Filipi 1 - ZE'ELEGO PAALEGA

Pu'uhegɔ

¹ Mam Pɔɔl la Timoti en de Kiresta Yezu yamehi la en gulehɛ gɔŋɔ wa, bɔ'ɔra Yinɛ nɛresunduma la za'a en boi Kiresta Yezu puan Filipi timpaberɛ la, la lageŋɔ nɛheduma, la kiinduma la.

² Zu'uhegɔ bɔna la ya, ti suma'ahum en ze'ele Yinɛ en de tu Sɔ, la tu Daana Yezu Kiresta zi'an, bɔna la ya.

Pɔɔl pu'uhi bɔ'ɔra Filipiduma

³ Mam bo'ori n Yinɛ fara mɛ, saŋa woo ti n ni ta tiɛ ya yele,

⁴ pu'uheri la nyɛɛma n pu'uhegɔ woo puan bɔ'ɔra ya za'a.

⁵ Se'ere zuo, ya lagum suŋɛ mam mɛ faarɛ yelehum wa puan, ze'ele pɔhega daarɛ la wa'am na paaɛ zina.

⁶ Bala, mam tari sakerɛ la yele dina wa puan yeti, se'em daana en pi'ilum tunsunɛ dina wa ya puan la, wan tari dɛ bala ta ba'ahɛ, Yezu Kiresta lɛbega dabeherɛ la puan.

⁷ La dela ma'a bo' mam ti n ti'iha ya za'a yele ŋwana, beni zuo, ya tari mam mɛ ya suya puan, la yamam za'a en lagum tɔrɛ Yinɛ zu'uhegɔ la mɛ la mam, n paka wa puan, la mam en ka sakerɛ faarɛ yelehum wa zuo, gee sɛɛra bɔ zɛ'ɛta se'em la.

⁸ Yinɛ en de mam aze'nyɛ daana, mam n mu'ɛ nini ba' bɔta ti n nyɛ ya za'a se'em, la Kiresta Yezu nimbɔ'zɔrɛ la.

⁹ Mam pu'uhegɔ en de se'em en ŋwana, ti ya nɔŋerɛ wan zo'e yabera, ti ya mi'ilum malum pa'ahɛ, ti ya pirɛ la bɔkerɛ,

¹⁰ ti la suŋɛ ya, ti ya zamehɛ mina sɛla en ani suŋa gana za'a, bala ti Kiresta lɛbega dabeherɛ na la, ya wan dɛna Yinɛ tuulum nɛreba, ka tara dɛkɔ.

¹¹ Yan diŋɛ wam tuuntɔɔ wala sɛ'a en ze'eti Yezu Kiresta zi'an na, tara na'ahegɔ la pɛka bɔ'ɔra Yinɛ la.

Pɔɔl zina vom

¹² N boti ya baŋɛ mɛ sunɔŋerɛ duma wa, ti sɛla en iŋɛ mam la, tugum suŋɛ mam mɛ ti n muulɛ faarɛ yelehum wa,

¹³ ti la niiɛ bo' gureba la za'a, la nɛra woo en boi bilam, ti ba baŋɛ yeti, mam en boi pakadeen wa dela Kiresta zuo.

¹⁴ Ŋwana n bahɛ ti tu suurɔ zo'e zo'e nyɛ inkpeŋere Daana la puan mam, paka wa puan ka zɔta ti ba tɔgɛ yelehum la, la sukpe'ene ti dabeem ka bɔna.

¹⁵ Sɛba muuli Kiresta mɛ, nintɛrega la nyuure zuo, gee sɛba me muulegɔ mɛ la putɛ'sunɛ.

¹⁶ Nɛrebana wa muuli Kiresta la nɔŋerɛ puan, gee mina ti ban tari mam wa'am ka'lam na wa dela mam en ka sakerɛ faarɛ yelehum la zuo.

¹⁷ Gee sɛba me muuli Kiresta la nyika puti'ira puan, dagi la ba susunɛ puan, gee ba malum pa'ahɛ mam namehegɔ, n paka deo bɔŋa wa puan.

¹⁸ Gee sɛla en pakɛ dela, yele dina wa ma'a. Ti ba yeen muulɛ Kiresta sadɔtɔ seto woo puan, pumpɔreŋɔ puan, bii yelemɛŋerɛ puan, mam nyɛɛni mɛ ŋwana puan. Ɛ̃ɛ, mam wan kelum nyɛɛna la bala,

¹⁹ se'ere en sɔi la, mam mi' ti ya pu'uhegɔ zuo, la Yezu Kiresta Fa'a Sia la suŋɛ zuo, la wan ta tee dɛna mam faarɛ.

²⁰ La dela sɛla ti mam kɔ'ɔm ana kɛli, gee me tari puti'irɛ, ti vi kan di mam sadɔɔ seko woo puan, gee doohe mam en muuli la sukpe'ene wa zuo, Kiresta yu'urɛ wan nyɛ pɛka nananawa, wuu la ni pun ani se'em mam iŋa wa puan la, mam vom bii n kum la.

²¹ Se'ere en sɔi la, han dɛna mam wa, mam vom dela n tuna bɔ'ɔra Kiresta, ti n kum dɛna n nyuurɔ.

²² N han yeti n vɔna n ingɔŋɔ wa puan, la dela tuunsuma n tari wala bɔ'ɔra mam. La bahɛ ti mam ka mina mam wan looe sɛla.

²³ La kpe'em bo' mam mɛ yele ana ayi' wa puan. Mam puti'irɛ puan, mam boti ni ti n bahɛ vom buna wa mɛ, gee kiŋɛ ta bɔna la Kiresta, bala kɔ'ɔm nyana mɛ.

²⁴ Gee n kelum vɔna ingɔŋɔ wa puan me ani suŋa mɛ yamam zuo.

²⁵ Mam n diŋɛ mina yele dina wa suŋa suŋa la, mam mi' ti n wan vɔna, la n tuna la ya za'a, ya nɛŋa tɔlega, la ya nyɛɛma ya sakerɛ puan zuo.

²⁶ Ŋwana ti n wan ta'am lagum ŋmɛ'ɛra nyu'ɔ paaɛ paaɛ la ya Yezu Kiresta puan, n han ta le wa'am ya zi'an na.

²⁷ Yamam yeen vɔna ya vom, sadɔɔ seko en naaɛ la Kiresta faarɛ yelehum la, ti n han nyaŋɛ wa'am na bihɛ ya, bii n han pun ka bɔna la ya gee wum ya yele, n wan mina ti ya ze' la kankaŋɛ, Sia kayima puan, naaɛ taaba la putɛ'yinɛ, zigera la taaba ti ya tara sakerɛ faarɛ yelehum la puan.

²⁸ Da bahɛ ya ti ya dinduma bihɛ ya yoo. Han dɛna bamam, ŋwana dela aze'nyɛ daana bo' ba sageŋɔ la, gee tugum dɛna yamam faarɛ. Ŋwana wa dela Yinɛ en iŋɛ dɛ.

²⁹ Yinɛ ka doohe a zu'uhegɔ la puan bo' tu la yɔ'ɔ ti tu nam la Kiresta ma'a, gee tu nameheri a zuo me,

³⁰ yan diŋɛ zigera zika sɛka ti ya nyɛ ti mam zigeri la, gee wum ti n kelum zigera ka la zuo.