Aromduma 3 - ZE'ELEGO PAALEGA

¹ Ŋwana zuo la, beni yɔ'ɔ ti Yuda nɛra tara? Bii beni tuulum n boi ŋmaa puan?

² La zo'e mɛ zi'an woo. Yia dela, Yuuduma la en pɔhɛ to'e Yinɛ yele sɛ'a en sugɛ la.

³ Gee Yuuduma wa basɛba yuum han ka tara sakerɛ? Ban ka tari sakerɛ la wan gu' Yinɛ en tari sakerɛ se'ere la ba la me yoi?

⁴ Sore ka boi! La asaala woo n pun dɛna pumparema la, Yinɛ dela yelemɛŋerɛ daana wuu lan gulehɛ se'em la, “Bala ti fum wan tara buurɔ fum tugum puan, gee di mi'a gakerɛ woo puan.”

⁵ Gee tumam ŋmɛlema la han bahɛ ti Yinɛ tuntɔɔnɛ la niiɛ na, tu wan yeti bu? Yinɛ ka tari buurɔ a han taaɛ a sunsunyiim bahɛ tu zuo? (N tɔgeri la nɛre saala puti'irɛ en bala.)

⁶ Sore ka boi! La han dɛna bala, Yinɛ wan iŋɛ la ŋwani gakɛ tiŋa wa?

⁷ Gee la han doohe la mam pumpɔreŋɔ la zuo ti Yinɛ yelemɛŋerɛ la niiɛ na bɔ'ɔra en suŋa, beni zuo ti ba wan sagum mam ti n dela be'em daana?

⁸ Ŋwani ti tu yi kɔ'ɔm kan yele wuu nɛreba basɛba n sageni tumam yu'ura se'em ti tumam yeti, “Tu kɔ'ɔm tuna be'em ti la bahɛ ti sum wa'am na”? Nɛrebana duma wa sageŋɔ gã' gura ba mɛ.

Tuntɔɔ daana kai'

⁹ La nyaa dela ŋwani wa? Tumam Yuda buuri wa nyani basɛba me bii? Aayi, la fii wa me. Tumam pun diŋɛ yeti, nɛra woo, Yuuduma la Giriki buuri za'a boi la be'em paŋa puan,

¹⁰ wuu lan gulehɛ se'em yeti, “Se'em ka boi dɛna tuuntɔɔ, la ayima me.

¹¹ Ba se'em ka bɔkeri, Se'em ka boi ɛɛra Yinɛ.

¹² Ba woo bire la ba pɔya, ba naaɛ la taaba bahɛ yoo. Se'em ka boi ita itesuŋɔ, Ayima me ka boi.”

¹³ “Ba koohe dela yɔɔrɔ kãra, ti ba tari ba zɛlehi pã'aha.” “Kampia yabega en boi ba nɔya puan.”

¹⁴ “Ba nɔya pirɛ mɛ la pɔrɛ la yele tooro.”

¹⁵ “Ba nama kabelɛ ɛɛra la ziim ka'ahegɔ,

¹⁶ sageŋɔ la nɔyalegerɛ en ni yee ban doohe zi'an woo tole,

¹⁷ gee suma'ahum sore la, ba ka mi.”

¹⁸ “Yinɛ zoolum la fii wa ka boi ba ninin.”

¹⁹ Tumam mi' ti ze'elego la n yeti sɛla woo la, yeti bɔ'ɔra la sɛba n dole ku la, ti nɛra da ta tara n ka baŋɛ mɛ, tiŋa wa za'a wan ta yele ban daa iŋɛ sɛla la sɛla.

²⁰ Nɛra ka boi wan ta to'e buurɔ Yinɛ nɛŋan doohe la yele sɛ'a en boi ze'elego la puan, se'ere en sɔi la, ze'elego la puan ti be'em puti'irɛ bɔna.

Sakerɛ puan tuntɔɔnɛ

²¹ Gee nananawa, ze'elego la pooren, Yinɛ tuntɔɔnɛ la niiɛ mɛ, ti nɔtɔgeheba la pa'alegɔ la tɔgɛ la yele,

²² ti Yinɛ tuntɔɔnɛ dole la sakerɛ Yezu Kiresta puan, bɔ'ɔra sɛba woo en nam, ti yima yima ka bɔna,

²³ 23 saaleba za'a diŋɛ tuue mɛ, kan le paaɛ Yinɛ suŋa la.

²⁴ Ba nyɛ buurɔ doohe la zu'uhegɔ la en de bo'olum la, doohe faarɛ se'ere en boi Kiresta Yezu puan la,

²⁵ se'em ti Yinɛ dikɛ en diilɛ ti a dɛna kaabegɔ seko en lilege Yinɛ nimbɔ'zɔrɛ doohe a ziim la, en tuni dɔla sakerɛ puan la. Yinɛ iŋɛ ŋwana pa'alɛ la a tuntɔɔnɛ, se'ere en sɔi la, a sugeri la puan ti a bahɛ saaleba be'em sebo ti ba tabelɛ tum.

²⁶ A iŋɛ dina wa pa'alɛ la zina beere wa, ti Yinɛ dela tuuntɔɔ daana, gee me bɔ'ɔra se'em woo n tari sakerɛ Yezu puan buurɔ.

²⁷ Beni zuo ti tu nyaa ŋmɛ'ɛra tu nyu'ɔ la? Sɛla ka boi. Ze'elego seko bii? Bii tuunsɛ'a? Aayi. La dela sakerɛ, gee dagi itegɔ.

²⁸ Se'ere en sɔi la, tumam n gurɛ se'ere dela, Nɛra nyɛti buurɔ, la sakerɛ puan gee dagi a dole la kiha en gulehɛ bɔna ze'elego la puan.

²⁹ Abunɔ, bii Yinɛ dela Yuuduma ma'a Yinɛ? A dagi sɛba en dagi Yuuduma la me Yinɛ? Ɛ̃ɛ, la dela bala, a dela sɛba en dagi Yuuduma la me Yinɛ,

³⁰ Yinɛ dela ayina, gee wan bo' sɛba en ŋma la buurɔ ba sakerɛ zuo, gee bo' sɛba en ka ŋma la buurɔ ba sakerɛ me zuo.

³¹ Ŋwana zuo, tu lobe ze'elego la bahɛ sakerɛ la zuo? Sore ka boi bala la fii me. Gee lan tugum dɛna se'ere dela, tumam en tugum zãla ze'elego la.