Azã 5 - ZE'ELEGO PAALEGA

Vo'ohego dabeherɛ tibegɔ

¹ Yele ana pooren ti Yuuduma malema de'eŋo kuyima saŋa paaɛ, ti Yezu kiŋɛ zom Yerusalɛm.

² Yerusalɛm puan la, nayaŋa kayima ti ba yi'ira ka piihi nayaŋa, ti bɔka gã'a ti ba yi'ira ka Heburu puan ti Bɛti-zata, tara bɔpagehi sinuu.

³ Zɛ'sina sinuu wa puan ti bã'duma kekeko, fɔɔhi, wɔbehi la kɔɔrenɔ ni wa'am na gã'a gura.

⁴ [Ba gã' gura la ko'om la ta gbirege. Se'ere n sɔi Daana Suŋera n ni makɛ saŋa wa'am na sige ko'om la puan gbirege bu, ti ba'ara sɛka woo n sige ko'om la puan yia, a bã'a ni bahɛ mɛ.]

⁵ Ti buraa kayima bɔna bini bɛ̃' yuuma pihitã la anii.

⁶ Yezu n nyɛ en ti a gã' bini gee me mina ti a bɛ̃' yuue mɛ la, ti a soke en yeti “Fum boti tibegɔ?”

⁷ Ti buraa wa lebehe en yeti, “Naa, Suŋera la ni han sige na damɛ ko'om la, mam ka tari se'em ni wan suŋɛ mam ti n lu ko'om la puan yia. Mam ni ta maahena la, ti ayima n pun lu bini.”

⁸ Ti Yezu yele en yeti, “Ihige kilum fum suŋɔ kiŋɛ.”

⁹ Bilam bilam ti buraa la nyɛ ka tibegɔ, vaaɛ ihige saazuo, kilum ka suŋɔ tu' kina. Yele dina wa iŋɛ la vo'ohego daarɛ puan.

¹⁰ Bala ti Yuuduma la yele buraa wa n nyɛ ka tibegɔ wa yeti, “Zina dela vo'ohego dabeherɛ, la dagi ma'a ti fum ziira suŋɔ.”

¹¹ Gee buraa wa lerege ba yeti, “Buraa sɛka n tibɛ mam la n yele mam ti, ‘Kilum fum suŋɔ la kina.’ ”

¹² Ti ba soke en yeti, “Buraa kani n bala yele fum yeti, ‘Kilum fum suŋɔ kiŋɛ la’?”

¹³ Buraa wa n nyɛ ka tibegɔ wa me ka mi' Yezu n de se'em. Ti Yezu me doohe nɛrekuuŋɔ la puan yehe.

¹⁴ Pooren ti Yezu ta nyɛ buraa wa pu'uhegɔ yire la puan, yele en yeti, “Bihɛ, fum ban'an la bahɛ ya. Da le tum be'em ti la tari sɛla n gani ŋwana le wa'an fum zuo na.”

¹⁵ Ti buraa wa kiŋɛ nyaa ta yele Yuuduma la yeti, la dela Yezu n daa tibɛ mam la.

¹⁶ Ŋwana zuo ti Yuda duma la ihige dɔla Yezu dɔlega, eŋa en tuni tuun-ana wa taaba vo'ohego dabeherɛ puan la.

¹⁷ Ti Yezu lerege ba yeti, “Mam Sɔ n tuni la, mam me tuni mɛ.”

¹⁸ Ŋwana zuo, ti Yuuduma wa malum mu'ɛ la nini ɛɛra ba ko' en, beni zuo, a ka galum la vo'ohego daarɛ kiha la ma'a, gee a galum mɛ la eŋa en yi'iri Yinɛ ti a mɛŋa Sɔ, tara a mɛŋa makera la Yinɛ la.

Dayua la paŋa

¹⁹ Ti Yezu yele ba yeti, “N yeti ya la yelemɛŋerɛ yelemɛŋerɛ wa, ti Dayua la kan ta'an tuna a mɛŋa tuuma, han dagena sɛla ti a nyɛ ti Sɔ la tuna la. Sɛla woo ti Sɔ la tuna la, bala mɛa ti Dayua la tuna.

²⁰ Sɔ la nɔŋɛ Dayua la mɛ, gee pa'ala en sɛla woo ti eŋa n de Sɔ la tuna. A me wan pa'alɛ en yele kãra n gani yele ana wa, ti la iŋɛ ya pakerɛ

²¹ La dela asira ti, wuu Sɔ la n ihigere kum bɔ'ɔra ba vom se'em la, bala mɛa ti Dayua la me bɔ'ɔra nɛreba vom en boti se'em.

²² Sɔ la mɛŋa ka gakeri nɛra, gee a dikɛ gakerɛ paŋa la za'a bo' la Dayua la,

²³ ti bala ti nɛra woo wan na'aha dayua la wuu ban na'ahɛ Sɔ la se'em la. Fum se'em woo n ka na'ahɛ Dayua la, ka na'ahɛ sɔ se'em n tum en na la.

