Aromduma 16 - ZE'ELEGO PAALEGA

Fara bu'a

¹ N dikeri la tu taya Fobi en de nɛŋadaana suŋera Sinkireya tiŋa lageŋɔ la puan la pa'ala ya,

² ti ya to'e en Daana la puan wuu lan nari se'em bo' nɛresunduma la, la ya suŋɛ en la sɛla woo ti a wan bɔta ya zi'an. A dela suŋɛ bo' nɛreba zo'e zo'e, ta ta' la mam mɛŋa.

³ Pu'uhɛ ya Pirisika la Akuila, sɛba en tuni la mam Kiresta Yezu puan la,

⁴ la bamam en pɔ̃hɛ ba vom mam zuo la. La dagi mam ma'a en pu'uheri ba na, gee sɛba en dagi Yuda buuri lageŋɔ duma la za'a pu'uheri ba na.

⁵ Pu'uhɛ ya lageŋɔ seko en lageheri ba yire puan la bo' mam. Pu'uhɛ ya mam sunɔŋerɛ suuɔ Epanetuse se'em en de yia daana Esiya sɔ'ɔlum la woo puan ti a tee a suure bo' Kiresta la.

⁶ Pu'uhɛ ya Mɛɛri, se'em en tum zo'e zo'e ya puan la.

⁷ Pu'uhɛ ya Anduronikus la Yuniya en de mam buuri, ti ba daa lagum pagɛ ba la mam la. Bama en de sɛba ti ba ba' mina Yezu tuntuneba la puan. Bama pun dɔla Kiresta mɛ gee ti mam baŋɛ wa'am na.

⁸ Pu'uhɛ ya Ampiliatus en de mam nɔŋerɛ suuɔ, Daana la puan.

⁹ Pu'uhɛ ya Yurebanuse mam tuntuna tadaana Kiresta puan, la Sitakise ti n nɔŋɛ la.

¹⁰ Pu'uhɛ ya Apeles, se'em tuuma n tigɛ Kiresta nini. Pu'uhɛ ya Aristabulus yire duma la.

¹¹ Pu'uhɛ ya n buuri Hɛrɔdiyɔn. Pu'uhɛ ya sɛba en dole Daana la, dɛna Nasisu yire duma la.

¹² Pu'uhɛ ya sɛba en de Daana la tuntuneba dɛna, Tirefaina la Tirefosa. Pu'uhɛ ya n sunɔŋerɛ, Pɛsisi en tum paaɛ paaɛ Daana la puan la.

¹³ Pu'uhɛ Arufuse se'em ti ba looe en Daana tuuma puan la, gee pu'uhɛ a ma la en de mam me ma la.

¹⁴ Pu'uhɛ ya Asinkrituse, Felegɔn, Hɛmese, Patirobase, Hɛmase, la suurɔ la za'a en boi la ba la.

¹⁵ Pu'uhɛ ya Filologuse, Yuliya, Nɛruse la a taya la, la Olimpase, la nɛresunduma la za'a en boi la ba la.

¹⁶ Pu'uhɛ ya taaba gee kɔkera taaba la pupeelum. Kiresta lageŋɔ la woo pu'uhi ya na.

Ba'ahegɔ pa'alegɔ

¹⁷ N yeti ya mɛ la ninmu'urɛ n suurɔ, ti ya bahɛ ti ya nini bɔna sɛba en tari welegere la daaŋɔ kina ya tiŋasuka na, ban ka sakɛ bo' pa'alegɔ seko ti ya zamehɛ la, lɔkeri ya ba.

¹⁸ Se'ere en sɔi la, nɛre bamam taaba ka tuni bɔ'ɔra tu Daana Kiresta, gee ba tuni bɔ'ɔra la ba mɛhi puya. Ba tari la tɔgɛ malemale la belegere, pã'aha susɛ'a en ka mi' la.

¹⁹ Ya naŋa la en yehe zi'an woo se'em la, en bahɛ ti mam nyɛɛna ya zuo, n boti ya tara la yɛm, sɛla en ani suŋa puan, gee yehe ya mɛhi sɛla en de be'em puan.

²⁰ La kan yuue la Suma'ahum Yinɛ la en wɔ̃regɛ Sagena la biŋe ya nama tiŋa. Tu Daana Yezu Kiresta zu'uhegɔ bɔna la ya.

²¹ Timoti, mam tuntuna tadaana la pu'uheri ya na, la Lukiyuse la Yason, la Sosipata en de mam buuri la pu'uhi ya na.

²² Mam Tɛtiyuse, se'em nu'o en gulehɛ gɔŋɔ wa la me pu'uhi ya Daana la puan na.

²³ Gayɔse se'em en biheri mam, la lageŋɔ la za'a ka'lam la pu'uhi ya na. Erastuse en de tiŋa la lige biŋera la, la tu suuɔ Kuwatuse me pu'uhi ya na. [

²⁴ Tu Daana Yezu zu'uhegɔ bɔna la ya. Taari.]

Ba'ahegɔ Pɛka Pu'uhegɔ

²⁵ Nananawa wa, pɛka dɛna Yinɛ se'em en wan ta'am kpemehe ya la yelehum la ti n bo' ya la, la mam n muulɛ Yezu Kiresta bo' ya se'em, yele se'ere en sugɛ gã'a diimen diimen ha se'em,

²⁶ gee nananawa, de nyaa niiɛ na, doohe nɔtɔgeheba en gulehɛ se'em la, de niiɛ bo' sɛba woo en dagi Yuda buuri la, Yinɛ en boi wuuha wa n bo' a nuurɛ se'em, ti a bahɛ ti nɛra woo nam gee sakɛ la.

²⁷ Pɛka dina Yinɛ, se'em ma'a en de yɛm za'a Yinɛ la dinɛ, doohe Yezu Kiresta puan wuuha wuuha Taari.