Azã 1 - ZE'ELEGO PAALEGA

Vom yelehum la

¹ Pi'ileŋo puan na la, ti se'em en de Yelehum la pun bɔna mɛ. Yelehum wa boi mɛ la Yinɛ, gee ti Yelehum wa dɛna Yinɛ.

² Yelehum buna wa boi mɛ la Yinɛ pi'ileŋo puan na.

³ Sɛla woo en boi wa, naam doohe la eŋa puan. Han dagi eŋa puan, zugɔ la ayima me ka boi sɛla woo en boi wa puan, wan boni.

⁴ Eŋa puan ti vom bɔna, vom buna wa en de niihum bo' timpaberɛ wa nɛreba za'a.

⁵ Niihum wa niiri baha la lika la puan, ti lika la kan ta'am lile bɔ.

⁶ Buraa kayima ti Yinɛ daa tum ka, ti ka yu'urɛ yi'ira Yɔn.

⁷ Buraa kana wa wa'am na dɛna la Aze'nyɛ daana, ti a dɛna aze'nyɛ daana bo' niihum la, ti nɛra woo doohe eŋa puan sakɛ.

⁸ Yɔn mɛŋa yuum dagi niihum la, gee wa'am na ti a dɛna la aze'nyɛ daana bo' niihum la.

⁹ Yelemɛŋerɛ niihum la en niiri bɔ'ɔra nɛra woo la en ye' timpaberɛ wa zuo na.

¹⁰ A pun bɔna timpaberɛ wa zuo mɛ na, ti timpaberɛ wa naam doohe la eŋa puan. Gee la bala za'a, timpaberɛ wa zuo nɛreba ka mi' en.

¹¹ A wa'am la sɛla en de a mɛŋa bunɔ puan na, gee a mɛŋa nɛreba la ka to'e en.

¹² Gee sɛba woo en to'e en la, sɛba en sakɛ bo' a yu'urɛ la, bamam ti a bo' ba paŋa ti ba dɛna Yinɛ kɔma.

¹³ Bama sɛba dɔgum en yeen dagena ziim en lagum taaba dɔgum, bii inganɛ boolum, bii asaala suboolum puan, gee Yinɛ suboolum puan.

¹⁴ Ti se'em ti ba yi'ira Yelehum wa, ta lebege asaala, bɔna la tɔ, ti tu nyɛ a suŋa, sunsɛka en pa'ali ti a dela Sɔ dayɔba'arɛ, pirɛ la zu'uhegɔ, la yelemɛŋerɛ.

¹⁵ Yɔn en yuum tɔgeri Yelehum wa yele la, a yuum kaahɛ bahɛ me na la kɔkɛ'ɛŋa yeti, “Ena en bala ti mam tɔgɛ a yele yeti, ‘Nɛra ayima n boi mam pooren, gee gana mam, se'ere en sɔi la, a pun bɔna mɛ na gee ti mam nyaa wa'am na.’ ”

¹⁶ Eŋa en seke paaɛ paaɛ la, nɛra woo wan nyɛ zu'uhegɔ, malum nyɛ zu'uhegɔ.

¹⁷ La de asira ti Ze'elego la doohe la Moose puan na, gee zu'uhegɔ, la yelemɛŋerɛ ze'eti la Yezu Kiresta puan na.

¹⁸ Nɛra nɛra ka tabelɛ nyɛ Yinɛ. Gee la dela Yinɛ biba'arɛ la, en de Yinɛ la bɔna a Sɔ la suure la en dikɛ en pa'alɛ.

Yɔn en tɔgɛ Yezu yele se'em

¹⁹ Yɔn en yele se'ere en iŋɛ n ŋwana, Yuuduma la en tum malema duma la Levi duma ze'ele Yerusalɛm na ti ba soke en yeti, “Fum dela ani la?”

²⁰ Yɔn yele ba mɛ, ka zagehɛ, gee kɔ'ɔm yele ba yelemɛŋerɛ yeti, “Mam dagi Kiresta la.”

²¹ Ti ba soke en yeti, “Gee fum nyaa dela ani? Fum dela Elia?” Ti a lerege ba yeti, “Aayi mam dagi.” “Gee fum dela nɔtɔgeha?” Ti a yeti, “Aayi.”

²² Ti ba soke en yeti, “Gee fum dela ani?” Lerege tɔ se'ere ti tu tari lebe ta bo' sɛba en tum tu na la. Fum mɛŋa ti'ihɛ ti fum dela ani?

²³ Ti a yele ba yeti, “Mam dela kua sɛka en boi kpaahenɛ puan kaahera baha na yeti, ‘Maalɛ ya Daana la sore la tuuntɔɔ,’ ” wuu nɔtɔgeha Azaaya en purɛ se'em la.

²⁴ Farasiiduma la en tum nɛreba wa na.

²⁵ Bala ti ba le soke Yɔn yeti, “Gee beni ti fum sɔɔra nɛreba wa ko'om gee dagena Kiresta la, bii Elia, bii nɔtɔgeha?”

²⁶ Ti Yɔn lerege ba yeti, “Mam sɔɔri mɛ la ko'om wa. Gee ya puan, nɛra ayima boi la ya ti ya ka mina en,

²⁷ se'em en wan wa'am mam pooren na la. Mam pɔ'ɛ mɛ ti n lorege a tagera.”

²⁸ Yele dina wa iŋɛ la Bɛtani timpaberɛ, Yɔɔdan kulaa la yakenɛ ha ti Yɔn bɔ'ɔra nɛreba ko'om sua la.

