Azã 11 - ZE'ELEGO PAALEGA

Yezu vo'e Lazarus kum puan

¹ Buraa kayima n wa lu bã'a, ti ka yu'urɛ yi'ira Lazarus, yehe Bɛtani timpaberɛ, timbila sɛka n de Mɛɛri la a suuɔ Maata timpaberɛ la puan.

² Mɛɛri kana n tabelɛ dikɛ tuulum kaam ka'ɛ yeele Yezu nama, dikɛ a zonto viilum kaam la Yezu nama la. Pɔge kana wa n bala ti ka taya dɛna Lazarus bɛ̃'ɛra wa.

³ Ŋwana ti pɔgehi wa en de suurɔ wa tum sɔɔleŋa bo' Yezu yeti, “Daana, se'em ti fum nɔŋɛ la bɛ̃'ɛri mɛ.”

⁴ Gee Yezu n wum sɔɔleŋa wa la, a yeti, “Ba'an wa kan ku kum, gee ka tugum wan bo' la Yinɛ pɛka, ti Yinɛ dayua wa doohe bini nyɛ pɛka.”

⁵ Lan de se'em la dela, Yezu nɔŋɛ Maata la a suuɔ (Mɛɛri) la Lazarus mɛ,

⁶ gee en wum sɔɔleŋa la ti Lazarus bɛ̃'ɛri mɛ la, a yee la eŋa n boi zi'an la dabeha ayi'.

⁷ Pooren, ti Yezu yele a zahereba la yeti, “Bahɛ ya ti tu lebe ya Yudiya tiŋa le yɛ'ɛha.”

⁸ Ti a zahereba la yele en yeti, “Rabi, daarɛ wa ti Yuuduma daa zigera ti ba lobe fum la kuga la, ti fum le yeti tu kiŋɛ bini?”

⁹ Ti Yezu lerege ba yeti, “Dagi gogo kaareŋa pia la ayi' n ni dɛna wuntɛɛŋa? Sɛba n kini niihum saŋa la ka ŋmɛ'ɛri nama, se'ere n sɔi la, ba nyɛti timpaberɛ wa zuo niihum la.

¹⁰ Gee sɛba duma n kini yu'uŋɔ la, ŋmɛ'ɛri la nama, se'ere n sɔi la, niihum la ka boi ba puan.”

¹¹ Ti en yele ŋwana ba'ahɛ la, a yele ba yeti, “Tu zɔ Lazarus gã' giha mɛ, gee mam ye' la bini ti n ta niiɛ en.”

¹² Ti a zahereba la yele en yeti, “Daana, a han giha, se'ere ka daani en.”

¹³ Gee Yezu tɔgeri la Lazarus kum n bala, gee bamam ti'ihɛ ti a yeen tɔgera la gɔɔm yele.

¹⁴ Ti Yezu nyaa anregɛ bo' ba yeti, “Lazarus ka boi.

¹⁵ Gee yamam zuo, la ani mam suŋa la mam n ka boi bini ha wa. Ŋwana ti ya wan nam. Gee yeen bahɛ ya ti tu kiŋɛ a zi'an.”

¹⁶ Ti Tɔmasi se'em ti ba yi'ira liiberɛ la yele a zahereba taaba la yeti, “Bahɛ ya ti tu doohe en kiŋɛ, ta lagum kɔ'ɔm ki la en.”

Yezu n de se'em n ihigere kum, gee dɛna vom

¹⁷ Yezu n ta paaɛ Yudiya tiŋa la, a wum ti ba pi' Lazarus la dabeha anaahi zina.

¹⁸ Bɛtani timpaberɛ wa ka zaaɛ la Yerusalɛm, la ani wuu miila ayi' la,

¹⁹ ti Yuuduma timpaberɛ nɛreba zo'e zo'e wa'am na ti ba lagum pã'ahɛ Maata la Mɛɛri, ba taya kum la puan.

