Kolɔsɩ 3 - ZE'ELEGO PAALEGA

Kiresta puan vompaalum

¹ Bala, la han dɛna ti ya vo'e mɛ la Kiresta, ye eere ya yele sɛ'a en boi tinsuŋan ha la, zi'an ti Kiresta zi'a Yinɛ zuɔ nu'o bɔba la.

² Bahɛ ya ti ya puti'ira bɔna la yele sɛ'a en boi tinsuŋan ha la, dagi yele sɛ'a en boi timpaberɛ wa zuo,

³ se'ere en sɔi la, ya ki mɛ, ti ya vom la sugɛ la Kiresta puan, Yinɛ puan.

⁴ Kiresta en de ya vom la han ta niiɛ na, yamam me wan lagum niiɛ la en, la na'ahegɔ.

⁵ Bala zuo, ku ya sɛla woo en boi ya puan dɛna tiŋa dinɛ zuo bunɔ wuu, yaluntuuma, dɛgerɔ tuuma, kunkoma'ahum, be'em kɔrehi, la nyika (en de baga kaabegɔ la).

⁶ Yele ana wa zuo ti Yinɛ sunsunyiim yɛ'a sɛba en ka nane la zuo na la.

⁷ Wunse'eren ha la, Yele ana mɛa ti yamam me yuum ita, yan yuum nan vɔi vom bumɔ taaba la.

⁸ Gee nananawa, la dela ya bahɛ yele aŋa woo, sunsunyiim, putuulum, nɛreba yu'ura sageŋɔ, kɛhega yetɔgum da zɛ'ɛta ya nɔya puan.

⁹ Da pareni ya bɔ'ɔra taaba, yan diŋɛ yɛɛ naanɛ kɛka la, la de itegɔ la,

¹⁰ gee yɛ ya naanɛ paalega la pi' ya mɛhi, naanɛ se'ere en teere de mɛŋa saŋa woo ti de baŋɛ de Naana la mi'ilum la paaɛ paaɛ.

¹¹ Teere dina puan la, Giriki ka boi ti Yuda bɔna; sɛba en ŋma ka boi, ti sɛba en ka ŋma bɔna; nɛreyooro ka boi ti nɛreyaalehi bɔna; da'aba ka boi ti sɛba en boi fai bɔna. Gee Kiresta en de za'a gee bɔna ba za'a puan.

¹² Wuu Yinɛ en looe ya la, ti ya dɛna tuulum nɛreba ti a nɔŋɛ la, bagɛ mɛhi la ya nɛreba giile, itesuŋɔ, sigehe mɛa, ma'ma', la sudi'ihego

¹³ Ŋmiberi ya la taaba, ti se'em han tara se'ere la a tadaana, di ya sugeri bo' taaba. Wuu Daana la en di sugeri bo' yamam se'em la, bala mɛa ti ya me suna ti ya di sugeri bu taaba.

¹⁴ Se'ere en gani za'a dela, bagɛ ya mɛhi la nɔŋerɛ, sɛla en bobere ya lagena taaba, ti ya tara nɔyinɛ sunɛ la taaba en bala.

¹⁵ Gee me bahɛ ti Kiresta suma'ahum pirɛ ya suya, yele se'ere zuo ti ba yi' ya na pa'ahɛ inganɛ deyina lageŋɔ la puan en bala. Gee la ya me bo'ori Yinɛ fara.

¹⁶ Bahɛ ya ti Kiresta yelehum la bɔna ya puan seke. Pa'ali ya gee ka'ana taaba la yɛm, gee ti nyɛɛma en boi ya suya puan la, tari ya saaŋɔ la baaŋa, la Sia puan yuuma ya suya puan bɔ'ɔra Yinɛ.

¹⁷ Gee ti sɛla woo ti ya ita, la dɛna tugum bii tuuma, iti ya sɛla woo Daana Yezu yu'urɛ la puan, bɔ'ɔra Yinɛ en de Sɔ la fara dɔla Yezu puan.

Kiresta kɔma yiya puan ze'elego

¹⁸ Pɔgeba, sigeha ya mɛhi bɔ'ɔra ya sireba, wuu lan nari se'em Daana dɔlega puan la.

¹⁹ Sireba, nɔŋɛ ya pɔgeba, gee de makɛ iti ya ba vɛgela vɛgela.

²⁰ Kɔma, nane ya ya dɔgereba yele se'ere woo puan, gee yele dina en tigeri Daana la nini.

²¹ Sɔduma, da nyiiha ya kɔma suya gee bala wan bahɛ ti ba sia yehe ya.

²² Da'aba, nane ya sɛba en sɔi ya tiŋa zuo wa la sɛla woo puan, dagi la ban boi ya nɛŋan la ma'a, ti ya ita ti ba puurɛ, gee ita ya bala la ya suure za'a, la Daana la zoolum.

²³ Fum tuunɛ en de se'ere woo la, dikɛ fum mɛŋa bo' de wuu fum tuni bɔ'ɔra la Daana la gee dagi fum pee asaala puurɛ,

²⁴ yan diŋɛ mina ti Daana la puan ya wan ta to'e tɔtɛ ti la dɛna ya yɔɔrɛ la. Ya tuni bɔ'ɔra la Daana Kiresta la.

²⁵ Se'em en ka tuni sɛla en de ma'a la ba wan lebehe yɔ en sɛla woo ti a ka tum ma'a la, ti lugehego ka bɔna.