Azudi 1 - ZE'ELEGO PAALEGA

Pu'uhegɔ

¹ Mam Yude en de Yezu Kiresta da'aberɛ la, dɛna Yemesi suuɔ la en gulehɛ bɔ'ɔra yamam sɛba ti Yinɛ yi' la, yamam sɛba ti Yinɛ en de Sɔ la nɔŋɛ, gee dikɛ ya sugɛ biŋe bo' Yezu Kiresta la.

² Nimbɔ'zɔrɛ, la suma'ahum, la nɔŋerɛ en ka tari makerɛ dɛna ya dinɛ.

Gɔŋɔ wa vuurɛ

³ N sunɔŋerɛ duma wa, wuu mam en ma'ɛ n mɛŋa maahena ti n gulehɛ faarɛ se'ere ti tu tara wa yele bo' ya na la, mam bihɛ ti la nari mɛ ti n gulehɛ yele ya ti, nɛra woo zabɛ a sakerɛ se'ere ti Yinɛ dikɛ bo' tu buyina la zuo.

⁴ Se'ere en sɔi la, nɛre be'ero tuseto en wa'am na zu gɛregɛ ya puan, nɛre sɛba ba'ahegɔ zi'an en boi sageŋɔ puan ban ka zoti Yinɛ la zuo, sɛba en tee Yinɛ zu'uhegɔ la ti ku dɛna yaalegɔ tuuma, ka nam tu kpɛ'ɛma ayima ma'a en de Daana Yezu Kiresta la.

Pumparum pa'aleba gakerɛ

⁵ Nananawa, n ba' bɔta mɛ ti n tiɛ ya yele dina wa, la yan pun mina de suŋa suŋa la. Ti, Daana se'em en yuum faaɛ nɛreba buyina za'a za'a yehe Igipiti nu'uhen la, pooren a yuum sagum ba puan sɛba en yuum ka nam en la mɛ.

⁶ Gee ti suŋereba sɛba me en yuum ka ze' ba zɛ'a zi'an, gee yuum bahɛ ba zɛ'a zi'an la, a bobe ba mɛ la bãhi dikɛ ba bahɛ lika kãtɛ puan gura gakerɛ dabehekãtɛ daarɛ la.

⁷ Bala mɛa ti Sodom la Gomora, la timbibehi la za'a en kaaɛ ba la me en yuum ani wuu bamam la, kɛ̃ yaluntuuma puan, bɔta buraa en gã' la taaba ti pɔgehi me gã'a la taaba la, dela sɛla en pa'alɛ nɛreba en nyɛ namehegɔ se'em bugum en diti ka kiŋera la puan.

⁸ Gee la bala za'a, bala mɛa ti zaahum zaaheneba wa galena ba ingɔŋɔ, ka nana kpɛ'ɛnduma, gee tuura saazuo pãkara duma.

⁹ Gee Yinɛ suŋereba nɛŋadaana Maikɛl en yuum ta zigera la Sagena la, ŋmɛ'ɛra nɔkpe'ene la en Moose iŋa zuo la, a yuum ka tu' en, bii sagum a yu'urɛ, gee a yuum yele en yeti, “Daana en tahɛ hɔ la.”

¹⁰ Gee nɛrebana wa tuurɛ la sɛla ti ba ka bɔkɛ, ti yele aŋa mɛa en Sagena ba. Ba ani mɛ wuu duhi la, ba ka zamehi sɛla.

¹¹ Yele boi ba zuo. Se'ere en sɔi la, ba dikɛ la Keen sore la, gee dikɛ ba mɛhi luhɛ Balaam tuure la en yuum de ligeri zuo la puan, ba bahɛ la yoo wuu Kuura pobiriga la en yuum iŋɛ en se'em la.

¹² Ba dela galeŋɔ ya nɔŋerɛ lageŋɔ la puan, ban diti la ya ti dabeem ka tara ba, gee ti ba yeen ɛɛra ba pirɛ ba puya ma'a la. Ba dela sagbama yooro en ka tari ko'om, ti sabeeo ziira ba kaara zi'an woo. Ba dela dɔwalega tiihi en ka tari wala la, ba ki la buyi', ba vuuɛ ba mɛ ta ta' la nyɛga.

¹³ Ba dela komi'ihe yooro, yɛhera ba nyanɛ fulenfuka na, ba dela ŋmarebibehi en kaari bura bura, sɛba ti lika kãtɛ gã'a gura ba wuuha.

¹⁴ Bana en bala ti Enɔki en de Adam buuri saŋa buyopɔi puan la yuum purɛ ba yele yeti, “Bihɛ ya, Daana la kini mɛ na la a tuulum nɛreba tuha pia,

¹⁵ ti a gakɛ sɛla woo, gee bahɛ ti nɛra woo nyɛ ban ka zoti Yinɛ gee tum tuunfi'iha sɛ'a taaba la, la yetɔge yooro seto taaba ti sɛba en ka zoti Yinɛ tɔgɛ la ba nɔya tuue Yinɛ la.”

¹⁶ Ba dela gɔgeleŋɔ duma, sɛba en nyɛti nɛreba tuure. Ba dole la ba mɛhi kunkoma'ahum, tɔgera ka du'ura, tara nɔmaalum la nɛreba, suŋera ba mɛhi ma'a.

Ninmu'urɛ kã'aŋɔ la Pɛka

¹⁷ Gee han dɛna yamam n sunɔŋerɛ duma wa, ya dela ya tɛra tu Daana Yezu Kiresta tuntuneba la en daa pun diŋɛ tɔgɛ se'em biŋe la.

¹⁸ Ba daa yele ya yeti, “Ba'ahegɔ saŋa, nɛre kɛhereba wan bɔna, dɔla ba mɛhi en ka zoti Yinɛ la kunkoma'ahum.”

¹⁹ La dela tiŋa zuo nɛrebana wa n ka tari Fa'a Sia la, n tari welehego kina ya puan na.

²⁰ Gee yamam n sunɔŋerɛ duma wa, mɛ ya mɛhi yagelɛ tuulum sakerɛ la zuo. Pu'uheri Fa'a Sia la puan.

²¹ Dikɛ ya mɛhi iŋɛ Yinɛ nɔŋerɛ la puan, gee la ya biha tu Daana Yezu Kiresta nimbɔ'zɔrɛ la en dole yɛ'a vom kamba'ahɛ puan la.

²² Gee zoti ya sɛba en bu'uri ba sakerɛ puan la nimbu'ɔ.

²³ Faaɛ ya basɛba bahɛ wuu ya tum la bugum puan zɛ ba fooe na la. Gee me tari ya Yinɛ zoolum nimbɔ'zɔrɛ bɔ'ɔra sɛba. Gee kiha ba futo ti ba yaluntuuma la galum la.

Sum ka'a

²⁴ Nananawa, se'em Daana en wan ta'am tara ya ti ya kan lu la, gee me iŋɛ ya ti ya zɛ'a filam ti dɛkɔ ka lama ya ya Daana la suŋa la nɛŋan, la nyɛɛma.

²⁵ Yinɛ deyina ma'a wa en de tu faara doohe Yezu Kiresta tu Daana puan la, sɔna na'ahegɔ la kpe'eŋo la paŋa la asɔeza'a, saŋa se'ehi en pun tabelɛ tole la, la nananawa, la wuuha wuuha. Taari.