Aromduma 10 - ZE'ELEGO PAALEGA

¹ N suurɔ, mam suure en boti sɛla, la mam pu'uhegɔ bɔ'ɔra Yinɛ ba zuo dela, ba nyɛ faarɛ.

² Mam wan ta'am yeti, ba ba' tara ninmu'urɛ mɛ paaɛ paaɛ bo' Yinɛ, gee la ka dole bɔkerɛ.

³ Se'ere en sɔi la ba ka mi' tuuntɔɔ vom sebo en ze'ele Yinɛ zi'an na la, gee zigera ti ba tum ba mɛŋa tuntɔɔnɛ la, ba ka dikɛ ba mɛhi bo' Yinɛ tuntɔɔnɛ la.

⁴ Se'ere en sɔi la, Kiresta en de ze'elego la ba'ahegɔ, ti tuuntɔɔ vom la nyaa bɔna bo' se'em woo en nam en.

Faarɛ dela nɛra woo dinɛ

⁵ Moose gulehɛ tuuntɔɔ vom sebo en dole ze'elego malema puan na la yele yeti, “Se'em en iti ze'elego malema la dela a vɔna ze'elego la yɛla la za'a.”

⁶ Gee tuuntɔɔ vom sebo en ze'ele sakerɛ puan na la, a yeti, Da yele ya suya puan yeti, “Ani en wan zom saazuo ha? (De vuurɛ dela, ta tari Kiresta sige na)

⁷ Bii ani en wan sige tiŋa tiŋa ha?” (De vuurɛ dela ta vo'e Kiresta kum puan na)?

⁸ Gee gulehegɔ la yeti boo? “Yelehum la lɛm ya mɛ, kɔ'ɔm bɔna ya nɔgbamen la ya suyan.” (Sakerɛ yelehum la ti tu muula la n bala.)

⁹ Beni zuo, ya han purɛ la ya nɔya, ti Yezu en de Daana, gee nam la ya suya ti Yinɛ vo'e en kum la puan mɛ, ya wan nyɛ faarɛ.

¹⁰ Se'ere en sɔi la, nɛra ni nam mɛ la a suure, ti Yinɛ bo' en buurɔ, gee me ni purɛ la a nuurɛ nyɛ faarɛ.

¹¹ Gɔŋɔ la puan yeti yaa, “Se'em ka boi nam Yezu, ti vi di a daana.”

¹² Yima yima ka boi Yuda la Girikiduma tiŋasuka. Daana ayima en de ba za'a Daana, gee me bɔ'ɔra ti la sɛkera se'em woo en yi' en.

¹³ Se'ere en sɔi la, “Se'em woo en yi' Daana la yu'urɛ wan nyɛ faarɛ.”

¹⁴ Gee nɛreba yeti ba iŋɛ la ŋwani yi' se'em ti ba ka nam en? Gee ba yeti ba iŋɛ la ŋwani nam se'em ti ba ka tabelɛ wum a yele? Gee ba yeti ba iŋɛ la ŋwani wum, se'em han ka muulɛ bo' ba?

¹⁵ Gee ba yeti ba iŋɛ la ŋwani muulɛ, han dagena ba tum ba mɛ? Wuu lan gulehɛ se'em yeti, “Bihɛ sɛba en tari faarɛ yelehum la kina na la nama en ani se'em suŋa suŋa.”

¹⁶ Gee dagi nɛra woo en nam bo' faarɛ yelehum la. Se'ere en sɔi la, Azaaya yeti, “Daana, ani en nam tu yelehum wa?”

¹⁷ Bala zuo, sakerɛ ze'eti la wuŋa puan na, ti sɛla ti ba wum la me ze'eti la Kiresta yelehum la puan na.

¹⁸ Gee mam sokere dela, Ba ka wum? Yelemɛŋerɛ, ba wum ya. Se'ere en sɔi la, la gulehɛ gɔŋɔ la puan yeti, “Ba kua yehe paaɛ timpaberɛ wa zi'an woo mɛ, ti ba yelehum la paaɛ timpaberɛ wa luga za'a.”

¹⁹ Ti mam le soke yeti, “Izirale yuum ka bɔkɛ me bii?” Yia, Moose yeti, “N wan bahɛ ti ya nini tɛta la sɛba en pun ka zo'e paaɛ tinmune. N wan bahɛ ti ya suure nyiie la tinyaalega.”

²⁰ Azaaya me yuum kãbɛ la suure yele ya yeti, “Sɛba en ka eere mam la, en tugum nyɛ mam. N niiɛ n mɛŋa bo' la sɛba en ka soke n yele.”

²¹ Gee a tɔgɛ Izirale yele yeti, “Daarɛ woo, mam tiɛ n nu'o la bala bo' nɛreba en ka nane, sɛba en ka dole mam n boti sɛla la.”