Efɛɛzɩ 6 - ZE'ELEGO PAALEGA

Kɔma la ba Dɔgereba

¹ Kɔma, nane ya ya dɔgereba, se'ere en de ma'a en bala Daana sore la puan.

² “Na'aha fum Sɔ, la fum ma.” Dina en de yia nɔze'elego, tara nɔbiŋere n yeti,

³ “Bala ti la wan ana fum suŋa, gee ti fum nyuura wugɛ timpaberɛ wa zuo.”

⁴ Sɔduma, da daani ya ya kɔma ti ba suure nyiira, gee tugum bihɛ ya ti ba zɔ'ɔra la tube-dɔlegerɛ la Daana la sore puan kã'aŋɔ.

Da'aba la ba kpɛ'ɛnduma

⁵ Da'aba, nane ya ya timpaberɛ wa zuo kpɛ'ɛnduma, la dabeem la gbi'a, la suyinɛ wuu yan nane Kiresta se'em la.

⁶ Da iti ya ŋwana ba nɛŋan ma'a ti ya yeen pee ba suure, gee ya dela Kiresta yamehi, tuna Yinɛ sumboolum la ya suya za'a za'a.

⁷ Tuni ya ya tuuma la pupeelum kãtɛ wuu ya tuni bɔ'ɔra la Daana la, gee dagi asaala.

⁸ Tu mina ti, sum sebo woo ti tu iŋɛ tu wan lebehe to'e la bala mɛa tu Daana zi'an, tu dɛna yamehi bii tu bɔna fai.

⁹ Yamam kpɛ'ɛnduma me, iti ya ya yamehi bala mɛa. Da vuuheri ya ba, se'ere en sɔi la, ya mi' ti yamam la bamam za'a tari la Daana ayima ti a bɔna saazuo ha, se'em ti yelehego ka bɔna a puan.

Yinɛ zaberɛ lɔgerɔ za'a

¹⁰ Ba'ahegɔ za'a, kpe'em ya mɛ Daana la, la a pankãtɛ la puan.

¹¹ Bobe ya mɛhi la Yinɛ zaberɛ lɔgerɔ la za'a, la ya ta'am ze'ele zabɛ la Sagena la vuuhego la za'a.

¹² Se'ere en sɔi la, tu ka zaberɛ mɛ la dima en tari ziim la kuba, gee tu zaberɛ mɛ la bumbɛ'ɛhi en sɔi zi'ihi biha, tu zaberɛ mɛ la pahi, la kpe'eŋo en boi sabeeo puan, buuri sankana wa en boi lika puan wa. Tu zaberɛ mɛ la sia puan pambɛ'ɛhi en boi zi'ihi se'ehi saazuo ha.

¹³ Bala zuo la, bobe ya mɛhi la Yinɛ zaberɛ lɔgerɔ la za'a, bala ti ya wan ta'am sɛ' ze'ele dabehebe'o la daarɛ kankaŋɛ, dabehebe'o daarɛ la han ta paaɛ ya na. Ti ya me han ta zabɛ paaɛ de ba'ahegɔ, ya wan kelum ta'am sɛ' ze'ele kankaŋɛ.

¹⁴ Bala zuo, sɛ ya ze'ele kankaŋɛ. Gee bahɛ ti yelemɛŋerɛ ana wuu sɛganɛ la lu' ya sɛɛhi la, gee me bahɛ ti tuntɔɔnɛ dɛna ya nyu'ɔ tɛ'ɛlega.

¹⁵ Tagera sɛ'a ti ya wan pire ni, pirɛ ya sɛla woo n wan ta'am maahum ya ti ya muulɛ suma'ahum faarɛ yelehum wa.

¹⁶ Lɔge tuna wa za'a la, dikɛ ya sakerɛ ti la dɛna zaba tɛ'ɛlega, ti ya wan ta'am kiihera yabega pɛɛma la woo ti be'emdaana la tɛɛra la.

¹⁷ Tara ya faarɛ ti la dɛna ya zaberɛ zuo wanɛ, la Sia puan su'a la n de Yinɛ yelehum la.

¹⁸ Bala pu'uheri ya Sia la puan saŋa woo, ya pu'uhegɔ la ya suhega woo puan. Ti ba'ahegɔ puan, da ga' ya gihera gee sɔheri ya saŋa woo bɔ'ɔra nɛresunduma la za'a.

¹⁹ Pu'uheri ya bo'ori ya mam mɛ, ti n han ni yeti n tɔgɛ, Yinɛ bo' mam yelehum, ti n tɔgɛ la sukpe'ene ti nɛreba baŋɛ sugelum yele se'ere n boi faarɛ yelehum wa puan,

²⁰ sebo zuo ti mam sooe Kiresta na'arɛ ti ba ba' mam la bãhi. Pu'uheri ya Yinɛ bɔ'ɔra mam ti n ta'am muulɛ dɛ la sukpe'ene, wuu lan de n tɔgɛ se'em la.

Ba'ahegɔ kã'aŋɔ

²¹ Bala me ti yamam me mina lan ani mam se'em, la mam iti sɛla. Takikuse wan yele sɛla woo. A dela tu suuɔ suŋɔ gee me tara sakerɛ Daana tuuma la puan.

²² Dina wa zuo ti n tuna en na, ti a bahɛ ti ya baŋɛ tumam n ani se'em, gee kpemehe ya suya.

²³ Suma'ahum bɔna la lageŋɔ la nɛreba za'a, la nɔŋerɛ n dole la sakerɛ, ze'ele tu Sɔ Yinɛ, la tu Daana Yezu Kiresta zi'an bɔna la ya.

²⁴ Yinɛ zu'uhegɔ bɔna la yamam sɛba woo n tara nɔŋese'ere n ka tari ba'ahegɔ la bɔ'ɔra tu Daana Yezu Kiresta la.