Azã 20 - ZE'ELEGO PAALEGA

Yezu ihigere

¹ Bulika yu'uŋɔ yu'uŋɔ,Dabeha ayopɔi pɔhega daarɛ, ti la nan ka yilegɛ ba'ahɛ, ti Mɛɛri Magedalin wa'am yɔɔ la puan, nyɛ ti ba yehe tansɛka n dikɛ yu' yɔɔ la nuurɛ la mɛ.

² Ti a zɔ kiŋɛ Simɔn Pita, la Yezu zahera ayima la, se'em ti Yezu ba' nɔŋɛ la, zi'an ta yele ba yeti, “Ba dikɛ Daana iŋa la yɔɔ la puan mɛ. Tu me ka mi' ban tari en ta biŋe zi'an.”

³ Ti Pita la Yezu zahera ayima la yehe yɛ'ɛha yɔɔ la puan.

⁴ Ti ba bayi' la zɔta, ti a yima la zɔ gaŋɛ Pita wa'am na paaɛ yɔɔ la puan yia.

⁵ Paaɛ suure bihɛ yɔɔ la puan ha, nyɛ ti tanɛ pɛɛlega la n dikɛ ni pɔ̃bɛ kum la, ga' yɔɔ la puan ha, gee a ka kɛ̃ yɔɔ la puan.

⁶ Ti Simɔn Pita me paaɛ pooren na, tole kɛ̃ yɔɔ la puan, nyɛ ti tanɛ pɛɛlega la ga' mɛ,

⁷ Ti tanɛ se'ere n dikɛ vile Yezu zuo la me ka gã'a lɛm tanpɛɛlega la, gee de me kilum de mɛŋa gã'a la kinkɛleŋa ha.

⁸ Pooren ti Yezu zahera se'em n zɔ paaɛ yɔɔ la puan yia na la, me kɛ̃ yɔɔ la puan ha, me nyɛ bala mɛa, gee nam.

⁹ Gee ŋwana ma'a wa la, ti ba ka bɔkɛ gulehegɔ la n yeti, a wan ihige a kum puan la.

¹⁰ Ti zahereba wa lebe kule ba yiya.

Yezu Niiɛ a mɛŋa pa'alɛ Mɛɛri Magedalin

¹¹ Gee Mɛɛri Magedalin yee zɛ'a la yɔɔ la yiŋa kɛla. En kele la, ta suure bihɛ yɔɔ la puan ha,

¹² nyɛ ti suŋereba bayi' yɛ fupɛɛla, zi'an zi'an ti Yezu iŋa ga' ni la, ayima zi'an a zuin bɔba, ti ayima zi'an a nama bɔba

¹³ Ti ba yele en yeti, “Pɔka wa, beni ti fum kɛla?” Ti a yele ba yeti, “Ba dikɛ n Daana iŋa la mɛ, n me ka mi' ban dikɛ ka ta biŋe zi'an.”

¹⁴ En yele ŋwana ba'ahɛ la, a ŋmɛregɛ mɛ, ti Yezu n bala zɛ'a bini, gee a ka baŋɛ ti Yezu n bala.

¹⁵ Ti Yezu soke en yeti, “Pɔka wa, beni ti fum kɛla? Fum eere la ani?” Ti pɔka la ti'ihɛ ti a dela va'am la daana, nyaa yele en yeti, “Naa, la han dɛna la fum n dikɛ iŋa la, pa'alɛ mam fum malum biŋe ka zi'an, ti n kiŋɛ ta dikɛ ka kiŋɛ.”

¹⁶ Ti Yezu lerege en yeti, “Mɛɛri” Ti a ŋmɛregɛ yele en Heburu yetɔgum puan yeti, “Araboni!” (De vuurɛ dela pa'ala).

