Amatie 8 - ZE'ELEGO PAALEGA

Yezu tibɛ nɛreba

¹ Yezu en ze'ele zoore la zuo sige na la, nɛrekuuŋɔ en dole en,

² ti kunkone deyima paaɛ a nɛŋan kpa' duma yele en yeti, “Daana, fum han bɔta tibɛ mam.”

³ Ti Yezu tiɛ a nu'o kalum en gee yeti, “Mam boti, to'e fum tibegɔ!” Bilam bilam ti buraa wa iŋɛ sum.

⁴ Ti Yezu yele buraa wa yeti, “Bihɛ suŋa la fum da yele nɛra nɛra se'ere, gee tari fum mɛŋa ta pa'alɛ malema daana la, gee bo' ba'a bahega bo'olum sebo ti Moose bo' ya nuurɛ ti ya bɔ'ɔra la, ti la dɛna sɛla iŋɛ gã'a bɔ'ɔra ba.”

Yezu tibɛ pɛntiira yameŋa

⁵ Yezu en kɛ̃ Kapɛnum la, ti tansugere nɛŋa en tari pɛntiireba kɔbega wa'am a zi'an na,

⁶ bɛlena en yeti, “Daana, en yameŋa en kɔ'ɔm kaarum gã'a ka ta'na ihegera ti la ba' wuna en.”

⁷ Ti Yezu yele en yeti, “N wan wa'am na tibɛ en.”

⁸ Ti Pɛntiireba kpɛ'ɛma wa yeti, “Aayi, naa, Daana, mam ka nari fum wa'am mam zɔŋɔ wa puan na, yeen tɔgɛ yelefum la, gee n yameŋa wa wan iŋɛ sum.

⁹ Mam boi la kpɛ'ɛnduma nu'uhen, ti pɛntiireba me bɔna mam me nu'uhen. Mam han yele ayima yeti, ‘Kiŋɛ,’ a ni kiŋɛ mɛ. N han le yele ayima me yeti, ‘Wa'ana,’ a ni wa'am me na. N ta'am yele n da'aberɛ yeti, ‘Iŋɛ ŋwana,’ ti a iŋɛ.”

¹⁰ Yezu en kelehe en ba'ahɛ la, la iŋɛ en la pakerɛ ti a yele sɛba en dole en la yeti, “Yelemɛŋerɛ, Izirale tiŋa wa puan mam ka nyɛ nɛra ti a nam ŋwana.

¹¹ N yele ya ti, nɛreba kekeko wan ze'ele dapɔya la zanɔya bɔba wa'am na di la Aberaham, Aziki, la Yakɔbe, saazuo sɔ'ɔlum la puan,

¹² gee ti sɛba en wan sooe ni sɔ'ɔlum la, ba lobe ba bahɛ yiŋa lika la puan ti kaaha gee ɔbera gi'ira nyɛna.”

¹³ Ti Yezu nyaa yele pɛntiireba kpɛ'ɛma la yeti, “Kula, la wan dɛna bala bɔ'ɔra hɔ, wuu fum n sakɛ se'em la.” Ti yameŋa la tuntuna nyɛ a tibegɔ hankaŋa mɛa puan.

¹⁴ Yezu en kɛ̃ Pita yire la, a nyɛ ti Pita dɛɛmpɔka n gã' suŋɔ zuo gbi'ira la ɔɔrɔ,

¹⁵ ti a kalum a nu'o, ti ɔɔrɔ la bahɛ en, ti a nyɛ paŋa ihege bo' en ko'om.

¹⁶ Yu'ukuŋɔ mɛa ti nɛreba tari nɛreba kekeko ti kulekpa'bɛ'ɛhi dɔla ba wa'am na, ti a sa'ahɛ kulekpa'bɛ'ɛhi la, la yetɔgeyimɔ ma'a, gee tibɛ sɛba woo en bɛ̃'ɛri.