Yinɛ Pebila la

²⁹ Yiimbeere ti Yɔn nyɛ ti Yezu kini tɔɔra en na, ti a muulɛ yeti, “Bihɛ ya,Yinɛ Pebila la n ŋwana, se'em n to'e timpaberɛ wa zuo be'em la!

³⁰ Eŋa en bala ti mam wa yɛta a yele yeti, ‘Nɛra ayima en dole mam pooren, gee gana mam, se'ere en sɔi la, a pun bɔna mɛ na, gee bo' mam la.’

³¹ Mam mɛŋa ka mi' en, gee mam wa'am na bɔ'ɔra ko'omsua wa la dela, n niiɛ en pa'alɛ Iziraleduma wa.”

³² Ti Yɔn yele pa'ahɛ yeti, “Mam nyɛ mɛ ti Fa'a Sia la ana wuu dayene la, ze'ele saazuo ha sigera na, wa yagelɛ a zuo.

³³ Mam mɛŋa la ka mi' en, gee se'em en tum mam na ti n bo' nɛreba ko'omsua la en yele mam yeti, ‘Se'em ti fum nyɛ ti Fa'a Sia la sige na yagelɛ a zuo la, eŋa en de se'em n sɔɔri nɛreba la Fa'a Sia la.’

³⁴ Mam mɛŋa nini en nyɛ, gee ti n yɛta ya wa, ti eŋa en de Yinɛ dayua la.”

Yezu yia zahera

³⁵ Ti yiimbeere, ti Yɔn le zɛ'a la a zahereba bayi',

³⁶ a yeti a bihɛ, ti Yezu en bala dɔla tɔla, ti a muulɛ la kɔkɛ'ɛŋa yeti, “Bihɛ ya, Yinɛ pebila la en wa'am na.”

³⁷ Ti zahereba bayi' wa en wum ŋwana la, ihege doohe Yezu poore.

³⁸ Yezu en ŋmɛregɛ nyɛ ti ba dole a poore la, ti a soke ba yeti, “Ya boti la bem?” Ti ba lerege en yeti, “Rabi” (de vuurɛ dela Pa'ala), “Fum ki'ire la bɛ?”

³⁹ Ti Yezu lerege ba yeti, “Wa'am ya na baŋɛ mam ki'ire zi'an.” Ti ba doohe en ta baŋɛ en ki'ire zi'an la, bɔna la en dabeherɛ la za'a. Ŋwana wa iŋɛ la gogo anaahi zaanuurɛ bɔba.

⁴⁰ Ba bayi' la en wum ti Yɔn tɔgɛ, ti ba doohe Yezu la, ba ayima dela Anduru, Simɔn Pita suuɔ.

⁴¹ Eŋa en ta nyɛ se'em yia dela a suuɔ Simɔn, yele en yeti, “Tumam nyɛ Mɛzaaya la” (se'em ti ba lerege yeti, se’em ti ba bi'ihɛ la).

⁴² Ti a tari Simɔn wa'am Yezu nɛŋan na, ti Yezu bihɛ Simɔn zii, gee yele en yeti, “Fum yu'urɛ yi'iri la Simɔn, fum dela Yɔn dayua. Fum yu'urɛ nyaa wan yi'ira la Sefase” (de vuurɛ dela Pita).

Yezu yi' Filipi la Nataniyɛl

⁴³ Ti yiimbeere ti Yezu iŋɛ a puti'irɛ ti a kiŋɛ Galilii. Nyaa ta nyɛ Filipi yele en yeti, “Dɔla mam.”

⁴⁴ Filipi yehe la Bɛtesaada, tinkãtɛ sɛka ti Anduru la Pita yehe na la.

⁴⁵ Ti Filipi nyɛ Nataniyɛl, yele en yeti, “Tumam nyɛ se'em ti Moose tɔgɛ a yele pa'alegɔ gɔŋɔ la la nɔtɔgeheba gulehɛ a yele yeti, a dela Yezu, dɛna Yosefe dayua yehe Nazareti na la.”

⁴⁶ Ti Nataniyɛl soke Filipi yeti, “Bunsula boi wan ta'am yehe Nazareti na?” Ti Filipi yele en yeti, “Wa'ana ti fum nini nyɛ.”

⁴⁷ Yezu en nyɛ ti Nataniyɛl kini tɔɔra en na la, a yele en yeti, “Fum ka nyɛ, Izirale buuri paaɛ paaɛ n ŋwana, ti ŋmɛlema ka bɔna a puan.”

⁴⁸ Ti Nataniyɛl soke Yezu yeti, “Fum mi' mam la bɛha?” Ti Yezu lerege en yeti, “Mam nyɛ fum la se'em ma'a ti fum zi'a kinkaŋa la timpaberɛ gee ti Filipi wa'am na yi' fum la.”

⁴⁹ Ti Nataniyɛl lerege en yeti, “Rabi fum sirum dela Yinɛ dayua la. Fum en de Izirale naba la.”

⁵⁰ Ti Yezu soke en yeti, “Fum nyaa nam mɛ la mam yele fum ti mam nyɛ hɔ kinkaŋa timpaberɛ la zuo? Fum wan nyɛ yelekãra en gani ŋwana.”

⁵¹ Gee yele en yeti, “N yeti fum la yelemɛŋerɛ wa, ti fum nini wan ta nyɛ ti saazuo ha yu'ɛ, ti Yinɛ suŋereba sigera mam Asaala Dayua wa zi'an na, gee lɛbera zɔna.”