Aromduma 8 - ZE'ELEGO PAALEGA

Sia puan vom

¹ Bala zuo, nananawa, sageŋɔ ka boi sɛba en boi Kiresta Yezu puan la zuo.

² Beni zuo, ze'elego seko en boi Fa'a Sia la en de vom Kiresta Yezu puan la, faaɛ ya bahɛ la fai, ze'elego seko en tari be'em la kum la nu'uhen.

³ Se'ere en sɔi la, Yinɛ tum sɛla en daa kpe'em bo' ze'elego la ti ku ka nyaŋɛ tum, doohe la inganɛ wa en tari tɔregɔ la, a iŋɛ dina doohe la en tum a mɛŋa dayua ti ka tara inganɛ en ani wuu asaala be'em inganɛ wa, ti ka zabɛ be'em, sagum be'em paŋa, la inganɛ wa,

⁴ ti ze'elego la en boti yelemɛŋerɛ se'ere la tum tu puan suŋa suŋa, tumam sɛba en ka vɔi wuu tu inganɛ la en boti se'em, gee Fa'a Sia la en boti se'em la.

⁵ Sɛba en vɔi ba inganɛ en boti se'em la, dikɛ ba puti'ira delum la inganɛ wa yɛla, gee sɛba en vɔi Fa'a Sia la en boti se'em la, dikɛ ba puti'ira delum la Fa'a Sia la en boti se'em.

⁶ Fum dikɛ fu puti'irɛ delum inganɛ wa la dela kum, gee fum dikɛ fum puti'irɛ delum Fa'a Sia la dela vom, la suma'ahum.

⁷ Ŋwana zuo, puti'irɛ se'ere woo en dele inganɛ wa, zaberɛ mɛ la Yinɛ. De ka sigehe de mɛŋa la Yinɛ ze'elego la. Yelemɛŋerɛ, de pun kan nyaŋɛ sigehe de mɛŋa la Yinɛ .

⁸ Bala zuo, sɛba en dele ba inganɛ la kan ta'am tigɛ Yinɛ nini.

⁹ Gee yamam wa la ka boi inganɛ puan. Ya boi la Fa'a Sia la puan, Yinɛ Sia la han sirum bɔna la ya. Gee se'em woo en ka tari Kiresta Sia la a puan, dagi Kiresta dinɛ.

¹⁰ Gee Kiresta han bɔna ya puan, la ya ingana la en pun ki be'em zuo la, gee Sia la en bo'ori vom doohe tuntɔɔnɛ se'ere ti Yinɛ bo' tu la zuo.

¹¹ Se'em daana Sia en vo'e Yezu kum puan la han kɛ̃'ɛ̃ra ya puan, Se'em daana en vo'e Kiresta kum puan mɛa wan bo' ya vom ya ingana wa n wan ki wa puan , doohe a Sia la en kɛ̃'ɛ̃ri la ya la.

¹² Bala zuo, n sakereba taaba, tu tari la sanɛ, gee de dagi inganɛ wa sanɛ, ti la dɛna ti tu vɔna wuu inganɛ la en boti se'em.

¹³ Ya han vɔna inganɛ la en boti se'em la, ya wan ki. Gee ya han vɔna Fa'a Sia la puan, ku inganɛ tuuma la, ya wan vɔna.

¹⁴ Sɛba woo ti Yinɛ Fa'a Sia la gu'ura ba ti ba kina tuuntɔɔ la, en sirum de Yinɛ kɔma.

¹⁵ Ŋwana zuo la Ya ka to'e la Sia sɛka en bahɛ ti ya dɛna da'aba, le lu dabeem puan, gee ya to'e la Sia sɛka en bahɛ ti ya dɛna sɛba ti ba to'e ya bihera. Bala n bahɛ ti tu ni kaahɛ yeti “Aba” “Tu Sɔ suŋɔ.”

¹⁶ Fa'a Sia kana mɛa en de tu aze'nyɛdaana la tumam sia la, ti tu dela Yinɛ kɔma,

¹⁷ ti tu han dɛna Yinɛ kɔma, tu dela sɛba en wan sooe sɔna, tu dela Yinɛ kɔma wan sooe Yinɛ lɔgerɔ sɔna. Tu naaɛ mɛ la Kiresta sooe sɔna Yinɛ lɔgerɔ, tu han sirum namehɛ la en, tu me wan ta lagum nyɛ suŋa la en.

Beere Suŋa

¹⁸ Mam mi' n suure puan suŋa suŋa ti namehegɔ seko ti tu nameha saŋa kana wa puan wa la, ti ku dagi sɛla en wan dikɛ makɛ la sunsɛka en maahum ti ka niiɛ bo' tu na wa.

¹⁹ Timpaberɛ wa za'a ani la kɛli, gee gura Yinɛ kɔma wa niirɛ na.

