⁹ la n vɔna a puan, da tara n mɛŋa tuntɔɔnɛ en yehe ze'elego la naŋa puan na, gee tuntɔɔnɛ en yeheri n sakerɛ Kiresta puan na. Tuntɔɔnɛ se'ere en ze'ele Yinɛ zi'an dɔla sakerɛ puan.

¹⁰ Mam boti n baŋɛ Kiresta mɛ, la a vo'ore paŋa la, la n lagum namehɛ a namehegɔ la, doohe la n ana wuu en, a kum la puan,

¹¹ wuu ma beere puti'irɛ en de n ti Yinɛ wan ta ihege mam kum puan la.

N zigeri yɛ'ɛha la nyaŋerɛ

¹² Dagi la mam pun tara ŋwana mɛ, bii n pun di la mi'a. Gee mam kɔ'ɔm zigera mɛ ti la dɛna mam dinɛ, beni zuo, Kiresta Yezu iŋɛ mam ti n dɛna la a dinɛ.

¹³ N sunɔŋerɛ duma wa, mam ka biheri ti de pun dɛna la mam dinɛ, gee yele dina wa ma'a ti mam ita. Mam tameni sɛla woo en boi mam pooren, gee tiregɛ kina nɛŋa ti n paaɛ sɛla en boi n nɛŋan ha la.

¹⁴ N tiregeri mɛ ti n di mi'a, la n to'e yɔɔrɛ la en de saazuo yi'a wa yɔɔrɛ, ti Yinɛ yi' mam doohe Kiresta Yezu puan la.

¹⁵ Bahɛ ya ti tumam sɛba en bi'ɛ la, tara puti'irɛ deyina, gee se'em puti'irɛ han bɔna deyima yelese'ere puan, la han dɛna bala, Yinɛ wan lilege dɛ bo' ya.

¹⁶ Yeen bahɛ ya ti tu zãla sɛla ti tu tara la kankaŋi.

¹⁷ N suurɔ, naaɛ ya taaba la ya tɔgeha mam, gee la ya bihera sɛba en vɔi dɔla tumam n iŋɛ sɛla pa'alɛ ti yamam nyɛ la.

¹⁸ Se'ere en sɔi la, ba zo'e zo'e vom dela dinduma la Kiresta pumpuuredɔɔ la. Mam ni pun yɛta ya ba yele, gee n nyaa yeti ya mɛ la nintam.

¹⁹ Ba ba'ahegɔ dela sageŋɔ. Ba yinɛ dela ba puya, ti ba suŋa bɔna ba vi la puan, ba puti'ira boi la timpaberɛ wa zuo lɔgerɔ puan.

²⁰ Gee tumam timbiine la boi la saazuo ha. Bilam ti tu gura ti tu faara la wan ze'ele na, tu Daana Yezu Kiresta la.

²¹ A wan tee tu inganɛ se'ere n nyɛti mugehego wa, ti ka ana wuu eŋa insɛka en tari suŋa wa, doohe la a pansɛka n baheri ti a ta'na bahera ti sɛla woo bɔna a nu'uhen la.