Efɛɛzɩ 5 - ZE'ELEGO PAALEGA

¹ Dina zuo, tɔgehi ya Yinɛ wuu kɔma ti a nini tigɛ la ya la,

² gee vɔni ya la nɔŋerɛ wuu Kiresta n nɔŋɛ tɔ se'em, dikɛ a mɛŋa bo' tu se'em, lebege nyuuŋo suŋɔ kaabegɔ bo'olum ti ba kaabɛ bo' Yinɛ la.

Zagehɛ ya baga kaabegɔ sadɔtɔ

³ Gee yaluntuuma la dɛgerɔ tuuma woo, bii nyika tuuma da pun puta ya puan, wuu la nari se'em nɛresunduma tiŋasuka la.

⁴ Bahɛ ya ti nyanɛ tugum, gɔɔm tugum la yetɔgum yooro kɔ'ɔm yehe ya zi'an. Gee tugum bahɛ ya ti ya pɛgera Yinɛ.

⁵ Mini ya dina suŋa suŋa, ti se'em n tuni yaluntuuma, bii galeŋɔ daana, bii se'em n bɛ' (de vuurɛ dela bagekaambera), kan tara tɔtɛ kɛ̃' Kiresta la Yinɛ sɔ'ɔlum la puan.

⁶ Da bahɛ ya ti se'em pã'ahɛ ya la gɔɔm yetɔgum. Se'ere en sɔi la, yele ana zuo ti Yinɛ sunsunyiihum wan sige sɛba n ka nane la zuo.

⁷ Dinɛ zuo, da tari ya yelese'ere ita la nɛrebamam taaba.

⁸ Se'ere en sɔi la, ya daa nan boi la lika puan, gee nananawa Daana la puan, ya dela la niihum. Bala Vɔni ya wuu kɔmsɛba n boi niihum puan la.

⁹ Se'ere en sɔi la, niihum wa wala boi sɛla woo n ani suŋa, gee dɛna tuuntɔɔ, la yelemɛŋerɛ puan.

¹⁰ Zigeri ya ti ya ɛ gee zamehɛ sɛla n tigeri Daana la nini.

¹¹ Da lagum tuna ya lika puan tuunsɛ'a n ka tari walesuma la, gee tugum viie ya ba fihi.

¹² Se'ere en sɔi la, la pun dɛna la vi ti fum tɔgera yelesɛ'a ti nɛrebana taaba sugera ita a la yele.

¹³ Gee sɛla woo ti bugum niiɛ ze'ele, la ka tari suka.

¹⁴ Se'ere en sɔi la, sɛla woo n ka sugɛ dela niihum n niiɛ bahɛ la zuo. Bala ti la gulehɛ yeti, “Gɔgihera wa, ihege! Ihege kum la puan, ti Kiresta niiɛ bahɛ fum zuo.”

¹⁵ Bala, Bihɛ ya mɛhi suŋa, yan vɔi se'em. Ya da vɔna wuu nɛreba n ka tari yɛm, gee ya vɔna wuu yɛmduma la.

¹⁶ Ya tuna tuunsuma saŋa woo puan, se'ere sɔi la, dabeha la dela dabeha tooro.

¹⁷ Bala, da deni ya geto gee tugum bɔkeri ya Daana la sumboolum n de se'em.

¹⁸ Da lɛɛra ya mɛhi la daam bugera,bala dela yaalegɔ. Gee tugum pirɛ ya mɛhi la Fa'a Sia la,

¹⁹ tari yuum suma tɔgera bɔ'ɔra taaba, kpemehego yuuma la na'ahegɔ yuuma, la Sia yuuma sɛ'a n boi ya puan. Yuuni ya la pupeelum ya suya puan bɔ'ɔra Daana la.

²⁰ Bo'ori ya Yinɛ n de Sɔ la fara saŋa woo puan, la sɛla woo puan tu Daana Yezu Kiresta yu'urɛ la puan.

Kiresta kɔma yire

²¹ Sigehe ya mɛhi bo' taaba, ti la dɛna ya na'ahegɔ n bala bɔ'ɔra Kiresta.

²² Pɔgeba, sigehe ya mɛhi bo' ya sireba wuu yan ani se'em bo' Daana la.

²³ Se'ere en sɔi la, asira n de a pɔga zuodaana wuu Kiresta n de lageŋɔ la zuodaana se'em la. Lageŋɔ seko n de a iŋa la, ti a mɛŋa dɛna ka faarɛ la.

²⁴ Wuu Lageŋɔ la en boi Kiresta nu'uhen se'em la, bala mɛa ti pɔgehi me wan sigehe ba mɛhi bo' ba Sireba sɛla woo puan.

²⁵ Sireba, nɔŋɛ ya pɔgeba, wuu Kiresta n nɔŋɛ lageŋɔ la se'em, gee dikɛ a mɛŋa vom bo' ku se'em la.

²⁶ A iŋɛ ŋwana ti lageŋɔ la dɛna la tuulum lageŋɔ doohe en duuhe ko'om en de a yelehum la,

²⁷ wuu n boti a dikɛ lageŋɔ la, la ku suŋa la bo' a mɛŋa, ti sɛla da ti'ɛ, bii lirum, bii sɛla kalum kɔ la. Ɛ̃ɛ, ŋwana ti lageŋɔ la wan dɛna tuulum lɔkɔ ka tara dɛkɔ.

²⁸ Bala mɛa ti sireba tara ba pɔgeba nɔŋerɛ sanɛ wuu ban nɔŋɛ ba mɛhi ihe se'em la. Fum se'em n nɔŋɛ fum pɔga, nɔŋɛ la fum mɛŋa.

²⁹ Se'ere en sɔi la, nɛra ka boi yaaɛ a mɛŋa iŋa. Gee a tugum diiha ka mɛ la dinu'uma, gee bihera ka suŋa, wuu Kiresta n iŋɛ se'em bo' lageŋɔ la.

³⁰ Se'ere zuo, tumam dela a iŋa la luga a sɛ'a.

³¹ “Yele dina wa zuo, buraa wan bahɛ ka Sɔ la ka ma gee dikɛ ka mɛŋa naaɛ buyina la ka pɔga ti ba bayi' la lebege bunyinɛ.”

³² Yele dina wa dela yelekãtɛ se'ere n sugɛ ti mam dikɛ dɛ makera Kiresta la Lageŋɔ la.

³³ Nɛra woo, lan pun ana se'em me, dela a nɔŋɛ a pɔga wuu a mɛŋa la, ti pɔga la me dɛna ka na'aha ka asira.