Aromduma 15 - ZE'ELEGO PAALEGA

Tigera nɛreba nini gana ya mɛhi

¹ Tumam sɛba n kpe'em tu sakerɛ puan la dela tu ŋmibera la sɛba en tari tɔregɔ ba sakerɛ puan la, gee dagi tu kɔ'ɔm biha tu mɛhi nini tika ma'a.

² Tu ayima ayima dela tu tigera tu suurɔ nini, tu putɛ'sunɛ en de tu mɛ tu mabia la zuo.

³ Se'ere en sɔi la, Kiresta daa ka biheri la a mɛŋa nini tika ma'a yele; Gee wuu lan gulehɛ se'em yeti, “Tuurɛ sɛ'a taaba ti sɛba tuura ya la, sigera la mam zuo.”

⁴ Sɛla woo ti ba gulehɛ diimen diimen ha la, gulehɛ ti la pa'alɛ la tumam, ti sɛ' ze'elego, la kpemehego doohe gulehegɔ la puan, tu wan tara beere puti'irɛ.

⁵ Yinɛ se'ere en bo'ori sɛ ze'ele kankaŋi la kpemehego la, iŋɛ ti ya bɔna la suyinɛ la taaba, wuu Kiresta Yezu en boti se'em la,

⁶ bala ti ya wan naaɛ taaba la putɛ'yinɛ la kɔyiŋa, pɛgera Yinɛ en de tu Daana Yezu Kiresta Sɔ la.

Faarɛ yelehum la dela Yuuduma, la sɛba en dagi Yuuduma dinɛ

⁷ Bala zuo, to'oheri ya taaba, wuu Kiresta en to'e ya se'em la, ti la dɛna na'ahegɔ bo' Yinɛ.

⁸ N yeti ya mɛ wa, ti Kiresta lebege la yameŋa bo' ya sɛba en ŋma la, Yinɛ yelemɛŋerɛ la zuo, ti a bahɛ ti Yinɛ en biŋe nɔse'ere bo' yaabeduma la tum,

⁹ gee me bahɛ ti sɛba en dagi Yuda buuri la me pɛgɛ Yinɛ a zu'uhegɔ la zuo. Wuu lan gulehɛ se'em yeti, “Bala zuo, n wan purɛ fum yu'urɛ sɛba en dagi Yuuduma la tiŋasuka, gee yuum pɛka yuuma pɛgɛ fum yu'urɛ.”

¹⁰ Gee le yele yeti, “Nyɛɛni ya mɛ la a nɛreba, yamam sɛba en dagi Yuda buuri wa.”

¹¹ Gee le yele yeti, “Pɛgɛ ya Daana wa, yamam sɛba woo en dagi Yuda buuri wa, gee bahɛ ti nɛra woo pɛgera en.”

¹² Azaaya yele pa'ahɛ yeti, “Yesi puan, nyɛgerɛ kini na, Se'em en wan ihege na bihera sɛba en dagi Yuda buuri la. Eŋa puan ti sɛba en dagi Yuda buuri la wan tara beere puti'irɛ.”

¹³ Nananawa,Yinɛ se'ere en sɔi beere puti'irɛ la, pirɛ ya la nyɛɛma woo la suma'ahum yan nam la zuo, ya pirɛ la beere puti'irɛ ti bu yabera doohe Fa'a Sia la paŋa puan.

Pɔɔl gulehɛ la sukpe'ene

¹⁴ Mam mɛŋa nam ya mɛ n suurɔ, ti ya mɛhi pirɛ mɛ la itesuŋɔ, pirɛ la mi'ilum za'a, wan ta'am ka'am taaba.

¹⁵ Gee la bala za'a, yeledaahi a sɛ'a ti n gulehɛ la sukãberɛ bo' ya na la dela, n tiihɛ ya, doohe zu'uhegɔ la ti Yinɛ bo' mam,

¹⁶ ti n dɛna Kiresta Yezu tuntuna bo' sɛba en dagi Yuda buuri la, malema daana tuuma Yinɛ faarɛ yelehum wa puan, ti sɛba en dagi Yuda buuri wa la, Yinɛ to'e ba kaabegɔ, ti Fa'a Sia la pee ba.