¹⁷ Dina wa tum ti nɔtɔgeha Azaaya en purɛ se'em en wa'am sira na. A yeti, “Eŋa mɛŋa en to'e tumam tɔregɔ la zi tumam bã'ahi.”

Sɛba n wan doohe Yezu

¹⁸ Yezu en nyɛ ti nɛrekuuŋɔ la bibigere na la, ti a bo' a zahereba nuurɛ yeti, bahɛ ya ti tu yakɛ yakenɛ deyima la ha.

¹⁹ Bilam ti gɔnmina ayima paaɛ a zi'an na yele en yeti, “Pa'ala, mam wan doohe fum kiŋɛ zi'an woo ti fum yɛ'a.”

²⁰ Yezu lebehe en yeti, “Piini tari yogero mɛ kɛ̃'ɛ̃ra, ti niihe tara tugerɔ me kɛ̃'ɛ̃ra, gee Asaala Dayua wa ka tari zi'an ti a wan dikɛ a zuo kugelɛ.”

²¹ Ti zahereba a yima yele en yeti, “Daana, yia bahɛ ti en lebe laaɛ n sɔ ba'ahɛ gee wa'am na doohe fum.”

²² Gee Yezu yele en yeti, “Dɔla mam gee bahɛ ti kum duma pi' ba kum.”

Yezu tahɛ Kusebego

²³ Yezu en zom uureŋɔ la, a zahereba la doohe en mɛ.

²⁴ Ti kusebekãtɛ pɔhɛ lɔbera ko'om la puan. Kusebego la paŋa ba' zo'e mɛ ti uureŋɔ la yeti ku muhi, ti Yezu bɔna uureŋɔ la gulengukɔ puan giha.

²⁵ Ti ba paaɛ niiɛ en yeti, “Daana, faaɛ tɔ, tu kiiri mɛ!”

²⁶ Ti a yele ba yeti, “Ŋwani ti ya tara dabeem bala?” Ya sakerɛ pɔ'ɛ ya. Gee nyaa ihege tahɛ kusebego la, la ateko la ti komi'ihi ma'ɛ suram.

²⁷ Ti la iŋɛ nɛreba la za'a pakerɛ paaɛ paaɛ, ti ba yɛta yeti, “Beni buraa en ŋwana ti kusebego la ateko pun ta wuna a tugum?”

Yezu sa'ɛ kulekpa'bɛ'a

²⁸ Yezu en paaɛ Gadara en boi ateko la yakenɛ deyima ha la, ti buraahi siyi ti kulekpa'bɛ'ɛhi dɔla si, ze'ele yɔɔrɔ la zi'an yɛhera na, tu'uhɛ en. Buraahi wa ba' daana mɛ ti nɛra ka dɔla bilam bɔba tɔla.

²⁹ Bilam bilam ti ba pɔhɛ nyabera yeti, “Beni ti fum tari la tɔ Yinɛ dayua wa? Fum yeti fum pɔgelum tu mɛ gee ti saŋa la mɛŋa mɛŋa la nan ka paaɛ?”

³⁰ Kurikuri zo'e zo'e en ka zaaɛ zɛ'a bilam ɔbera.

³¹ Ti kulekpa'bɛ'ɛhi la belum en yeti, “Fum han sa'ara tɔ, bahɛ ti tu kɛ̃ kurikuri wa puan.”

³² Ti Yezu bo' ba nuurɛ yeti “Kini ya!” Ti ba yehe na kɛ̃ kurikuri la puan, bilam bilam ti kurikuri la za'a zɔ gbiri gbiri zulege zoore la ta lu ko'om la puan ki.

³³ Ti dunkiima la zɔ kalam paaɛ tiŋa la puan yele sɛla woo en iŋɛ buraahi la ti kulekpa'bɛ'ɛhi dɔla si la.

³⁴ Ti bilam bilam tiŋa la nɛreba za'a wa'am na ti ba bihɛ Yezu. Ban nyɛ en la, ba belum en mɛ ti a bahɛ bamam tiŋa ko'om la nuuren la.