¹⁷ Ti Yezu yele en yeti, “Da nan gi' mam, se'ere n sɔi la n nan ka zom sɔ la zi'an. Gee kiŋɛ ta yele n suurɔ la yeti, ‘N yeti n kiŋɛ la n sɔ la n de ya sɔ la, la mam Yinɛ la n de ya Yinɛ la zi'an.’ ”

¹⁸ Ti Mɛɛri Magedalin zɔ kiŋɛ ta muulɛ bo' Yezu zahereba la yeti, “Mam nyɛ Daana la.” Gee yele ba en yele en sɛla woo la.

Yezu niiɛ a mɛŋa bo' a zahereba

¹⁹ Dabeha ayopɔi pɔhega daarɛ zaanuurɛ, ti Yezu zahereba la lagehɛ bɔna yire deyima puan, gee yu' yire la nayahi za'a, dabeem n tari ba Yuuduma la zuo. Ba ta yeti ba bihɛ ti Yezu kɛ̃ na zɛ'a la ba, pu'uhɛ ba yeti, “Suma'ahum bɔna la ya.”

²⁰ En pu'uhɛ ba ŋwana ba'ahɛ la, a tiɛ la a nu'uhi pa'alɛ ba, gee pa'alɛ ba a lugerɛ la me. Ti a dɔleba la nyɛɛna la ban le nyɛ Daana la.

²¹ Ti Yezu yele ba yeti, “Suma'ahum bɔna la ya. Wuu sɔ la n tum mam na se'em la, bala mɛa ti mam me tuna ya.”

²² En yele ba ŋwana ba'ahɛ la, a pebele la sabeeo tuule ba, gee yele ba yeti, “To'e ya Fa'a Sia la.

²³ Ya han bahɛ se'em woo be'em bo' en, la dela bala bo' a daana. Ya han ka bahɛ se'em be'em bo' en, la dela bala mɛa bo' a daana.”

Yezu la Tɔmasi

²⁴ Gee ŋwana woo la, ti Tɔmasi (se'em ti ba yi'ira liiberɛ la), dɛna Yezu zahereba la ayima la, daa ka boi la ba, Yezu wa'an ba zi'an na la.

²⁵ Bala zuo, zahereba bana la en ta yele en yeti, “Tumam nyɛ Daana la mɛ la.” A yele ba yeti, “Han dagena ti mam nyɛ la kpa'ahi yiha la a nu'uhen, la n dikɛ n nu'dibila doohe kpa'ahi la yiha la, gee le dikɛ n nu'dibila sa'abɛ a lugerɛ la ti kanɛ la daa lu' la, Mam kan nam.”

²⁶ Ti la le paaɛ dabeha ayopɔi, ti Yezu zahereba la le lagehɛ yire la puan, ti Tɔmasi bɔna bini. Ti ba yu' yire la kulehi la za'a. La ban yu' kulehi, Yezu wa'am me na, zɛ'a la ba, gee yele ba yeti, “Suma'ahum bɔna la ya.”

²⁷ Gee nyaa yele Tɔmasi yeti, “Dikɛ fum nu'dibila doohe n nu'o wa puan bihɛ, gee tiɛ fum nu'o doohe n lugerɛ wa. Da bu'ura, gee nam.”

²⁸ Ti Tɔmasi lerege en yeti, “Mam Daana la mam Yinɛ.”

²⁹ Ti Yezu yele en yeti, “Fum nyaa nam ya la fum nyɛ mam la zuo?” “Sum boi mɛ la sɛba n ka nyɛ gee kelum nam.”

Gɔŋɔ kuna wa tuunɛ.

³⁰ Yezu tum nyalema mɛ kekeko a zahereba la ninin, ti ba ka gulehɛ yele aŋa pa'ahɛ gɔŋɔ wa puan.

³¹ Gee ba gulehɛ yele ana wa, ti la bahɛ ti fum wa'am na nam ti, Yezu n de Kiresta la, Yinɛ Dayua la. Ti naŋa la puan, ya wan tara vom a yu'urɛ la puan.