Azã 10 - ZE'ELEGO PAALEGA

Yezu n de piihi la dunkiinsuŋa

¹ “Mam yeti ya la yelemɛŋerɛ, yelemɛŋerɛ ti se'em woo n ka doohe nayaŋa puan kɛ̃ piihi zɔŋɔ la puan, gee doohe la ze' sɛka sige, dela nageyiga, la se'em n faari.

² Se'em n doohe nayaŋa puan kɛ̃ la n de piihi la dunkiina.

³ Nayangura la ni yu'ɛ bo' en mɛ ti a kɛ̃. A piihi la wuni a kua mɛ. A yi'ire a mɛŋa piihi la mɛ yu'ura, bɔna si nɛŋa tara si yɛha.

⁴ A han tari si yehe na, a boi la nɛŋa ti si dɔla en, se'ere n sɔi la, piihi la mi' a kua mɛ.

⁵ Piihi la kan doohe saana, si tugum wan zɔ mɛ gee bahɛ en se'ere n sɔi la, ba ka mi' saana la kua.”

⁶ Yezu dikɛ la tɔgɛ biŋere buna wa tɔgɛ bo' ba, gee nɛreba la ka bɔkɛ en yeti ba sɛla la.

⁷ Ti Yezu le yele ba yeti, “N yeti ya la yelemɛŋerɛ yelemɛŋerɛ'e wa, Mam n de piihi la nayaŋa.

⁸ Sɛba woo n diŋɛ mam nɛŋa na la dela nageyigehi, la fãareba, ti piihi la ka kelehe ba.

⁹ Mam n de nayaŋa la, se'em woo n doohe mam zi'an kɛ̃ wan nyɛ faarɛ. A wan kɛ̃, gee yehe ta nyɛ yaama obe.

¹⁰ Nageyiga ye' na yoo gee a ye' na ti a zu mɛ, gee ku, gee sagum. Gee han dɛna mam, mam wa'am na ti ba nyɛ la vom, vom sebo en seke yabera .

¹¹ “Mam dela dunkiinsuŋa la. Dunkiinsuŋɔ la dikeri la a vom biŋera bɔ'ɔra a piihi.

¹² Gee se'em ti ba dikɛ la, ti a dagena piihi la dunkiina la, ka sɔna piihi la, han nyɛ ti saheŋa kini na, a bahɛ piihi la mɛ gee zɔ, ti saheŋa la wa'am na nyɔgɛ piihi la gee yiregɛ si bahɛ.

¹³ Se'em ti ba dikɛ la n wan zɔ la dela, piihi la yele ka pakɛ en.

¹⁴ Mam n de dunkiinsuŋɔ la. Mam mi' sɛba n de n dinɛ, ti mam dinɛ la me mina mam,

¹⁵ wuu Sɔ la n mi' mam ti mam me mina Sɔ la se'em la. Mam dikɛ n vom mɛ biŋe bo' n piihi la.

¹⁶ Mam tari n piihi sise'ehi mɛ ti si ka bɔna piihi zɔŋɔ wa puan. N wan ba'ahum ɛ si na ti si me wum n kua. Ti piihi la za'a dɛna buyina, dunkiina ayima.

¹⁷ Dina wa zuo ti Sɔ la nɔŋɛ mam la, mam n maahum ti n dikɛ n vom biŋe gee le dikɛ bɔ la.

¹⁸ Nɛra kan ta'am dikɛ mam vom wa, gee mam mɛŋa n dikɛ bu biŋera, mam boti se'em. Mam tari paŋa ti n dikɛ n vom wa biŋe, gee tara paŋa ti n lebehe dikɛ bɔ. Mam sɔ la n bo' mam nuurɛ ti n wan ta'am iŋɛ bala.”

¹⁹ Ti Yuuduma la le welehi taaba yetɔgebuna wa zuo.

²⁰ Ti ba zo'e zo'e yɛta ti, “Kulekpa'bɛ'a n dole en, ti a zuo ka tuna. Wani ti tu wan zɛ'a kɛleha en?”

