Kolɔsɩ 2 - ZE'ELEGO PAALEGA

¹ Mam boti ya baŋɛ mam mu'ɛ nini tuna se'em ya zuo, la sɛba en boi Laodisiya, la ya sɛba za'a en pun ka nyɛ mam la nini.

² Mam boti ba suya nyɛ la kpemehego, naaɛ taaba nɔŋerɛ puan, gee nyɛ bɔkerɛ se'ere en gani za'a, tara tibehum, gee me tara mi'ilum doohe Yinɛ sugelum yele la en de Kiresta a mɛŋa la.

³ La dela Kiresta puan ti yɛm la mi'ilum tarega za'a bɔna.

⁴ Mam yeti ŋwana la dela, nɛra da pa'ahɛ ya la nɔmaalum.

⁵ La mam en ka boi la ya ingɔŋɔ puan bilam la, gee n boi la ya sia puan, gee nyɛɛna, bɔta ti n nyɛ yan ze' se'em kankaŋi la ya sakerɛ Kiresta puan.

Vom za'a boi la Kiresta puan

⁶ Wuu yan to'e Kiresta Yezu en de Daana la, kelum vɔni ya ya vom la a puan,

⁷ ba' ya nyɛga, gee mɛ ya mɛhi yagelɛ a zuo, gee sɛ' ya ze'ele kankaŋi sakerɛ la puan, wuu ban pa'alɛ ya se'em la, pirɛ yabera la fara bu'a.

⁸ Bihɛ ya suŋa ti nɛra da dikɛ ya da'aba doohe gɔŋɔ wogerɔ la pã'aheyooro doohe asaala malema, la sɛse'ehi en sɔi timpaberɛ wa bihera la, gee dagi Kiresta en boti se'em la.

⁹ Se'ere en sɔi la, eŋa Kiresta en de Yinɛ naanɛ de mɛŋa de mɛŋa en niiɛ inganɛ puan na.

¹⁰ Yamam n wa'am a zi'an na wa, sɛla woo wan ze'ele tuuntɔɔ bo' ya. Eŋa en de se'em en de zuo daana, sɔna pahi, la kpe'eŋo za'a.

¹¹ Eŋa puan ti ba ŋma yamam me sia puan ŋmaa, yan wan ŋmaaɛ ni ya ingɔŋɔ la zi'an bahɛ ni la, ya ŋmaa dɛ la Kiresta ŋmaa la puan.

¹² Ban daa laaɛ ya la Kiresta ko'om sua puan la, ba daa lagum vo'e ya mɛ la en ya sakerɛ puan,Yinɛ paŋa la puan, Yinɛ se'em en vo'e en kum puan la.

¹³ Yan daa ki ya tuure puan, ya ingɔŋɔ la en ka ŋma la puan la, Yinɛ bahɛ ti ya vo'e mɛ la en, eŋa en daa di tu za'a tuure sugeri bo' tu.

¹⁴ Saalum gulehegɔ seko en daa gulehɛ gã'a gura tɔ, la ku namehegɔ seko en nari tu la. A daa uue ku bahɛ la kinkɛleŋa ha, kpa' kɔ pumpuuredɔɔ la zuo.

¹⁵ A yɛɛhɛ pahi duma la kpe'eŋo mɛ, gee diihe ba nyanɛ peelumen, nyaŋɛ ba za'a za'a pumpuuredɔɔ la zuo.

¹⁶ Bala la, da bahɛ ya ti se'em zɛregɛ ya doohe dia bii nyua bii kiha dabeha, bii ŋmarehi paalehi, bii de'eŋo bii vo'ohego dabeha.

¹⁷ Bana wa daa dela yele sɛ'a n wan wa'am na la yinyiligo, gee Kiresta en de yelemɛŋerɛ la.

¹⁸ Da bahɛ ti nɛra sigehe fum, doohe eŋa en boti se'em doohe sigehe n mɛŋa yooro, suŋereba pu'uhegɔ, zaaheŋɔ yɛla, banaduma ukeri mɛ la asaala puti'irɛ la pa'alɛ mɛŋa,

¹⁹ gee ka gi' Kiresta en de zuo la ti iŋa la za'a nyɛta diihum, gee naaɛ taaba doohe la a giila la innaanɛ la, zɔ'ɔra Yinɛ puan la.

Pumparum pa'aleba

²⁰ La han dɛna ti Kiresta puan, ya ki mɛ la pansɛka en sɔi tiŋa wa la, ŋwani ti ya vɔna wuu ya kelum dɛna la tiŋa wa zuo dinɛ la? Ŋwani ti ya nana malema en de,

²¹ “Da gurɛ, da lem, da kalum”?

²² Malema ana za'a tari bɔ'ɔra la sɛla en ni tum ta kuregɛ sagum. Ba yeen dɛna la asaala ze'elego la pa'alegɔ.

²³ Ba tari la naanɛ en ani wuu yɛm duma la, ba ta' zɛkera la ba mɛhi en boti se'em, sigehe n mɛŋa, ta'na nameha ba ihe, gee ba ka tari nyuurɔ bo' nɛra, la han wa'am yaalegɔ yɛla puan na.