Amatie 3 - ZE'ELEGO PAALEGA

Yɔn Ko'sɔɔra la muulegɔ

¹ Dabeha aŋa ha puan la, ti Yɔn Ko'sɔɔra la wa bɔna la Yudiya muuen ha muula baha na yeti.

² “Tee ya, gee Saazuo sɔ'ɔlum la pɔri na.”

³ Nɛre-ina n bala ti nɔtɔgeha Azaaya tɔgɛ a yele yeti, “Kua kayima n kaahi muuen ha baha na yeti, ‘Maafum ya Daana la sore, maalɛ ya a sore la tuuntɔɔ.’ ”

⁴ Yɔn yɛ la futo ti ba dikɛ yugenɛ kɔberɔ wugɛ, ti a sɛganɛ dɛna duŋa ganɛ baalega ti a dikɛ lu' a sia, ti a dia dɛna sunwa'ara la muuen seero.

⁵ Ti Yerusalɛm tiŋa nɛreba, la sɛba woo n boi Yudiya nɛreba za'a kina a zi'an na, la tinse'ehi woo en kaaɛ Yɔɔdan kulaa la nɛreba za'a,

⁶ ti ba puta ba be'em ti a sɔɔra ba ko'om Yɔɔdan kulaa la puan.

⁷ Gee Yɔn en ta nyɛ ti Farasii la Sadusiiduma la kini a zi'an na ti a sɔ ba ko'om la, a yele ba yeti, “Yamam kampɛbila wa! Ani en yele ya la ninmu'urɛ ti ya zɔ li'ihɛ Yinɛ sunsunyiim wa n kini na wa?

⁸ Wani ya wala sɛ'a n pa'alɛ ti ya teere la.

⁹ Da kɔ'ɔm kɔ'ɛ ya puti'ira yɛta ya mɛhi yeti, ‘Aberaham en de tumam sɔyaaba la zuo.’ N yeti ya mɛ wa, ti Yinɛ wan ta'am bahɛ ti kuga wa asɛ'a lebege Aberaham kɔma.

¹⁰ Nananawa, liya la maahum mɛ gã'a tia woo tilen, ti tisɛka woo en ka wani walesuma, liya la wan ŋmaaɛ tikaŋa bahɛ, ti ba dikɛ ka bahɛ bugum la puan.

¹¹ “Mam sɔɔri ya mɛ la ko'om wa, ti la pa'alɛ ti ya tee ya puti'ira ya be'em puan. Gee se'em en bi'ihɛ gani mam boi mam pooren kina na. Mam pun ka seke ti n zãla a tagera. Eŋa wan sɔ ya mɛ la Fa'a Sia la, la bugum.

¹² A zãli a yeelego pi'ɔ mɛ a nu'uhen, a wan yeele disɛka woo ti a tɔ a toore la puan la, vaaɛ a kisuma la su' bããren. Gee bunvagela la, a wan nyɔ' ba la bugum n ka diti kiŋera puan.”

Yezu Ko'om sua

¹³ Ti Yezu ze'ele Galilii wa'am Yɔn zi'an Yɔɔdan kulaa la puan na, ti Yɔn sɔ en ko'om.

¹⁴ Ti Yɔn ka sakɛ gee yeti: “Fum tugum nari ni ti fum sɔ mam, ti fum tugum yɛ'a mam zi'an na?”

¹⁵ Gee Yezu lerege en yeti, “Bahɛ ti la dɛna bala nananawa. La dela ma'a bo' tu, ti tu doohe ŋwana tum sɛla wuu tuuntɔɔ.” Ti Yɔn sakɛ.

¹⁶ Ti en sɔ Yezu ko'om ba'ahɛ la, ti a ze'ele ko'om la puan kɔ'ɔm dɔɔra na la, a yeti a bihɛ ti saazuo en yu'ɛ bo' en, ti a nyɛ ti Yinɛ Sia sigera a zuo na ana wuu dayene la, wa'am na yagelɛ a zuo.

¹⁷ Ti kua ze'ele saazuo tɔgɛ bahɛ na yeti, “Mam mɛŋa Dayua n ŋwana, se'em ti n nɔŋɛ, se'em ti n nini tigɛ la en.”