Filipi 2 - ZE'ELEGO PAALEGA

Tɔgehɛ ya Kiresta sigehe mɛŋa

¹ Han dɛna ti kpemehego seko boi Kiresta puan, ti subugehum en ze'eti nɔŋerɛ puan na bɔna, han dɛna ti Fa'a Sia la puan lageŋɔ boi, han dɛna ti nimbɔ'zɔrɛ la taaba boi, ti taaba giile tarega bɔna,

² yi bahɛ ya ti mam nyɛɛŋɔ pirɛ, doohe ya tari putɛ'yinɛ, nɔŋerɛ deyina la taaba, nɔyinɛ la suure deyina.

³ Da iti ya sɛla nyika puti'irɛ puan, bii pa'alɛ n mɛŋa yooro puan, gee sigehe n mɛhi puan, tugum bihɛ ya nyɛta sɛba gana ya mɛhi.

⁴ Da bahɛ ya ti ya se'em kɔ'ɔm biha a mɛŋa ma'a sum yele, gee ya biha basɛba sum yele me.

⁵ Bahɛ ya ti putɛ'se'ere en boi Kiresta Yezu puan la, bɔna yamam me puan.

⁶ Eŋa se'em, en daa pun dɛna Yinɛ mɛŋa naanɛ la, a daa ka bihɛ eŋa en zuni la Yinɛ la, ti la dɛna sɛla bo' en. Dɛna sɛla ti a gurɛ kankaŋi,

⁷ gee a daa bihɛ a mɛŋa la zaŋa, dikɛ a mɛŋa lebege yameŋa, ti ba dɔgɛ en ti a dɛna asaala. Tara asaala naanɛ,

⁸ sigehe a mɛŋa, nam Yinɛ ta paaɛ kum, kum sebo en pun dɛna pumpuuredɔɔ zuo kum.

⁹ Ŋwana zuo ti Yinɛ me zɛkɛ en saazuo gee bo' en yu'se'ere en gani yu'ura za'a,

¹⁰ ti Yezu yu'urɛ la, ti duma woo wan kpa'ara bɔ'ɔra, saazuo ha, la timpaberɛ wa zuo, la timpaberɛ timpaberɛ ha,

¹¹ ti zɛleŋa woo puta yeti, Yezu Kiresta en de Daana, ti la dɛna na'ahegɔ bɔ'ɔra Yinɛ en de Sɔ la.

Niiri ya wuu bugum timpaberɛ wa zuo

¹² Ŋwana zuo, n sunɔŋerɛ duma wa, wuu yamam en nane mam saŋa woo se'em la, ti la dagena la mam ni bɔna la ya la ma'a, gee nam ya mam gana bala nananawa, ti n ka bɔna la ya wa. Tuni ya mɛ la ninmu'urɛ pa'alɛ ti ya nyɛ faarɛ, la dabeem la gbi'a.

¹³ Se'ere en sɔi la, la dela Yinɛ en boi ya puan tuna la ninmu'urɛ, bɔ'ɔra ya paŋa ti ya tana sakera gee tuna bɔ'ɔra a yu'urɛ la.

¹⁴ Iti ya sɛla woo gee da gɔgena, bii ya ŋmɛ'ɛra nɔkpɛ'ɛma la taaba,

¹⁵ bala ti ya kan tari gbelegere la taalɛ, ya wan dɛna Yinɛ kɔma en ka tari dɛkɔ nɛre ŋmɛlema, la fãareba buuri saŋa nɛreba wa tiŋasuka. Niiri ya ba puan timpaberɛ wa zuo wuu ya dela bugum la.

¹⁶ La dela yamam en tari vom yelehum wa kankaŋi la zuo, ti n wan ta ta'am ŋmɛ' nyu'ɔ Kiresta lɛbega daarɛ na, ti n daa ka zɔ bahɛ yoo bii n tum bahɛ yoo.

¹⁷ Gee ba han pun ka'ɛ mam wuu buum kaabegɔ la bahɛ kaabegɔ bo'olum la zuo, yamam sakerɛ zuo, la de mam la pupeelum, ti n nyɛɛni la yamam za'a.

¹⁸ Bala mɛa ti yamam me dɛna ya nyɛɛna la pupeelum la mam.

Timoti la Epafurodituse

¹⁹ Mam tari puti'irɛ Daana Yezu zi'an ti n tum Timoti ya zi'an kalam na, la n nyɛɛm doohe mam wan wum yelesuma sɛ'a ya zi'an la.

²⁰ Mam ka tari se'em en ani wuu eŋa, ba' tara ya giile bala.

²¹ Se'ere en sɔi la, bana la za'a eere la ba mɛhi ma'a sum yele, dagi Yezu Kiresta yelehum la sum yele.

²² Gee ya mɛhi mi' Timoti tibehum en ani se'em. A ani wuu dayua la ka Sɔ la, lagum tum la mam faarɛ yelehum tuuma wa puan la a ziim za'a.

²³ Bala zuo, mam ti'ihɛ ti n tum en mɛ kalam na, wuu mam n nyɛ ti la ani mam se'em la.

²⁴ Gee mam nam Daana la, ti mam me wan wa'am ya zi'an tɔtɔ na.

²⁵ Le pa'ahɛ, mam ti'ihɛ ti la nari ti n tum Epafurodituse ya zi'an na. A dela n suuɔ, la n tuntuna tadaana, la n pɛntiira tadaana en de ya bituneŋa, gee dɛna tuntuna bo' mam en boti sɛla.

²⁶ A ba' bɔta ti a nyɛ ya za'a mɛ, gee a suure sagum mɛ la yan wum ti a bɛ̃'ɛri mɛ la.

²⁷ A daa sirum ba' bɛ̃' mɛ, gee la a ki. Gee ti Yinɛ zɔ a nimbu'ɔ, gee dagi la eŋa ma'a ti Yinɛ daa zɔ a nimbu'ɔ, gee mam me, ti n susageŋɔ la da tagelɛ taaba.

²⁸ Mam ba' bɔta ti n tum en mɛ ya zi'an kalam na, ti ya nyɛɛm la yan le nyɛ en la, gee ti mam me susageŋɔ la sige.

²⁹ To'e ya en Daana la puan la ya pupeelum za'a, gee na'ahɛ ya nɛrebana taaba.

³⁰ Se'ere en sɔi la, a dela se'em en daa gee la a ki' Kiresta tuuma zuo, pɔhɛ a vom, tum tuunse'ere ti yamam kan nyaŋɛ ni tum bo' mam la.