Efɛɛzɩ 1 - ZE'ELEGO PAALEGA

Pu'uhegɔ

¹ Mam Pɔɔl, en de Kiresta Yezu tuntuna,Yinɛ sumboolum zuo la. N gulehɛ gɔŋɔ wa bɔ'ɔra la nɛresunduma en boi Ɛfisu, dɛna sakerɛ duma Kiresta Yezu puan la.

² Zu'uhegɔ la suma'ahum en ze'ele tu Sɔ Yinɛ, la tu Daana Yezu Kiresta zi'an bɔna la ya.

Sia sum sebo en boi Kiresta puan

³ Sum dɛna Yinɛ, se'em en de tu Daana Yezu Kiresta Sɔ la dinɛ. Se'em en bo' tu sum Kiresta puan, Sia puan sum sebo woo en boi tinsuŋan ha la,

⁴ wuu en looe tu se'em Kiresta puan gee nyaa baŋɛ naam timpaberɛ wa la, ti tu dɛna tuulum nɛreba, ka tara tuure a nɛŋan, a nɔŋerɛ la puan la.

⁵ A daa pun maahum tu mɛ ti a to'e tu biha, ti tu dɛna a kɔma Yezu Kiresta puan, wuu sum, la boolum sebo en boi a sumboolum puan la,

⁶ ti pɛka paaɛ a suŋa zu'uhegɔ la ti a ka'ɛ saarum tu zuo na yoo a dayɔba'arɛ la puan la.

⁷ Eŋa puan ti Yinɛ yɔ to'e tu a ziim la puan, gee di sugeri bo' tu tuure, doohe a zu'uhegɔ la en seke paaɛ paaɛ la,

⁸ ti a ka'ɛ bu zo'e zo'e bahɛ tu zuo na la. Bo tari la yɛm la mi'ilum za'a,

⁹ ti a iŋɛ tɔ ti tu baŋɛ a sumboolum sugelum yele, wuu sum la boolum sebo ti a pun maahum biŋe Kiresta puan

¹⁰ ti la dɛna sɛla en maahum gura saŋa la ta paaɛ, ti a kã'ahɛ sɛla woo bo' a mɛŋa. Sɛla en boi saazuo, la sɛla en boi timpaberɛ wa zuo, ti iŋɛ Yezu dɛna nɛŋa daana.

¹¹ Kiresta puan, tu tari tɔtɛ mɛ, ban pun maahum tɔ bo' eŋa se'em daana en ba'aheri sɛla woo a mɛŋa kã'aŋɔ la a sumboolum puan la.

¹² Bala ti tumam sɛba en de yia duma dikɛ tu puti'irɛ delum Kiresta la, wan vɔna pɛgera a suŋa la.

¹³ Eŋa puan ti yamam me en wum yelemɛŋerɛ yelehum la en de ya faarɛ yelehum la, me daa nam en, ti ba di'e ya la daalehum sebo en de Fa'a Sia la ti Yinɛ biŋe nuurɛ ti a wan bo' la.

¹⁴ Yele dina en de daalehum, pa'alɛ ti tu tari tɔtɛ en yɔ to'e tu ti tu dɛna Yinɛ mɛŋa nɛreba la dɛna pɛka bo' a suŋa la.

Pɔɔl pu'uhegɔ

¹⁵ N wum yan tari sakerɛ Daana Yezu puan se'em, la yan tari nɔŋerɛ se'em bɔ'ɔra nɛresunduma la za'a. Ŋwana zuo,

¹⁶ mam ka malum bɔ'ɔra Yinɛ fara ya zuo gɔ'ɔra, mam tɛri ya yele mɛ n pu'uhegɔ puan.

¹⁷ N pu'uheri mɛ ti tu Daana Yezu Kiresta Yinɛ la, se'em en de zu'uhegɔ za'a Sɔ la, wan bo' ya a yɛm, la lilegere Sia, yan wa'am na ti ya baŋɛ en wa.

¹⁸ Bala ti ya suure wan yu'ɛ, ti ya nyɛ niihum la, la ya baŋɛ beere puti'irɛ se'ere zuo ti a yi' ya na la, la tarega sɛka en boi suŋa tarega la puan bɔ'ɔra nɛresunduma la,

¹⁹ la a pankãtɛ sɛka en ka tari makerɛ bɔ'ɔra tumam sɛba en nam en, a pankãtɛ tuuma la puan la.

²⁰ Yinɛ dikɛ pankana wa tum la Kiresta puan, en vo'e en a kum la puan, tari en ta zi'ire a zuɔ, tinsuŋan ha la,

²¹ ti a gana bihereba za'a, kpe'eŋo la pahi za'a, la na'am woo n boi, gee gana yu'ura woo en tabelɛ sigɛ, dagi la zina buuri saŋa wa puan ma'a, gee buuri saŋa se'ehi woo en kini na la.

²² Yinɛ dikɛ sɛla woo iŋɛ la a nu'uhen, gee bahɛ en ti a dɛna zuodaana sɔna sɛla woo en de lageŋɔ la dinɛ.

²³ Lageŋɔ la dela Kiresta iŋa, kɔ'ɔm pirɛ mɛ la eŋa se'em daana en boi sɛla woo puan la.