²⁰ Timpaberɛ wa za'a bɔberɛ se'ere en ka tari vuurɛ puan wa, dagi la ka sumboolum, gee se'em n iŋɛ ka bala ti la zi'im wan ba'ahɛ suŋa,

²¹ ti timpaberɛ wa za'a wan faaɛ ka mɛŋa fai yehe ka bobere wa en ye' pu'urɛ puan wa, gee nyaa to'e Yinɛ kɔma suŋa fai bɔŋa wa.

²² Tu mi' ti timpaberɛ wa za'a uheri mɛ viregere too wa'am na paaɛ zina.

²³ Dagi la timpaberɛ wa ma'a, gee tumam mɛhi en tari Fa'a Sia didiina tu puan la me uheri mɛ puan ha, gee gura ti Yinɛ to'e tu bihera, gee bo' tu inganɛ wa faarɛ.

²⁴ Tu beere puti'irɛ zuo tu tari faarɛ. Puti'irɛ se'ere en diŋɛ niiɛ na, le dagena puti'irɛ. Se'ere en sɔi la, ani en tari putɛ'se'ere en diŋɛ niiɛ na?

²⁵ Gee tu beere puti'irɛ han dɛna la sɛla ti tu nan ka nyɛ, tu wan gura dɛ suŋa suŋa la sugeri.

²⁶ Bala mɛa ti Fa'a Sia la suŋera tɔ tu tɔregɔ puan, se'ere en sɔi la, tu ni pun ka mina tu wan suhɛ Yinɛ lan suni se'em, gee Fa'a Sia kaŋa mɛa en ni ŋmɛ'ɛra nupu'ɔ bɔ'ɔra tɔ, la si'iŋɔ kãra en gani yetɔgum.

²⁷ Ti Yinɛ en biheri suure puan la, mi' sɛla en boi Fa'a Sia la puti'iren mɛ, se'ere en sɔi la, Fa'a Sia la sooe ŋmɛ'ɛra la nupu'ɔ bɔ'ɔra nɛresunduma la, dɔla Yinɛ sumboolum.

²⁸ Tu mi ti sɛla woo tuni naara taaba tara la sum bɔ'ɔra la sɛba en nɔŋɛ Yinɛ, sɛba ti Yinɛ yi' doohe a puti'iren la.

²⁹ Se'ere en sɔi la, sɛba ti a pun mina la, a pun maahum ba ze'ele mɛ, ti ba tara a dayua la naanɛ, ti a dayua la ta'am dɛna zuodaana suurɔ kekeko puan.

³⁰ Sɛba ti a maahum ba ze'ele la, bamam ti a yi', ti sɛba ti a yi' la, a bo' ba la buurɔ, ti sɛba ti a bo' ba buurɔ la, bamam ti a pirɛ ba la suŋa.

Yinɛ nɔŋerɛ boi la Kiresta Yezu puan.

³¹ Bala zuo, beni ti tu wan yele, yele ana wa puan? Yinɛ han sɔna tɔ, ani en wan ta'am zabɛ tɔ?

³² Yinɛ se'ere en daa ka bahɛ a mɛŋa dayua, gee dikɛ ka tihɛ tumam za'a zuo la, a kan doohe a dayua mɛa puan bo' tu sɛla woo ti tu bɔta me yoi?

³³ Ani n wan ta'am tari se'ere na dɔgelɛ sɛba ti Yinɛ looe la zuo? La dela Yinɛ mɛŋa en bo' tu buurɔ.

³⁴ Ani en wan ta'am sagum tɔ? La dela Kiresta Yezu en ki, ɛ̃ɛ, se'em ti Yinɛ vo'e en la, ti a bɔna Yinɛ zuɔ nu'o la. Eŋa en sirum de nupu'ŋmɛ'ɛra bɔ'ɔra tumam.

³⁵ Ani en wan ta'am bɔkɛ tumam Kiresta nɔŋerɛ wa puan? Wuŋerɛ bii, susageŋɔ bii, namehegɔ bii, kom bii, beele bii, nyɔ̃pɔ̃hega bii sɔ'a?

³⁶ Wuu lan gulehɛ se'em la, “Yamam zuo, ba kuuri tumam la daare woo. Ba bihɛ nyɛ tumam ti tu ana mɛ wuu piihi ti ba tara yɛ'a kɔregerɛ la.”

³⁷ Gee yele ana woo puan, tumam gani nyaŋereba mɛ, doohe se'em daana en nɔŋɛ tu la puan.

³⁸ Se'ere en sɔi la, mam sakɛ n suure puan suŋa suŋa, ti kum bii vom, bii suŋereba, bii bihereba, bii sɛla n boi zina , bii sɛla n wan wa'am beere na, bii pahi,

³⁹ bii sɛla en boi zuin zuin ha, bii sɛla en boi tiŋa tiŋa ha, bii sɛla bɔna timpaberɛ wa zuo za'a wan ta'am bɔkɛ tumam Yinɛ nɔŋerɛ wa n boi Kiresta Yezu tu Daana puan wa.