Amatie 9 - ZE'ELEGO PAALEGA

Yezu tibɛ kɔɔreŋɔ

¹ Ti Yezu zom uureŋɔ, yakɛ kiŋɛ a mɛŋa tiŋa.

² La ka yuue ti nɛreba basɛba en bala zɛɛra nɛra iŋa en ki ti a gã'a suŋɔ zuo kina na. Yezu en nyɛ ba sakerɛ la, a yele buraa la iŋa en ki la yeti, “Bia wa, fum be'em la bahɛ ti fum suure gã'arɛ. Fum be'em la bahɛ bo' fum.”

³ Ti gɔnmi'ineba basɛba gɔgena la ba mɛhi yeti, “Burakana wa tuuri mɛ.”

⁴ Gee Yezu en mi' ba puti'irɛ la, a yele ba yeti, “Ŋwani ti ya ti'iha be'em ya puti'ira puan?

⁵ De deni en de naana? ‘N yeti fum be'em la bahɛ bo' fum la,’ bii n yeti, ‘Ihege kina la’?

⁶ Gee bala ti ya baŋɛ ti asaala dayua la tari paŋa tiŋa wa zuo ti a bahɛ nɛreba be'em bahɛ bo' ba.” Gee nyaa yele buraa la iŋa n ki la yeti, “Ihege vaaɛ fum suŋɔ la fum kule fum yire.”

⁷ Ti buraa la ihege ze'ele, kina kula a yire.

⁸ Nɛrekuuŋɔ la en nyɛ ŋwana la, dabeem en sãɛ ba, ti ba pɛgɛra Yinɛ, se'em en dikɛ paŋa kana taaba bo' saaleba.

Yezu yi' Matu

⁹ Yezu en kini la, a nyɛ la buraa ti ba yi'ira Matu, ti a zi'a kuba to'ohego deo puan, ti a yele en yeti, “Dɔla mam” ti a ihege doohe en.

¹⁰ Yezu la a zahereba la ta zi'a la yire puan dɛla taaba dia saŋa. Ti kubetɔ'ɔhereba la be'em duma zo'e zo'e me n bala wa'am na zi'a dɛla la Yezu la a zahereba la.

¹¹ Farasiiduma la en nyɛ ŋwana la, ba soke Yezu zahereba la yeti, “Ŋwani ti ya pa'ala la naaɛ la kubetɔ'ɔhereba la be'em duma dita?”

¹² Gee Yezu n wum dɛna wa, a yeti, “Sɛba en de ba mɛhi ka eeri tiba sɛba en bɛ̃'ɛri ma'a.

¹³ Gee kiŋɛ ya ta zamehɛ yele dina wa vuurɛ. ‘Mam nini tigɛ mɛ la nimbɔ'zɔrɛ dagi kaabegɔ.’ Mam ka wa'am na ti n yi' la tuuntɔɔ duma, gee be'em duma.”

Nɔlurɛ sokere

¹⁴ Ti Yɔn zahereba wa'am Yezu zi'an na soke en yeti, “Ŋwani ti tumam la Farasiiduma la luti la nuurɛ tabela, gee ti fum zahereba la ka zageha ya mɛhi?”

¹⁵ Ti Yezu yele ba yeti, “Pɔgedire de'eŋo saama la suya kan ta'am sagum, Pɔgedita la en boi la ba la. Bii ba suya wan ta'am sagum? Gee dabeha kini na ti ba wan dikɛ Pɔgedita la gee bahɛ ba, bilam ti ba nyaa wan luta nuurɛ.

¹⁶ Nɛra ka dikeri tanɛ paalɛ ligera fukɛka, tanɛ paalɛ la wan ahegɛ fukɛka la, ti ahegerɛ dinɛ wan ba' gaŋɛ.

¹⁷ Bii ba dikɛ daam en kele su'ura lankɛka puan. La han iŋɛ bala, laŋa la wan tahɛ ti daam la ka'ɛ, ti laŋa la me sagum. Gee daam en kele su'uri la lampaalega puan, ti ba za'a kan sagum.”

