Efɛɛzɩ 4 - ZE'ELEGO PAALEGA

Nɔyinɛ Kiresta puan

¹ Dinɛ zuo, mam en boi paka deen Daana la tuuma zuo beleni ya mɛ, ti ya vɔna vom sebo en nari la yi'sɛka ti ba yi' ya kɛ̃' ka puan la.

² Voni ya ya vom za'a la sirege n mɛŋa, zulaam, gee ŋmibera la taaba nɔŋerɛ puan.

³ Kpeŋe ya mɛhi la ya tara Sia la puan nɔyinɛ la suma'ahum sebo en de bu dikɛ ya naaɛ taaba.

⁴ Se'ere en sɔi la, Iŋa kayina, la Fa'a Sia kayima ma'a en boi, wuu ban yi' ya beere putɛ'yinɛ wa puan se'em la.

⁵ Daana ka ayima, sakerɛ deyina, la ko'om sua buyina.

⁶ Yinɛ deyina, la Sɔ ayima en boi bo' sɛla woo, gana sɛla woo, tuna la sɛla woo, gee bɔna la sɛla woo.

⁷ Gee tu ayima ayima, Yinɛ bo' la tu la tu zu'uhegɔ tu zu'uhegɔ ti bu tibehum zuna la Kiresta ti a dikɛ bo' tu se'em la.

⁸ Ŋwana zuo ti yelehum la yeti, “En zom saazuo ha la, a nyɔkɛ sɛla en nyɔgere la mɛ a mɛŋa, gee bo' a nɛreba bo'olum.”

⁹ Lan yeti, “A zom saazuo ha la,” de vuurɛ dela deni, gee de vuurɛ me le dɛna la deni, lan yeti, a me sige la timpaberɛ wa zuo na, sige timpaberɛ timpaberɛ ha la?

¹⁰ Se'em daana n sige na la, eŋa en bala en zom saa zuin zuin ha la, ti a sɔna sɛla woo biha.

¹¹ Bo'olum la ti a bo' la dela, basɛba wan dɛna tuntuneba, ti basɛba dɛna nɔtɔgeheba, ti sɛba dɛna ayehemuulɛduma, ti basɛba dɛna dunkiinduma la pa'aleba,

¹² ti a kpemehe nɛresunduma la ti ba tuna ba tuuma, la ba mɛ lageŋɔ la n de Kiresta iŋa la,

¹³ gura ti tu za'a ta wa'am na naaɛ taaba la sakerɛ deyina, zo'e Yinɛ Dayua la mi'ilum puan, zo'e dɛna bunkureba ti Kiresta naanɛ la to'e tu za'a.

¹⁴ Tu da le dɛna kɔma le yɛ'ɛha, kaara kina nɛŋa la pooren, ti pa'alegɔ en ani wuu sabeeo ziira ya ɛɛra zi'an woo, pa'ali seko n de nɛreba mɛhi nigeŋɔ la nyaleŋɔ la pã'ahegɔ pã'ahegɔ la.

¹⁵ Gee tu dɛna yelemɛŋerɛ duma tu vom puan, la nɔŋerɛ, tu dela tu zo'e sɛla woo puan ta paaɛ se'em n de zuodaana, Kiresta la n ani se'em la.

¹⁶ Eŋa puan ti iŋa la za'a nyɔkɛ taaba suŋa suŋa dɛna inyiŋa doohe la giile woo n tuni de tuunɛ suŋa se'em bahɛ ti inganɛ la zɔ'ɔra doohe la dinɛ n mɛti de mɛŋa nɔŋerɛ puan la.

Vom kɛka la vom paalega

¹⁷ Nananawa, mam ka'ani ya mɛ gee nyɛta ya la ninmu'urɛ Daana la puan yeti, da le vɔni ya wuu sɛba n dagi Yuuduma la n vɔi se'em, ba putɛ' yooro la puan la.

¹⁸ Lika n pi' ba bɔkerɛ, yehe ba mɛhi Yinɛ vom sum la puan, la ban ka mi' sɛsɛla, gee ti ba suya dagelum la zuo.

¹⁹ Ba zuto ki mɛ ti ba dikɛ ba mɛhi kɔ'ɔm bo' kunkoma'ahum, be'ero, ita dɛgerɔ tuuma woo.

²⁰ Dagi yamam n zamehɛ Kiresta sore la se'em n bala!

²¹ La de asira ti ya wum a yele, gee ti ba me pa'alɛ ya a yele ti yelemɛŋerɛ boi la Yezu puan.

²² Ba pa'alɛ ya ti ya bahɛ ya vom kɛka sore la, ya naanɛ kɛka la, n de ŋmɛlema naanɛ ti kunkoma'ahum pirɛ dɛ la,

²³ gee malum tee ya mɛhi sia puan la ya puti'ira puan.

²⁴ Gee yɛ ya mɛhi la vompaalega naanɛ la, naam se'ere n naam ŋwana la Yinɛ mɛŋa la, dɛna yelemɛŋerɛ tuntɔɔnɛ la tuulum la.

Vompaalum sore

²⁵ Bala zuo, tumam n baheri pã'ahegɔ vom la, bahɛ ya ti tu za'a tɔgera yelemɛŋerɛ bɔ'ɔra tu suurɔ. Se'ere en sɔi la, tu za'a dela iŋa kayima.

²⁶ Fum suure ta'am ihege gee da tum be'em. Da bahɛ ti yinɛ ma'a la fum sunsunyiihum la,

²⁷ me da bo' Sagena la yɔ'ɔ fum puan.

²⁸ Nageyigehi bahɛ zua, gee tugum bahɛ ya ba ti ba tuna la ninmu'urɛ, ba tuna yelemɛŋerɛ la ba mɛhi nu'uhi, la ba ta'am tara, gee me suŋera naheduma.

²⁹ Da bahɛ ya ti yetɔgepu'uha zɛ'ɛta ya nɔya puan yɛhera na. Gee yetɔge sebo en tari vuurɛ gee mɛta ma'a, sansɛka n de ya tɔgɛ. Bala ti yelehum la wan tara zu'uhegɔ bɔ'ɔra sɛba n wum la.

³⁰ Me da dɛgɛ ya Yinɛ Fa'a Sia la suure, sɛ sɛka ti Yinɛ di'e ya, daalɛ ya a mɛŋa daalehum gura faarɛ daarɛ la.

³¹ Dina zuo, yehe ya, ya mɛhi yaarɛ woo puan la sunsuntuulɛ la sunsunyiihum, nyabega, yu'sageŋɔ, ta ta' la pɔgeleŋɔ woo.

³² Gee iti ya sum bo'ori ya taaba, gee zoti ya taaba nimbu'ɔ, gee dita sugeri bɔ'ɔra taaba wuu Yinɛ n di ya be'em sugeri bo' ya se'em Kiresta zuo la.