²¹ Ti basɛba me yɛta ti, “Yetɔgesebo ti a tɔgera wa dagi nɛra n tari kulekpa'bɛ'a yetɔgum. Kulekpa'bɛ'a wan ta'am pikɛ fua nini?”

Yuuduma zagehɛ Yezu

²² Saŋa kana wa puan la, ti pu'uhegɔ yire yu'urɛ de'eŋo la saŋa paaɛ mɛ Yerusalɛm puan. La wa dɛna ko'oro ŋmarega,

²³ ti Yezu kina kaara pu'uhegɔ yire la puan, zɛ'sɛka ti ba yi'ira Solomɔn paka la puan.

²⁴ Ti Yuuduma la lagehɛ taaba wa'am na kaaɛ en bahɛ tiŋasuka, sokere en yeti, “Fum boti tu gu'uhi ta paaɛ la wani? Fum han dɛna la Kiresta la, kɔ'ɔm tiɛ nɛŋa yele tu.”

²⁵ Ti Yezu lerege ba yeti, “Mam pun yele ya, gee ya ka nam. Tuunsɛ'a ti mam tuna a n Sɔ yu'urɛ puan la pa'alɛ mɛ mam n de se'em,

²⁶ gee ya ka nam, se'ere n sɔi la, ya ka pa'ahɛ mam piihi la puan.

²⁷ Mam piihi la wuni mam kua mɛ. Ti mam me mina si, ti si dɔla n poore.

²⁸ Mam bo'ori si la vomkanba'ahɛ, ti si kan malum bahɛ yoo. Se'em me ka boi wan ta'am zɛ piihi wa mam nu'en faaɛ.

²⁹ Mam Sɔ n bo' mam sɛla la n gani sɛla woo. Se'em ka boi wan ta'am faaɛ la Sɔ la nu'uhen

³⁰ Sɔ la, la mam dela buyina.”

³¹ Ti Yuuduma wa le pi'ihe kuga ti ba lobe en.

³² Ti Yezu yele ba yeti, “Mam tum la tuunkãra zo'e zo'e ya ninin n Sɔ la yu'urɛ puan. Yele ana wa dinɛ zuo ti ya yeti ya lobe mam wa?”

³³ Ti Yuuduma la lerege en yeti, “La dagi la fum tuunsunɛ se'ere zuo, gee tuurɛ la. Beni zuo, fum wa n kɔ'ɔm dɛna asaala gee dikera fum mɛŋa lɛbegera Yinɛ la zuo.”

³⁴ Ti Yezu soke ba yeti, “La ka gulehɛ bɔna ya pa'alegɔ la puan yeti, ‘Mam yeti, ya dela yina’?

³⁵ Ti a han yi'ira sɛba ti a dikɛ Yinɛ yelehum wa'am ba puan na ‘yina,’ ti tu me kan ta'am sagum gulehegɔ la,

³⁶ wani ti ya wan ta'am yeti, ‘Mam se'em ti Sɔ la bi'ihe mam, gee tum mam timpaberɛ wa zuo na la tuurɛ la Yinɛ la mam yeti, mam dela Yinɛ dayua la’?

³⁷ Mam han ka tuna la n Sɔ la tuuma, da nam ya bo' mam.

³⁸ Gee mam han tuna a, ti ya pun ka nam bo' mam, nam ya tuuma la, la ya ta'am mina, gee baŋɛ ti Sɔ la boi mɛ la mam, ti mam me bɔna la Sɔ la.”

³⁹ Ti ba maahum ti ba le nyɔkɛ en, ti a pee ba nu'uhen.

⁴⁰ Ti a le kiŋɛ yakɛ Yɔɔdan kulega la, zi'an ti Yɔn yuum bɔna sɔɔra nɛreba ko'om la, ta bɔna bilam.

⁴¹ Ti nɛreba zo'e zo'e wa'an a zi'an na gee yɛta taaba yeti, “Yɔn yuum ka tuni daalehum, gee sɛla woo ti yele doohe buraa wa puan za'a dela asira.” ’

⁴² Ti nɛreba zo'e zo'e nam bo' Yezu bilam.