Aromduma 12 - ZE'ELEGO PAALEGA

Vom paalum Kiresta puan

¹ Bala zuo, n yeti ya mɛ n suurɔ, ti Yinɛ nimbɔ'zɔrɛ la zuo, ya dikɛ ya ihi la bo' wuu kaabɛ vua la, dɛna tuulum kaabegɔ, gee tigɛ Yinɛ nini, dina en de ya sia puan na'ahegɔ.

² Da dikɛ ya mɛhi naaɛ la tiŋa wa zuo yɛla, gee tugum malum sɛ ya mɛhi, ya puti'ira teere puan, la ya viihɛ baŋɛ sɛla en de Yinɛ sumboolum, la sɛla en ani suŋa, nara gee ba'ahɛ za'a.

³ Zu'uhegɔ seko ti Yinɛ zu'uhɛ mam la zuo, mam yeti se'em woo en boi ya puan yeti, se'em da biha nyɛta a mɛŋa gana en sunti a ti'iha a mɛŋa yele se'em la, gee a sigeha a mɛŋa a ti'ihegɔ puan, ti nɛra woo bɔna wuu Yinɛ en makɛ a sakerɛ se'em bo' en la.

⁴ Wuu iŋa en tara luga yima yima se'em, ti luga la za'a me ka lagum tuna tuunɛ deyina se'em la,

⁵ bala mɛa ti tumam en zo'e se'em wa, dɛna iŋa kayima Kiresta puan. Gee la tu yima yima mɛa, tu dela iŋa kayima lɔgerɔ la taaba.

⁶ Tu tari la zu'uhegɔ bo'olum en boi yima yima, doohe la ban bo' tu, tu zu'uhegɔ se'em la. Purega puan, tu dela tu puta ti la zuna la tu sakerɛ la,

⁷ tuntuna dela a tuna, ti pa'ala me dɛna a pa'ala,

⁸ Kpemehego, daana me dela a kpɛmeha, ti se'em en bo'ori, me bɔ'ɔra yabi yabi, Nɛŋadaana mu'ɛ nini, ti nimbɔ'zɔta me tuna la pupeelum.

Yelemɛŋerɛ Kiresta bia daalehum

⁹ Tari ya yelemɛŋerɛ nɔŋerɛ. Yaaɛ ya sɛla en de be'em, gee gurɛ sɛla en de sum kankaŋi.

¹⁰ Nɔŋɛ ya taaba la giile. Pageri ya taaba la na'ahegɔ tuuma.

¹¹ Da bahɛ ya ti ya inkirega kɔ'ɔhɛ. Kpe'em ya mɛ sia puan, bɔta ti ya tuna bɔ'ɔra Daana la.

¹² Nyɛɛni ya mɛ la beere puti'irɛ, tara ya sugeri ya namehegɔ puan, gee me ŋmibera ya pu'uhegɔ puan.

¹³ Lageheri ya suŋera Yinɛ nɛresunduma la, gee tiɛ ya nu'uhi la itesuŋɔ paara saama.

¹⁴ Ka'ari ya sum bɔ'ɔra sɛba en nameheri ya la, ka' sum, gee da pɔti ya bɔ'ɔra ba.

¹⁵ Nyɛɛni ya la sɛba en nyɛɛni, gee kɛla la sɛba en kele.

¹⁶ Boni ya la suma'ahum la taaba, da pa'ala ya mɛhi, gee boni ya la naheduma, da ti'iha ti ya wikɛ gana yan de sɛba.

¹⁷ Da yɔ ya be'em bo' se'em en eŋa ya be'em, gee ni ti'ihɛ ya sɛla en ani suŋa nɛra woo ninin.

¹⁸ Gee la han wan ta'am iŋɛ, lan de yamam la, boni ya la suma'ahum la nɛra woo.

¹⁹ N suurɔ, da makɛ ya lerege nɛra ya mɛhi, gee bo' ya Yinɛ sunsunyiim la sore ti bu tum. Se'ere en sɔi la, la gulehɛ yeti, “Leregere dela mam dinɛ, Mam en wan lebehe yɔ. Daana la en yele.”

²⁰ Aayi, “ya dinduma kom han duna, diihe ya ba, ko'nyuuro han tara ba, bo' ya ba sɛla ti ba nyu. Ya han ita ŋwana, ya ka'ari la vi bugum pagela ba zuto.”

²¹ Da bahɛ ya ti be'em nyaŋɛ ya, gee tugum nyaŋɛ ya be'em, la ya sum la.