Azã 2 - ZE'ELEGO PAALEGA

Kana pɔgedire

¹ Dabeha atã puan ti pɔgedire bɔna Kana en boi Galilii sɔ'ɔlum puan, ti Yezu ma kiŋɛ bini.

² Ba me tum yi' Yezu la a zahereba la mɛ, ti ba me bɔna pɔgedire de'eŋo la puan.

³ Pɔgedire daam la en ta ba'ahɛ la, ti Yezu ma wa'am na waaɛ en yeti, “Ba daam la ba'ahɛ mɛ.”

⁴ Ti Yezu lerege en yeti, “Pɔka wa, bala pakɛ fum la mam la ŋwani? Mam saŋa nan ka paaɛ.”

⁵ Ti a ma la yele tuntuneba la yeti, “Iŋɛ ya sɛla woo ti Yezu wan yele ya.”

⁶ Bala ma'a la ti dugerɔ kãra tuyoobe en ze' zi'an la puan, dɛna Yuuduma malema ko'om sua dugerɔ, ti dukɔ woo ko'om wan paaɛ yɔkãra pihiyi' yɛ'ɛha pita' ko'om.

⁷ Ti Yezu bo' tuntuneba la nuurɛ yeti, “Akɛya ko'om pirɛ dugerɔ wa.” Ti ba akɛ ko'om pirɛ dugerɔ la ta paaɛ nuuren na.

⁸ Ti a yele ba yeti, “Nyaa kabegɛ ya ko'om la ta bo' se'em en biheri de'eŋo la yɛla la.” Ti ba kabegɛ ko'om la ta bo' en.

⁹ Ti se'em en biheri de'eŋo wa yɛla la en lem ko'om la en nyaa lebege daam la, a ka baŋɛ daam bumɔ en ze'ele zi'an na (gee tuntuneba la en kabegɛ ta bo' en la mi'). Ti se'em en biheri de'eŋo wa yi' pɔgedita wa na,

¹⁰ yele en yeti, “Nɛra woo ni tugum tɔrɛ la daam sumɔ la yia, gee ti pooren ba nyaa dikɛ daam be'ero toŋe, bala ma'a ti saama la han nyu tigɛ, gee fum tugum dikɛ ni daam sumɔ la ze'ele mɛ, tara tara la ŋwana ma'a.”

¹¹ Yezu en tum dina wa. A yia daalehum n ŋwana, Kana n boi Galilii sɔ'ɔlum puan la, niiɛ a suŋa, ti a zahereba la nam en.

¹² Dina n tole la, ti Yezu kiŋɛ Kapɛnum, la a ma, a suurɔ, la a zahereba la, ti ba ta kɛ̃ bilam dabeha fii wa.

Yezu zabɛ Pu'uhegɔ Yire la zuo

¹³ Yuuduma azɔɛtole malema la wa pɔra mɛ, ti Yezu kiŋɛ Yerusalɛm.

¹⁴ Ti pu'uhegɔ yire la puan, ti Yezu nyɛ ti nɛreba tari nii, piihi la dayɛma kɔɔha, ti sɛba me zi'a ba teebula zuto tɛɛhena ligeri.

¹⁵ Ti Yezu pi'ihe mi'ihi maalɛ kpa'aherɛ, sa'ahɛ sɛba woo en iti ŋwana Pu'uhegɔ yire la puan la bahɛ yiŋa, la ba piihi, la ba nii la. Gee ka'ahɛ lige tɛɛhereba la lige kuba la bahɛ;

¹⁶ Gee yele sɛba en koohere dayɛma la yeti, “Tari ya bana wa yehe ka'lam. Da dikɛ ya mam Sɔ yire wa lebege da'a.”

¹⁷ Bilam ti a zahereba la tiɛ yeti, la gulehɛ bɔna ze'elego la puan yeti, “Fum yire wa nɔŋerɛ en kuuri mam.”

¹⁸ Ti Yuuduma la soke en yeti, “Fum tari la daalehum boni ti fum pa'alɛ se'ere zuo ti fum ita ŋwana wa?”

¹⁹ Ti Yezu lerege ba yeti, “Gbi' ya Pu'uhegɔ yire wa bahɛ, gee n wan lebehe mɛ dɛ ze'ele dabeha atã puan.”

²⁰ Ti Yuuduma wa yele en yeti. “Bihɛ, yire wa mɛa dikɛ la yuuma pihinaahi la ayoobe, ti fum yeti fum wan lebehe mɛ dɛ dabeha atã?”

²¹ Gee Yezu dikeri la a mɛŋa iŋa, makera la Pu'uhegɔ yire la

²² En nyaa wa ihege a kum la puan la, ti a zahereba la tiɛ ti a tabelɛ tɔgɛ tugum wa, ti ba malum nam gulehegɔ la, la yelehum la ti Yezu tɔgɛ bo' ba la.

²³ Yezu en daa ta bɔna Yerusalɛm azɔɛtole de'eŋo saŋa la, nɛreba zo'e zo'e en daa nam bo' a yu'urɛ la, doohe la daalehum sɛ'a ti a tuna la.

²⁴ Gee Yezu daa ka dikɛ a mɛŋa bo' ba, se'ere en sɔi la, a mi' asaala woo en ani se'em mɛ,

²⁵ dagi se'em en wan yele en se'em yele. A mi' sɛla en boi nɛra woo puan mɛ.