Kolɔsɩ 4 - ZE'ELEGO PAALEGA

¹ Kpɛ'ɛnduma, bo'ori ya ya da'aba buurɔ, la sɛla en de ma'a, gee ya mi' ti yamam me tari kpɛ'ɛma mɛ en boi tinsuŋan ha.

Pa'ahegɔ kã'aŋɔ

² Boni ya pu'uhegɔ puan saŋa woo gurɛ yan pu'uheri se'ere zuo la ya suya puan suŋa suŋa la fara bu'a.

³ Gee me pu'uha bɔ'ɔra tumam me, ti Yinɛ yu'ɛ kuleŋa bo' yelehum la, ti tu muulɛ Kiresta yele sɛ'a en sugɛ la, yele sɛ'a zuo ti mam bɔna paka deen wa,

⁴ ti n ta'am lilege de suŋa wuu mam suni ti n muulɛ de se'em la.

⁵ Tara ya mɛhi suŋa la yɛm yiŋa duma zi'an, tari ya sansɛka woo ti ya nyɛ tuna suŋa suŋa.

⁶ Bahɛ ya ti ya tugum ana suŋa saŋa woo, ti saalum bɔna bu puan, ti ya mina yan wan lebehe nɛra woo se'em.

Ba'ahegɔ pu'uhegɔ

⁷ Takikuse wan yele ya mam yɛla woo. A dela nɔŋerɛ suuɔ, sakerɛ yameŋa, gee me dɛna mam da'aberɛ tadaana Daana la puan.

⁸ Mam tum en ya zi'an na la dina wa zuo, ti ya mina tumam ani se'em, gee me kpemehe ya suya.

⁹ A kini me na la Onesimuse, en de sakerɛ daana, tu suuɔ ti tu nɔŋɛ, a dela yamam ayima. Ba wan yele ya sɛla woo en iti ka'lam.

¹⁰ Aristakuse ti ba lagum pagɛ la mam la pu'uheri ya na, bala mɛa ti Maki en de Banabase taya bia la, se'em ti tu yɛta ya a yele wa me pu'uha ya na. A han wa'am ya zi'an na, to'e ya en suŋa.

¹¹ Yezu se'em ti ba yi'ira Yusetuse la pu'uhi ya na. Bana ma'a en de sɛba n ŋma bɔna mam tuntuneba tadaanduma la puan Yinɛ sɔ'ɔlum tuuma la puan. Bana en de sɛba en bugelɛ mam suure.

¹² Epafaras, en de ya ayima la, dɛna Kiresta [Yezu] da'aberɛ pu'uhi ya na. A mɛɛrɛ saŋa woo pu'uhegɔ puan ya zuo, ti ya wan ze'ele bi'ɛ suŋa, gee ka bu'ura ya suure puan la Yinɛ sumboolum en de se'em.

¹³ Mam tɔgɛ a yele mɛ, doohe en mu'ɛ nini tuna se'em bɔ'ɔra yamam la sɛba en boi Laodisiya la Hirapolise tihi puan la.

¹⁴ Luki en de sunɔŋerɛ tiba la, la Demase pu'uhi ya na.

¹⁵ Pu'uhi ya n suurɔ seto en boi Laodisiya la, gee pu'uhɛ ya tu taya Nyimfa, la lageŋɔ la en boi a yire la.

¹⁶ Ba han ta kãalɛ gɔŋɔ wa bo' ya ba'ahɛ, bahɛ ya ti ba kãalɛ kɔ bo' lageŋɔ la en boi Laodisiya tiŋa puan la me, gee la ya me kãalɛ gɔnseko en gulehɛ bo' Laodisiya tiŋa lageŋɔ la me.

¹⁷ Gee me yele Akipus yeti, “Bihɛ suŋa la fum ba'ahɛ tuunse'ere ti fum to'e Daana zi'an la.”

¹⁸ Mam Pɔɔl en gulehɛ pu'uhegɔ wa la n mɛŋa nu'o. Tɛri ya mam boi paka deen la. Zu'uhegɔ bɔna la ya.