Yezu ihege kum Gee tibɛ Nɛreba

¹⁸ En boi bini tɔgera ŋwana bɔ'ɔra ba la, ti zamehegɔ yire nɛŋa daana ayima en bala paaɛ na dɔbelɛ bɛlena Yezu yeti, “N poyua n nan kɔ'ɔm lu ma'aherɛ ma'aherɛ. Bala wa'am na dikɛ fum nu'o pagelɛ a zuo ti a vo'e.”

¹⁹ Ti Yezu ihege doohe en, ti a zahereba la doohe la.

²⁰ Bilam bilam ti pɔka ziim en ka'ari yuuma pia la ayi', wa'am na ze'ele Yezu pooren kalum sãberɛ en yule a fuo la tiŋa.

²¹ Se'ere en sɔi la, pɔka wa yele ka mɛŋa yeti, “N han yeen kalum a fuo wa ma'a n wan nyɛ n tibegɔ.”

²² Yezu en ŋmɛregɛ nyɛ pɔka wa la, a yeti; “N poyua, bahɛ ti fum suure gã'arɛ, fum sakerɛ la n bahɛ ti fum dɛna fum mɛŋa.” Yehe bala ma'a, bilam bilam ti pɔka dɛna ka mɛŋa.

²³ Yezu en paaɛ kpɛ'ɛma la yire la, nyɛ ti taliten-pɛɛbereba peeberi, ti nɛreba ana gagelam.

²⁴ Ti a yele ba yeti, “Yiregɛ ya, pugela la ka ki, a gihi mɛ.” Ti nɛreba la taaɛ la'ara en.

²⁵ Ban yiregɛ nɛreba la ba'ahɛ la, ti Yezu kɛ̃ gurɛ bia la nu'o ti ka ihege.

²⁶ Ti yele wa to'e tiŋa la zi'an woo.

²⁷ Ti Yezu ze'ele bilam yɛ'a, ti fɔɔhi siyi dɔla en kaaha vɔɔla yeti, “Zɔ tu nimbu'ɔ Deviti dayua wa!”

²⁸ En ta kɛ̃ yire la puan la, fɔɔhi siyi wa doohe paaɛ a zi'an mɛ, ti Yezu soke ba yeti, “Yamam tari sakerɛ ti mam wan ta'am tibɛ ya?” Ti ba lerege yeti, “Ɛ̃ɛ Daana.”

²⁹ Ti Yezu kalum ba nini la gee yeti, “Ya sakerɛ en de se'em la, la tum bala mɛa bo' ya.”

³⁰ Ti ba nini la pikɛ, ti Yezu kagɛ ba yeti, “Da bahɛ ya ti nɛra baŋɛ yele wa.”

³¹ Gee ban yehe la, ba kɔ'ɔm dikɛ Yezu yele mɛ sãɛ tiŋa la za'a.

³² La ka yuue, ban yehe ba'ahɛ la, ti ba tari buraa ti kulekpa'bɛ'a dɔla ka, ti ka ka tana tɔgera wa'am Yezu zi'an na.

³³ Ti Yezu sa'ɛ kulekpa'bɛ'a la, ti gɔɔŋɔ la nyaa pɔhɛ tɔgera, ti la iŋɛ nɛreba la pakerɛ paaɛ paaɛ. Ti ba yeti, “Tu ka tabelɛ nyɛ yele dina wa taaba Izirale tiŋa wa.”

³⁴ Gee Farasiiduma la yeti, “Yezu tari la kulekpa'bɛ'ɛhi naba paŋa sa'aha kulekpa'bɛ'ɛhi.”

Va'am makerɛ

³⁵ Ti Yezu dɔla tinkãra la timbibehi za'a pa'ala ba zamehegɔ yiya la puan, muula Yinɛ sɔ'ɔlum faarɛ yelefum la, gee tibera bã'ahi la teem yima yima.

³⁶ En nyɛ nɛrekuuŋɔ la, ba nimbu'ɔ en nyɔkɛ en. Se'ere en sɔi la, ba ba' bɔna daaŋɔ puan, yiregɛ wuu piihi en ka tari daana la.

³⁷ Ti a yele a zahereba la yeti, “Hmm! Buŋa la zo'e mɛ, gee tuntuneba la n pɔ'ɛ.

³⁸ Bala, suhɛ ya va'am Daana la, ti a tum tuntuneba a buŋa la puan na.”