Aromduma 6 - ZE'ELEGO PAALEGA

Ki gee ihege la Yezu

¹ Beni ti tu nyaa wan yele? Tu kɔ'ɔm kelum tuna be'em, ti la bahɛ ti zu'uhegɔ malum pa'aha?

² Sore ka boi bala la fii me! Ŋwani ti tumam sɛba en ka le bɔna be'em tuuma puan la, wan le lebena vɔna bu puan?

³ Ya ka mi' ti tumam sɛba woo en sɔ tɔ Kiresta Yezu puan la, ba sɔ tɔ ki'ihɛ la a kum la puan?

⁴ Bala zuo, ba pi' tu mɛ la Kiresta, doohe ban sɔ tɔ ki'ihɛ a kum la puan la, ti Kiresta en ihege kum la puan a Sɔ paŋa suŋa puan se'em la, bala mɛa ti tumam me wan kina la vom paalum.

⁵ Tumam han naaɛ la en mɛ a kum buna taaba wa puan, tu wan ba'ahum ta naaɛ la en a ihegere dina taaba wa me puan.

⁶ Tu mi' ti ba daa kpa' tu naanɛ kɛka la mɛ la Kiresta, ti tu be'em naanɛ la sagum, ti tu da le dɛna da'aba bo' be'em.

⁷ Se'ere en sɔi la, se'em woo en ki, boi la fai ti be'em ka le tana en.

⁸ Gee tumam han ki mɛ la Kiresta, tu nam ya ti tu me wan ta vɔna la en.

⁹ Tu mi' ti Kiresta en vo'e kum puan na la, kan le makɛ ki. Kum paŋa ka le ta'na en.

¹⁰ En ki kum sebo la, a ki keehe la be'em, buyina za'a. Gee vom sebo ti a vɔna wa, a vɔi bo' la Yinɛ.

¹¹ Bala, yamam me biha nyɛta ya mɛhi ti, ya ki keehe be'em mɛ, gee nyaa vɔna bo' Yinɛ Kiresta Yezu puan.

¹² Bala, da bo' ya fole, ti be'em sɔna ya ingana wa en ki la, ita ya ti ya nana ya kɔrehi la.

¹³ Da le dikɛ ya ingana la ze'sɛka bo' be'em, ti la dɛna be'em lɔkɔ tara tuna be'em tuuma. Gee tugum dikɛ ya mɛhi bo' Yinɛ, wuu nɛreba ti ba tari ya kum puan wa'am vom puan na la. Gee dikɛ ya ihe la bo' Yinɛ, ti si dɛna tuuntɔɔ vom tuuma lɔgerɔ.

¹⁴ Se'ere en sɔi la, be'em kan le sɔna ya, yan ka boi ze'elego la puan, gee bɔna zu'uhegɔ puan la.

Tuntɔɔ vom yamehi

¹⁵ Beni en gee? Tu tuna be'em ti tu ka dole ze'elego la, gee tu boi la zu'uhegɔ puan zuo? Sore ka boi la fii me!

¹⁶ Ya ka mi' ti ya han dikɛ ya mɛhi bo' se'em ti ya wan nana en, ya dela se'em ti ya nana la da'aberɛ? La dɛna be'em en tari ya yɛ'a kum puan, bii la dɛna naŋa en tari ya yɛ'a tuuntɔɔ vom puan.

¹⁷ Gee pɛka dɛna Yinɛ dinɛ, ti yamam sɛba en tabelɛ dɛna be'em da'aberɛ wa, nyaa dela sɛba en nane ya suya puan ha, doohe la pa'alegɔ seko taaba en dikɛ bo' ya la,

¹⁸ la yan nyɛ faarɛ be'em puan la, ya nyaa dela tuuntɔɔ vom da'aberɛ.

¹⁹ N tari la asaala yɛla mageha, ya bɔkerɛ en ka zo'e la zuo. Wuu yan tabelɛ dikɛ ya ihe wa lɔgerɔ bo' dɛgerɔ tuuma se'em la, malum galena kɛ̃'ɛ̃ra puan puan se'em la. Bala, nananawa, dikɛ ya ihe la za'a tihɛ, ti si dɛna da'aberɛ bo' tuuntɔɔ vom, ti Yinɛ pee ya.

²⁰ Yan daa de be'em da'aberɛ la, ya daa ka tari sɛla ita la tuntɔɔnɛ.

²¹ Bala, beni sum ti ya nyɛ yele sɛ'a en nyaa tari ya vi wa puan? Yele aŋa za'a ba'ahegɔ dela kum.

²² Gee nananawa ti ba nyaa faaɛ ya be'em puan bahɛ fai, gee ti ya dɛna Yinɛ da'aberɛ wa, sum sebo ti ya nyɛ dela sakerɛ. Ti de ba'ahegɔ dɛna la vom kamba'ahɛ.

²³ Se'ere en sɔi la, be'em yɔɔrɛ dela kum, gee Yinɛ zaŋa bo'olum la ti a bo' la, dela vom kan ba'ahɛ, Kiresta Yezu tu Daana la puan.