Kolɔsɩ 1 - ZE'ELEGO PAALEGA

Pu'uhegɔ

¹ Mam Pɔɔl en de Kiresta Yezu tuntuna, doohe la Yinɛ suboolum, la tu suuɔ Timoti en gulehɛ gɔŋɔ wa.

² Tu gulehɛ bɔ'ɔra la nɛresunduma, la sakereba en de tu suurɔ Kiresta puan, bɔna Kolose tiŋa la. Zu'uhegɔ dɛna ya dinɛ, la Yinɛ en de tu sɔ la suma'ahum.

Pɔɔl fara bu'a

³ Tumam en ni pu'uhera bɔ'ɔra ya la, saŋa woo tu kɔ'ɔm bɔ'ɔra Yinɛ en de tu Daana Yezu Kiresta Sɔ la la fara,

⁴ se'ere en sɔi la, tumam wum ya sakerɛ en ani se'em Kiresta Yezu puan, la nɔŋerɛ se'ere ti ya tara bɔ'ɔra nɛresunduma la za'a la,

⁵ beere putɛ'se'ere en boi saazuo gura ya la zuo. Ya pun tabelɛ wum beere putɛ' dina wa yele mɛ, gee baŋɛ wum yelemɛŋerɛ yelehum en de faarɛ yelehum la,

⁶ n wa'am ya zi'an na la. Woo bumɔ en wani wala gee zɔ'ɔra se'em tiŋa wa zuo za'a se'em la, bala mɛa ti bu wuna wala ya puan, pɔhɛ daan se'ere daarɛ ti ya wum, gee bɔkɛ Yinɛ zu'uhegɔ la.

⁷ Dina ti ya zamehɛ Epafaras zi'an, tu yameŋa tadaana, se'em ti tu nɔŋɛ la. A dela Kiresta yelemɛŋerɛ tuntuna ya zuo,

⁸ a bahɛ ti tu baŋɛ yan tari nɔŋerɛ Sia puan se'em.

⁹ Dina wa zuo, daan se'ere daarɛ ti tu wum dɛna wa la, tu ka go'e tu pu'uha bɔ'ɔra ya, gee suhera ti ya pirɛ la Yinɛ suboolum mi'ilum, la Sia puan yɛm woo, la bɔkerɛ woo,

¹⁰ ti ya vɔna vom sebo en nari bɔ'ɔra Daana la, ti ya vom za'a tigɛ a nini wuu yan wan wuna wala tuunsunɛ woo puan se'em la, la yan zo'ore Yinɛ mi'ilum puan se'em la.

¹¹ Ya kpe'em la paŋa sɛka woo en ze'ele Yinɛ paŋa puan na, ya dɛna sɛba en maahum ti ya ŋmibera sɛla woo puan la sugeri, gee nyɛɛna

¹² la pɛka bɔ'ɔra Sɔ la fara. Sɔ se'em en iŋɛ ya ti ya lagum tara tɔtɛ la nɛre sunduma la en boi niihum puan la.

¹³ Yinɛ faaɛ tu mɛ yehe lika paŋa puan bahɛ, gee tee dikɛ tu ki'ihɛ a Dayɔba'arɛ sɔ'ɔlum la puan,

¹⁴ se'em puan ti tu nyɛ faarɛ, la yele be'ero sugeri dia.

Kiresta Kpe'eŋo

¹⁵ Kiresta dela Yinɛ se'ere ti tu ka nyɛta wa naanɛ, kiima naaŋɔ wa woo puan.

¹⁶ Se'ere en sɔi la, eŋa puan ti sɛla woo en boi saazuo la timpaberɛ wa zuo naam. Sɛla ti tu nyɛta, la sɛla ti tu ka nyɛta, ba dɛna na'am, pahi, bihereba bii kpe'eŋo, sɛla woo naam doohe la eŋa puan, gee dɛna eŋa dinɛ.

¹⁷ Kiresta mɛŋa pun bɔna mɛ gee ti sɛla woo nyaa baŋɛ naam, eŋa puan ti naaŋɔ wa za'ana bɔna suŋa.

¹⁸ Eŋa en de zuo daana, lagehegɔ la puan. Eŋa en de pi'ileŋo, dɛna kiima kum vo'ore puan yia, ti a ta'am wa'am na dɛna yiadaana sɛla woo puan.

¹⁹ Eŋa puan ti Yinɛ nini tigɛ ti a za'a za'a bɔna a puan,

²⁰ eŋa ti Yinɛ nini tigɛ ti a doohe a puan dikɛ sɛla woo naaɛ taaba bo' a mɛŋa, sɛla woo en boi timpaberɛ wa zuo, bii saazuo, doohe la Yinɛ en iŋɛ suma'ahum doohe la a ziim la pumpuuredɔɔ la zuo la.

²¹ Wunse'eren ha la ya daa nan zaaɛ mɛ, gee dɛna dinduma ya puti'ira puan, tuna be'em tuuma la,

²² e a nyaa dikɛ ya naaɛ mɛ, doohe amɛŋa saala ingɔŋɔ kum la puan, ti a bahɛ ti tu dɛna tuulum nɛreba, ka tara dɛkɔ bii geere a nɛŋan,

²³ wuu ya han kelum gu'ura ya mɛhi suŋa, zɛ'a kankaŋi ya sakerɛ la puan, ka vuregera ya beere puti'irɛ se'ere ti faarɛ yelesuma la biŋe nuurɛ ti ya wum la, se'ere en muulɛ bo' bunvua en boi tiŋa wa zuo wa. Mam Pɔɔl dela se'em ti ba looe bo' faari yelesuma wa.

Pɔɔl suure boi Kolosiduma puan

²⁴ Nananawa, mam nyɛɛni mɛ n namehegɔ la puan yamam zuo, mam inganɛ wa puan, bahɛ ya ti n yele de ŋwana yeti, mam ba'aheri la namehegɔ seko en gee Kiresta namehegɔ la puan, a iŋa la en de lageŋɔ la zuo.

²⁵ Mam lebege la lageŋɔ la yameŋa, doohe la Yinɛ en bo' mam tuunse'ere ya zuo la, ti n bahɛ ti ya baŋɛ Yinɛ yelehum la suŋa suŋa,

²⁶ sɛla en sugɛ asaaleba zi'an yuuman yuuman, la buuri sahi puan ha, gee nyaa lilege bo' a tuulum nɛreba la.

²⁷ Bama ti Yinɛ looe ti a doohe ba puan bahɛ ti ba baŋɛ Yinɛ suŋa en zo'e se'em yele se'ere en sugɛ wa puan bo' sɛba en dagi Yuuduma la, yele wa dela Kiresta n boi ya puan, en de ya beere puti'irɛ la suŋa.

²⁸ La dela eŋa ti tu muula wa, ka'ana nɛra woo gee pa'ala nɛra woo yɛm puan, ti tu wan bi'ihɛ nɛra woo Kiresta puan.

²⁹ Dina zuo ti mam zigera la pansɛka woo ti a dikɛ iŋɛ mam puan la paŋa la inkpeŋere la.