²⁰ Maata n wum ti Yezu kini na la, a yehe tu'uhɛ en mɛ sore, gee ti Mɛɛri yee yire.

²¹ Ti Maata yele Yezu yeti, “Daana, fum daa han boni ka'lam, mam taya wa kan ki ni.

²² Gee la nananawa wa me, mam mi' ti fum han soke Yinɛ sɛla woo, a wan bo' fum.”

²³ Ti Yezu yele en yeti, “Fum taya la wan vo'e a kum la puan.”

²⁴ Ti Maata lebehe Yezu yeti, “Mam mi' ti a wan ta vo'e la ihigere daarɛ la n de ba'ahegɔ daarɛ la.”

²⁵ Ti Yezu yele en yeti, “Mam n de ihigere la, la vom la. Se'em n nam mam, la han pun ki, gee ba wan vo'e,

²⁶ ti se'em woo n vɔi gee nam mam kan malum ki. Fum nam dina wa?”

²⁷ Ti a yele Yezu yeti, “Ɛ̃ɛ n Daana, mam nam ya ti fum de Kiresta la, Yinɛ dayua la, se'em n wan wa'an timpaberɛ wa zuo na la.”

Yezu kuunɔ

²⁸ Maata n tɔgɛ ŋwana ba'ahɛ la, a kɛ̃ mɛ ta waahum bo' Mɛɛri a suuɔ la ma'a bããlam yeti, “Pa'ala la boi ka'lam gee yi'ira hɔ.”

²⁹ Mɛɛri n wum bala la, a ihige kalam kiŋɛ la Yezu zi'an.

³⁰ Bala ma'a ti Yezu nan ka kɛ̃ timpaberɛ la puan na, gee a kelum bɔna la zi'an ti Maata tu'uhɛ en la.

³¹ Ti Yuuduma la n wa'am na zi'an yire la puan pã'aha Mɛɛri la n nyɛ ti a ihige bala kalam yɛ'a la, ti ba me ihige dɔla a poore tɛ'ɛha ti a ye' la yɔɔ la puan ti a ta kele.

³² Ti Mɛɛri wa'am na paaɛ zi'an ti Yezu bɔna la, nyɛ Yezu, kpa' duma Yezu nɛŋan, gee yele en yeti Naa, “Fum daa han boni ka'lam, mam taya wa kan ki ni!”

³³ Yezu n nyɛ ti Mɛɛri kɛla la, ti Yuuduma sɛba me n doohe Mɛɛri poore na la me kɛla la, ti la ve'e Yezu paaɛ paaɛ.

³⁴ Ti a soke yeti, “Ya biŋe en la bɛ?” Ti ba yele en yeti, “Daana, wa'am na bihɛ.”

³⁵ Ti Yezu kele.

³⁶ Ti Yuuduma la basɛba yɛta taaba yeti, “Bihɛ en nɔŋɛ Lazarus se'em?”

³⁷ Gee ti basɛba me yeti, “Eŋa se'em n daa pikɛ fua nini la, kan ta'am gu' ni ti buraa wa da ki ni?”

Yezu vo'e Lazarus kum puan

³⁸ Ti la le ve'e Yezu, ti a kiŋɛ paaɛ yɔɔ la zi'an, ti ku dela yoko, ti ba bilege taŋa lige ku nuurɛ la.

³⁹ Ti Yezu bo' nuurɛ yeti, “Bilege ya kugere la yɔɔ la nuuren.” Ti Maata n de Lazarus wa n ki wa taya ayima la, yele Yezu yeti, “Daana, la wan ba' fi'ira, se'ere en sɔi la, ban pi' en, dabeha a naahi n ŋwana zina.”

⁴⁰ Ti Yezu yele en yeti, “Mam ka yele fum ti fum han nam, fum wan nyɛ Yinɛ paŋa n ani se'em?”