²⁴ N yeti ya la yelemɛŋerɛ yelemɛŋerɛ wa. Se'em woo n wum mam yelehum wa, gee nam se'em daana n tum mam na la, tari la vomkanba'ahɛ. Ena daana ka boi gakerɛ puan. A daana tee mɛ kum puan wa'am vom puan na.

²⁵ “N yeti ya la yelemɛŋerɛ yelemɛŋerɛ wa ti, saŋa kini na, ka pun paaɛ, ti ki'induma wan wum Yinɛ dayua wa kua, ti sɛba n wum wan vɔna

²⁶ Wuu sɔ la mɛŋa n tari vom a puan se'em la, bala mɛa ti a bo' Dayua la me sore ti a tara vom a puan,

²⁷ gee me kelum bo' Dayua wa paŋa ti a gakɛ, se'ere n sɔi la, a dela Asaala Dayua.

²⁸ Da bahɛ ya ti la iŋɛ ya pakerɛ la yele ana, gee saŋa la kini na ti sɛba ti ba pi' ba yɔɔrɔ puan wan wum Dayua la kua,

²⁹ ihige ba yɔɔrɔ la puan yehe na, ti sɛba n tum sum wan vo'e ihige kɛ̃ vomkanba'ahɛ puan, ti sɛba n tum be'em me vo'e ihige kɛ̃ namehegɔ puan.

Yezu Aze'nyɛduma

³⁰ “Mam ka tuni tuunɛ n ma'a. Mam n wum se'em la, mam gakeri dɔla la bala mɛa. Bala zuo, mam gakerɛ la dela tuuntɔɔ se'ere n sɔi la, mam ka tuni n mɛŋa sumboolum, gee se'em n tum mam la sumboolum.

³¹ Mam han muula n mɛŋa yele, n muulegɔ la kan dɛna asira.

³² Ayima n boi ha muula mam yele, ti mam me mina ti en tɔgeri n yele se'em la dela yelemɛŋerɛ.

³³ Ya daa tum nɛreba mɛ Yɔn zi'an, ti Yɔn me yele ya yelemɛŋerɛ la.

³⁴ Mam yeti sɛla wa dagi la mam to'ere la asaala aze'nyɛ yetɔgum, gee mam yeti ŋwana la yamam nyɛ faarɛ.

³⁵ Yɔn n daa bala ana wuu butolila la, dita niira, ti ya daa maahum ya suya ti ya lagum nyɛɛm a bugum la puan dabeha ayi.

³⁶ Gee mam tari la yelehum n gani Yɔn. Tuunsɛ'a ti n Sɔ dikɛ bo' mam ti n tum ba'ahɛ la, tuun aŋa ti n tuna wa. Ŋwana wa pa'alɛ mɛ ti, Sɔ la n tum mam na.

³⁷ Mam Sɔ se'em n tum mam na la mɛŋa pun tɔgɛ mam yele mɛ. Yamam ka tabelɛ wum a kua bii ya nyɛ a naanɛ,

³⁸ ya me ka tari a yelehum la ya puan se'ere n sɔi la, ya ka nam se'em ti a tum na la.

³⁹ “Ya viiheri pa'alegɔ gɔnɔ la puan la daare woo, se'ere n sɔi la ya ti'ihɛ ti vom kamba'ahɛ yɛla n boi bini, gee gɔnɔ tuna mɛa n bala tɔgera mam yele la.

⁴⁰ Gee la bala za'a ya zagehɛ mɛ ti ya kan wa'an mam zi'an na la ya nyɛ vom la.

⁴¹ Mam ka eere nɛreba na'ahegɔ.

⁴² Gee mam mi' ya ti ka tari Yinɛ nɔŋerɛ ya puan.

⁴³ Han dɛna mam, mam wa'am la n Sɔ yu'urɛ puan na, gee ya ka to'e mam. Gee se'em han wa'am a mɛŋa na, ya to'ore en mɛ.

⁴⁴ Ya yeti ya iŋɛ la wani nam mam. Ya han tɔ'ɔha taaba na'ahegɔ, gee ka ɛɛra la ninmu'urɛ, na'ahegɔ seko n ze'eti se'em ma'a n de Yinɛ la zi'an na la?

⁴⁵ Da ti'ihɛ ya ti mam n wan ta ze'ele Sɔ la nɛŋan zɛregɛ ya. Se'em n zɛregɛ ya dela Moose, se'em ti ya dikɛ ya puti'irɛ delum la.

⁴⁶ Ya han sirum nam ni Moose, ya wan nam ni mam. Se'ere n sɔi la, Moose gulehɛ la mam yele.

⁴⁷ Gee ya han ka nam Moose n gulehɛ sɛla la, ya yeti ya iŋɛ la ŋwani nam mam yeti ya sɛla wa?”