Azã 7 - ZE'ELEGO PAALEGA

Yezu suurɔ ka nam bo' en

¹ Dina pooren, ti Yezu nyaa ɛɛra Galilii tiŋa puan. A ka boti a ɛɛra Yudiya tiŋa puan, se'ere n sɔi la Yuuduma la mu'ɛ la nini ɛɛra yɔ'ɔ ti ba ku en.

² Gee Yuuduma sugerɔ ti'an de'eŋo la wa pɔra mɛ.

³ Ti Yezu suurɔ la yele en yeti, “Bahɛ ka'lam gee kiŋɛ Yudiya, ti fum zahereba wa me ta nyɛ tuunsɛ'a ti fum tuna wa.

⁴ Se'ere n sɔi la, se'em ka boi bɔta ti a yu'urɛ yehe yiŋa gee sugera a tuuma. Fum han ita yele an, dikɛ fum mɛŋa pa'alɛ timpaberɛ wa.”

⁵ (Se'ere en sɔi la mɛŋa suurɔ la pun ka nam bo' n.)

⁶ Ti Yezu yele ba yeti, “Mam saŋa paaɛ paaɛ la nan ka paaɛ na, gee yamam saŋa kɔ'ɔm bɔna mɛ saŋa woo.

⁷ Tiŋa wa zuo ka yaaɛ yamam, gee ba yaaɛ mam mɛ, se'ere n sɔi la mam kɔ'ɔm dɛna la aze'nyɛ daana ti ba tuuma dela be'em.

⁸ Yamam mɛhi kiŋɛ de'eŋo la, gee mam, ka ye' bini, se'ere n sɔi la, mam saŋa paaɛ paaɛ la nan ka paaɛ za'a na.”

⁹ En tɔgɛ ŋwana bo' ba ba'ahɛ la, a yee la Galilii tiŋa dabeha fiiwa.

Yezu kiŋɛ sugerɔ ti'an de'eŋo la puan.

¹⁰ Yezu suurɔ la n tole de'eŋo la puan ba'ahɛ la, ti la iŋɛ dabeha fiiwa, ti eŋa me kiŋɛ bini bããlam, kɔ'ɔm ka niiɛ a mɛŋa bala, gee lan de se'em la dela a sugeri mɛ.

¹¹ Yuuduma la ɛɛra en mɛ de'eŋo la puan, sɔkera taaba yeti, “A boi la bɛ?”

¹² Ti gugeleŋɔ bɔna nɛrekuuŋɔ la puan Yezu yele. Ti sɛba yɛta ti, “A dela nɛresuŋɔ,” ti sɛba me yɛta ti, “Aayi, a pã'ahɛ la nɛrekuuŋɔ la.”

¹³ Gee la bala za'a se'em ka boi tɔgera vɔɔla, ban zoti Yuuduma la zuo.

¹⁴ De'eŋo la tiŋampuuŋan, ti Yezu yehe kiŋɛ kɛ̃ pu'uhegɔ yire la puan, ta pɔhɛ pa'ala.

¹⁵ Ti la iŋɛ Yuuduma la pakerɛ, ti ba yɛta yeti, “Buraa wa nyɛ mi'ilum buna la bɛ, gee ti ba ka makɛ zamehɛ en?”

¹⁶ Ti Yezu lerege ba yeti, “Mam pa'alegɔ wa dagi mam mɛŋa pa'alegɔ, gee se'em n tum mam na la.

¹⁷ Se'em woo n maahum ti a tum Yinɛ sumboolum, wan baŋɛ nyaa pa'alegɔ kuna wa ze'ele la Yinɛ zi'an na bii, mam tɔgeri la n mɛŋa puti'irɛ.

¹⁸ Sɛba n tɔgeri ba mɛhi puti'ira puan la eere la ba mɛhi na'ahegɔ, gee se'em n eere se'em daana n tum en na la na'ahegɔ, dela yelemɛŋerɛ daana, ti sɛla en de ŋmɛlema ka bɔna a puan.

¹⁹ “Dagi Moose n bo' ya pa'alegɔ la? Gee la bala za'a, ya se'em ka dole pa'alegɔ la. Beni zuo ti ya ɛɛra ya ku mam?”

²⁰ Ti nɛrekuuŋɔ la lebehe en yeti, “Fum tari la kulekpa'arega! Ani n eere ti a ku hɔ?”

²¹ Ti Yezu le lerege ba yeti, “Mam tum la daalehum buyina ma'a, ti la iŋɛ ya za'a pakerɛ.

²² Moose bo' ya la buraanɛ ŋmaa ze'elego. (La me pun dagena Moose n daa bo' gee ba gee ba yaabeduma), ti la dagena kihere ti ya ŋmata ya buraahi vo'ohego dabeherɛ la.

²³ Ba han ŋma buraa vo'ohego dabeherɛ ti la da galum Moose pa'alegɔ la, wani ti yamam iŋɛ suure la mam ti n tibɛ nɛra iŋa za'a vo'ohego daarɛ la?

²⁴ Da yeen gakeri ya sɛla ti ya nyɛ, gee gakeri ya la tuntɔɔnɛ.”

Ena wan dɛna Kiresta la?

²⁵ Ti Yerusalɛm nɛreba basɛba yɛta yeti, “Dagi buraa kana wa n bala ti ba ɛɛra ti ba ku ka la?

²⁶ Gee ti a zɛ'a ka'lam tɔgera fai ti se'em ka lakera nuurɛ? La dela nɛheduma wa za'a sirum baŋɛ mɛ ti eŋa n de Kiresta la?

²⁷ Gee la bala za'a, tu me yi mi' buraa kana wa en yehe zi'an me na. Gee Kiresta la han ta wa'am na, se'em kan mina en ze'ele zi'an na.”