¹⁷ Se'ere en sɔi la, Kiresta Yezu puan, mam tari se'ere zuo ti n pagera la mam tuni bɔ'ɔra Yinɛ wa mɛ.

¹⁸ Se'ere en sɔi la, mam kan makɛ ti n tɔgɛ sɛla, han dagena Kiresta en ba'ahɛ tuunsɛ'a doohe mam puan, nyaŋɛ sɛba en dagi Yuda buuri ti ba nam Yinɛ, doohe mam tugum bii tuunse'ere woo puan,

¹⁹ doohe paŋa kirehi, la nyalema, en tum doohe Yinɛ Sia paŋa la puan, pɔhɛ Yerusalɛm ta paaɛ Ilirikum, mam tɔgɛ Kiresta faarɛ yelehum la za'a za'a.

²⁰ Ŋwana en bahɛ ti mam lu' n suure ti, n kan muulɛ faarɛ yelehum la zi'an ti ba tabelɛ purɛ Kiresta bini, la n da ta mɛ dɔgelɛ ayima ɛberɛ zuo,

²¹ gee woo lan gulehɛ se'em yeti, “Sɛba ti ba ka tabelɛ yele ba Kiresta yele la, wan nyɛ en, ti sɛba en ka tabelɛ wum a yele la wan bɔkɛ en.”

Pɔɔl maaheni ti a kiŋɛ Arome

²² Dina zuo ti saŋa zo'e zo'e mam ka nyɛta fole wan wa'am ya zi'an na la.

²³ Gee nananawa, mam n ka le tara zi'an tinsina wa woo puan ti n kiŋɛ la, n suure nyaa kɔ'ɔm bɔta mɛ wuu yuuma zo'e zo'e ti en bɔta se'em la, ti n wa'am ya zi'an na,

²⁴ n han ta paaɛ Sipeen tiŋa, n boti n nyɛ ya mɛ n sore kinɛ la puan, ti ya te'ele mam ti n tole, n han wa'am na di pupeelum la ya dabeha fii wa.

²⁵ Nananawa, se'ere en boi bini dela, n ye' la Yerusalɛm ti en tari suŋɛ ta bo' nɛresunduma la en boi bini la.

²⁶ Se'ere en sɔi la, Masedoniya, la Akaiya tihi sakereba la puurɛ pee mɛ ti ba tɔrɛ ba tarega la sɛba en de naheduma nɛresunduma la puan la Yerusalɛm puan la.

²⁷ Ba puurɛ pee mɛ ti ba tum dina wa. Yelemɛŋerɛ bamam mɛhi la tari la ba sanɛ. Se'ere en sɔi la, Yuuduma la han tɔrɛ ba sia puan maalegɔ bo' sɛba en dagi Yuda buuri la, bamam me dela ba tum inganɛ puan lɔgerɔ maalegɔ tuunɛ me bo' ba.

²⁸ Bala, n han ta paaɛ tum tuun-dina ba'ahɛ, dikɛ ban bo' ba sɛla la bo' ba ba'ahɛ, n wan doohe ya bɔba na, tole Sipeen tiŋa.

²⁹ N me mi' ti n han ta yɛ'a na, n ye' mɛ na, pirɛ la Kiresta maalegɔ la puan.

³⁰ N yeti ya mɛ la ninmu'urɛ n suurɔ, tu Daana Yezu Kiresta puan, la Sia la nɔŋerɛ puan, ti ya naaɛ la mam la ninmu'urɛ pu'uhegɔ bo' Yinɛ n zuo,

³¹ ti n piiɛ sɛba en ka nam Yudiya puan la nu'uhen, gee ti n tuunɛ Yerusalɛm puan la me, nɛresunduma la wan to'e bu.

³² Bala ti Yinɛ sumboolum la puan, n wan wa'am ya zi'an la nyɛɛma, gee tu za'a lagum me tara pupeelum la taaba.

³³ Nananawa, suma'ahum Yinɛ la bɔna la ya za'a. Taari.