Efɛɛzɩ 2 - ZE'ELEGO PAALEGA

Vom paalega

¹ Ya yuum ki mɛ ya tuure la ya be'em la puan,

² ti ya yuum bɔna bu puan, dɔla timpaberɛ wa zuo yɛla la, dɔla se'em daana paŋa n boi kusebego wa puan la. Sɛsɛka n boi nananawa tuna la sɛba n ka nane Yinɛ nuurɛ la.

³ Tu za'a yuum nan vɔi mɛ la ba, dɔla tu inganɛ kɔrɛ, la tu mɛhi puti'ira. Tu yuum dela nɛresɛba ti Yinɛ sunsunyiim dɔla tɔ, wuu kɔma woo en ani se'em la.

⁴ Gee Yinɛ n pirɛ la nimbɔ'zɔrɛ la, la nɔŋerɛ kãtɛ se'ere ti a nɔŋɛ tu la,

⁵ la tumam n daa pun ki tu be'em la zuo la, Yinɛ bahɛ ti tu vo'e mɛ la Kiresta. Zu'uhegɔ zuo ti ya nyɛ faarɛ.

⁶ Yinɛ vo'e tu mɛ la Kiresta, gee bahɛ ti tu zi'ire la en saazuo ha, Kiresta Yezu zuo.

⁷ Bala ti saŋa la han ta paaɛ, a wan pa'alɛ a zu'uhegɔ la n ka tari makerɛ la, la a sum sebo ti a tara bɔ'ɔra tɔ Kiresta Yezu puan la.

⁸ La dela zu'uhegɔ zuo ti ya nyɛ faarɛ, doohe sakerɛ puan. Dina dagi ya mɛhi en iŋɛ sɛla, gee la dela Yinɛ bo'olum.

⁹ La dagi ya tum mɛ nyɛ, ti se'em wan ta'am ŋmɛ' nyu'ɔ.

¹⁰ Tumam dela sɛba ti a iŋɛ tɔ ti tu dɛna la. A naam tu la Kiresta Yezu puan, ti tu tuna tunsuma sɛ'a ti Yinɛ pun maahum a ti a dɛna tu vom sore la.

To dela buyina Kiresta puan

¹¹ Bala zuo la, tɛri ya ti saŋa kayima ha, yamam sɛba n dagi Yuuduma buuri ya dɔgum puan na la, sɛba n ŋma la yi'ira ya la “Sɛba n ka ŋma.” Ŋmaa kana wa dela ingɔŋɔ ŋmaa, ti nɛreba nu'uhi ŋmata.

¹² Tɛri ya ti sankaŋa puan la, ya yuum ka mi' Kiresta, dɛna zanku'uma Izirale timpaberɛ, dɛna saama bo' nɔpu'ulegɔ nɔbiŋere la, ka tara beere puti'irɛ, gee me ka mina Yinɛ timpaberɛ wa zuo.

¹³ Gee nananawa, Yezu Kiresta zuo, yamam sɛba ti saŋa yuum bɔna ti ya zaaɛ zaaɛ ha la, ba nyaa tari ya lɛm me na, Kiresta ziim la zuo.

¹⁴ Se'ere en sɔi la, eŋa mɛŋa n de tu suma'ahum. A inganɛ puan, a bahɛ ti yelehego buyi' n lebege buyina, gee gbirege nangoone se'ere en beŋere la, diŋo seko n boi tu tiŋasuka la bahɛ.

¹⁵ A saalum ze'elego la, la ku pa'alegɔ, la ku malema za'a bahɛ mɛ, ti a malum naam asaala paalega bo' a mɛŋa ti a tee ze'ele bo' bayi' la, ti suma'ahum bɔna.

¹⁶ Ti a ta'am bahɛ ti bayi' wa naaɛ taaba bo' Yinɛ, ti ba dɛna iŋa kayima, doohe pumpuuredɔɔ la zuo, nyaa ku diŋo la, doohe a pumpuuredɔɔ la.

¹⁷ Bala, a wa'am na muulɛ la suma'ahum bo' yamam sɛba n daa zaaɛ zaaɛ ha la, gee bo' yamam sɛba n lɛm la.

¹⁸ Se'ere en sɔi la, eŋa puan, ti tu za'a tara Sia kayima dɔla paara Sɔ la zi'an.

¹⁹ Bala zuo, ya ka le dɛna saama bii zanku'uma, gee ya lagum dela tiŋambiihi la nɛresunduma, gee me dɛna Yinɛ mɛŋa yire nɛreba,

²⁰ ti ba mɛ ya dɔgelɛ tuntuneba, la nɔtɔgeheba ɛberɛ la zuo, ti Kiresta Yezu mɛŋa dɛna ɛberɛ kugere la.

²¹ Eŋa puan ti yire la za'a naaɛ taaba, lebege Tuulum pu'uhegɔ yire, Daana la puan.

²² Eŋa puan ti yamam me mɛ naaɛ taaba Sia puan, dɛna Yinɛ bɔŋa zi'an.