⁴¹ Ti nɛreba la bilege kugere la. Ti Yezu gorege tɔ saazuo gee yeti, “N sɔ, mam bo' fum fara, la fum n kelehe mam.

⁴² Mam mi' ti saŋa woo, fum kelehe mam mɛ, gee n yeti ŋwana wa la nɛrekuuŋɔ wa n ze' ka'lam wa zuo, ti ba ta'am nam ti fum n tum mam na.”

⁴³ En tɔgɛ ŋwana ba'ahɛ la, a tahɛ mɛ la kukɛ'ɛŋa yeti, “Lazarus, yehe na.”

⁴⁴ Ti buraa wa n ki wa vaaɛ ihige yehe na, ti a nu'uhi la a nama bobe la tama, ti tanɛ bobe a zuo. Ti Yezu yele nɛreba la yeti, “Lorege ya en bahɛ ti a kiŋɛ.”

Ba zigeri ti ba ku Yezu

⁴⁵ Ti Yuuduma la n doohe la Mɛɛri yehe tu'uhɛ Yezu la, n nyɛ Yezu en iŋɛ sɛla woo la, ti ba zo'e zo'e nam Yezu.

⁴⁶ Gee ti ba puan basɛba me kiŋɛ Farasii duma la zi'an ta yele ba sɛla woo ti Yezu iŋɛ.

⁴⁷ Ti malema kiinduma la, la Farasii duma la yi' kiinduma lagehɛ ti ba sɔhɛ. Nyaa yele ba yeti, “Tu yeti tu iŋɛ la wani la buraa wa? Ka ba' tuna la daalehum zɔ'ɔra.

⁴⁸ Tu han bahɛ en ti a ita ŋwana yɛ'a ha, nɛra woo wan nam en, ti bala me wan bahɛ ti Aromduma wa'am na gbirege tu tuulum yire wa, la tu timpaberɛ wa bahɛ.”

⁴⁹ Gee ba puan, ayima yu'urɛ n yi'iri Kaifase, dɛna malema kiima yuum dinɛ puan la, n yele ba yeti, “Ya ka mi' sɛla la fii me.

⁵⁰ Ya ka mi' ti la ani suŋa ti nɛreyinɛ ki bo' nɛrekuuŋɔ, gana timpaberɛ la nɛreba za'a n ki.”

⁵¹ A daa ka yele dina wa la a mɛŋa paŋa, gee en de malema kiima la yuum dinɛ puan la, ti a purɛ ti Yezu wan ki bo' timpaberɛ la,

⁵² dagi bamam timpaberɛ la ma'a, gee ba lagehɛ sɛba woo n de Yinɛ kɔma, yiregɛ la wa'am bɔbeyinɛ na.

⁵³ Yehe daan dinɛ daarɛ, Yuuduma kiinduma wa daa ku la nuurɛ ti ba ku Yezu.

⁵⁴ Bala zuo la, Yezu ka le ɛɛra bala fai Yuuduma la puan, gee a bahɛ a timpaberɛ la mɛ, gee kiŋɛ timpaberɛ kayima ti ba yi'ira Efraim n boi goo bɔba ha la, ta bɔna bilam la a zahereba la.

⁵⁵ Ti Yuuduma azɔɛtole de'eŋo la pɔra, ti nɛreba zo'e zo'e yehe timbibehi puan yɛ'ɛha Yerusalɛm ti ba ta pee ba mɛhi gee gura azɔɛtole de'eŋo la.

⁵⁶ Ti nɛreba la ta ɛɛra Yezu, gee nyaa sɔkera taaba pu'uhegɔ yire la puan yeti, yamam ti'ihɛ la ŋwani? “A wan sakɛ wa'am de'eŋo wa puan na, bii a wan kan sakɛ?”

⁵⁷ Bala ma'a la, ti malema kiima duma la, la Farasii duma la pun bo' la nuurɛ yeti, Fum se'em woo n nyɛ Yezu zi'an, fum yele tu, ti tu nyɔkɛ en.