²⁸ Ti Yezu kaahɛ bahɛ na en boi bini pa'ala pu'uhegɔ yire la puan la yeti, “Yamam mi' mam, la mam yehe zi'an na? Mam ka wa'an la n mɛŋa na. Gee se'em n tum mam na la dela yelemɛŋerɛ daana, ya me ka mi' en.

²⁹ Mam en mi' en, se'ere n sɔi la, mam ze'ele la a zi'an na. Eŋa n tum mam na.”

³⁰ Ti ba ɛɛra ti ba nyɔkɛ en, gee se'em ka dikɛ nu'o kalum en, se'ere n sɔi la a saŋa la ka paaɛ.

³¹ Gee la bala za'a, nɛreba zo'e zo'e nɛrekuuŋɔ la puan nam en mɛ, gee yɛta yeti, “Kiresta la han pun wan wa'am na, a wan tum la daalehum boni le gaŋɛ buraa kana wa n tum se'em wa?”

Ba tum la kpɛ'ɛnduma ti ba nyɔkɛ Yezu.

³² Ti Farasii duma la wum ti nɛreba la gugeleni yele ana wa bɔ'ɔra Yezu la, ti malema kiinduma la, la Farasii duma la tum pu'uhegɔ yire gureba basɛba, ti ba kiŋɛ ta nyɔkɛ Yezu.

³³ Ti Yezu nyaa yeti, “Mam wan bɔna la ya mɛ dabeha fiiwa, gee lebe se'em n tum mam na la zi'an.

³⁴ Ya wan ta ɛɛra mam, gee ya kan nyɛ mam. Mam me n ta bɔna zi'an la, ya kan ta'am wa'am na.”

³⁵ Ti Yuuduma la sɔkera taaba yeti, “Bɛha ti buraa wa maaheni ti ka kiŋɛ, ti tumam kan nyɛ en? A maaheni ti a kiŋɛ la tu nɛreba sɛba n kɛ'eri Giriki tihi puan ha la zi'an ta pa'ala ba bii?

³⁶ Eŋa n yeti, ‘Ya wan ta ɛɛra mam, gee ya kan nyɛ mam, la Mam n ta bɔna zi'an la, ya kan ta'am wa'am bini na la vuurɛ dela dini’?”

Vom ko'om kulaahi

³⁷ De'eŋo la ba'ahegɔ daarɛ la, dabehekãtɛ daarɛ la, ti Yezu boi bini, muulɛ la kukɛ'ɛŋa yeti, “Fum se'em woo ti ko'yuuro tara hɔ, wa'am n zi'an na.

³⁸ Fum se'em woo n nam mam, wa'am na nyu wuu lan gulehɛ se'em gɔŋɔ la puan yeti, ‘Se'em woo n nam, vom ko'om kulaahi wan tahɛ a suure puan bula na la.’ ”

³⁹ Yezu n yeti ŋwana la dela, Fa'a Sia la ti sɛba n nam en la wan to'e la. Saŋa kana wa puan la, ti Fa'a Sia la nan ka wa'am na se'ere n sɔi la, Yezu nan ka to'e a suŋa.

Nɛreba la welehi taaba

⁴⁰ Nɛreba la n wum yele ana wa la, nɛreba basɛba nɛrekuuŋɔ la puan yeti, “Ena sirum dela nɔtɔgeha la.”

⁴¹ Gee basɛba yeti, “Yelemɛŋerɛ, Kiresta la n bala.” Ti basɛba me soke yeti, “Kiresta la kan ze'ele Galilii na, bii a wan yehe la bilam na?

⁴² Gulehegɔ la puan la ka yeti, Kiresta la yeti a dɛna la Deviti yaaŋa, yehe Bɛtelehɛm tiŋa, ze'ele zi'an ti Deviti mɛŋa kɛ̃'ɛra?”

⁴³ Ti welegere sige nɛrekuuŋɔ la tiŋasuka, Yezu zuo.

⁴⁴ Ti basɛba bɔta ti ba nyɔkɛ en, gee se'em ka boi dikɛ nu'o kalum en.

Kpɛ'ɛnduma bumbu'um

⁴⁵ Ti pu'uhegɔ yire gureba la lebe malema kiinduma la, la Farasii duma la zi'an, ti ba soke ba yeti, “Ŋwani ti ya ka nyɔkɛ en?”

⁴⁶ Ti gureba la lerege ba yeti, “Wai, Nɛra ka tabelɛ tɔgɛ wuu ŋwana.”

⁴⁷ Ti Farasii duma la lebehe ba yeti, “Yelemɛŋerɛ tumam ka sakɛ ti a pa'ahɛ yamam me mɛ, bii a pa'ahɛ yamam me mɛ?

⁴⁸ Se'em boi kpɛ'ɛnduma bii Farasii duma wa puan nam bo' en?

⁴⁹ Gee nɛrekuuŋɔ wa, sɛba n ka mi' ze'elego la. Yinɛ nɔpɔrɛ en dole ba.”

⁵⁰ Ti Nikodemose se'em n tabelɛ kiŋɛ Yezu zi'an la, gee me bɔna ba puan la, soke ba yeti,

⁵¹ “Tu tiŋa wa ze'elego puan, tu ka gakeri nɛreba, gee ka wuna ba nuurɛ yetɔgum yia, la tu baŋɛ ban iti sɛla. Bii la dagi bala?”

⁵² Ti ba lerege en yeti, “Yelemɛŋerɛ fum me ka yehe Galilii na, bii fum yehe la bilam na? Ɛ' gɔnɔ la puan gee fum wan baŋɛ ti nɔtɔgeha ka boi wan yehe Galilii tiŋa na.”

Pɔka n tum kabohi

⁵³ [Ti ba za'a yiregɛ kule Ba yiya.