Aromduma 13 - ZE'ELEGO PAALEGA

Sigehe ya mɛhi bo' kpɛ'ɛnduma

¹ Bahɛ ya ti nɛra woo sigehe a mɛŋa bo' timbihega kpɛ'ɛnduma la, se'ere en sɔi la kpe'eŋo ka boi han dagena Yinɛ. Kpe'eŋo seko woo en boi wa, Yinɛ en sɛ ba ze'ele.

² Bala zuo, fum se'em en zaberɛ kpe'emseko, zaberɛ la Yinɛ en looe sɛla, sɛba en zaberɛ la kpe'eŋo seko wan nyɛ la gakerɛ.

³ Se'ere en sɔi la, kpɛ'ɛnduma dagi dabeem lɔkɔ bo' sum, gee be'em. Fum ka boti fum tara dabeem la kpɛ'ɛnduma? Yi ita sɛla en de ma'a, gee ba wan pɛgɛ hɔ.

⁴ Se'ere en sɔi la, a dela Yinɛ yameŋa fum sum zuo. Gee fum han ita sɛla en dagi ma'a, fum dela fum zɔta dabeem, se'ere en sɔi la, kpɛ'ɛma la ka tari a paŋa daalehum la la yoo. La dela Yinɛ yameŋa la tuunɛ ti a namehɛ se'em en tuni tuunyooro.

⁵ Bala zuo, nɛra dela a sigehe a mɛŋa, dagi la ba wan namehɛ fum la ma'a, gee fum suure la en gakeri fum la me.

⁶ Bala mɛa zuo ti fum me yɔɔra kuba la. Se'ere en sɔi la, kpɛ'ɛnduma la dela Yinɛ yamehi, mu'ɛ nini la tuun-ana wa.

⁷ Yɔ ya sɛla woo en de ba dinɛ bo' ba.Yɔ ya kuba bo' se'em en de a to'e kuba, gee yɔ ya lɔgeseto woo en de ya yɔ tu kuba la, bo' se'em en to'ohe kuba aŋa la, nane ya sɛba en nari ba nana, ti na'ahegɔ bɔ'ɔra se'em en de ya na'aha.

Nɔŋɛ ya taaba

⁸ Da tara se'em sanɛ, han dagena ya nɔŋɛ taaba ma'a. Se'ere en sɔi la, se'em en nɔŋɛ a tadaana, tum ze'elego la en boti se'em woo ba'ahɛ mɛ.

⁹ Ze'elego seko en yeti, “Da tum kabohi, da ku nɛra, da zu, da pim”; la ze'elego seto woo en boi la za'a, kilehe bɔna la yele dina wa puan, “Nɔŋɛ fum mabia wuu fum nɔŋɛ fum mɛŋa se'em la.”

¹⁰ Nɔŋerɛ ka tuni mabia be'em. Bala, se'em en tari nɔŋerɛ, doohe la ze'elego la za'a.

Ninmu'urɛ muulegɔ

¹¹ Dina pooren, ya mi' sansɛka puan ti tu bɔna nananawa, la nyaa paaɛ sansɛka en de ya niiɛ ya guum la puan. Se'ere en sɔi la, faarɛ nyaa lɛm tu nananawa gana tumam n daa nan nam Yezu la.

¹² Yu'uŋɔ la pun tole mɛ, ti beyiine pɔra. Bala, bahɛ ya ti tu biŋe lika puan yɛla kinkɛleŋa, gee dikɛ niihum zaberɛ lɔgerɔ la yɛ.

¹³ Bahɛ ya ti tu vɔni ya na'ahegɔ vom, wuu tumam n de niihum kɔma la, gee dagi tu dɛna sɛba en dole dita dikãreyooro la de'em yooro, bugera, tuna dɛgerɔ tuuma, la yetɔgeyooro, dagi zaba la nintɛrega yɛla.

¹⁴ Gee tugum dikɛ ya Daana Yezu Kiresta yɛ wuu fuo la gee da bo' ya inganɛ wa sore ti de dikɛ tu doohe tu kunkoma'ahum la yɛla la.