Amatie 28 - ZE'ELEGO PAALEGA

Yezu vo'ore

¹ Vo'ohego daarɛ la n tole la, pɔhega dabeha ayopɔi pɔhega daarɛ bulika, ti Mɛɛri Magedalin la Mɛɛri ayima la, kiŋɛ ti ba bihɛ yɔɔ la.

² Ba yeti ba bihɛ ti tiŋa la miim mɛ. Se'ere en sɔi la, Daana suŋera en ze'ele saazuo sige na bilege yɔɔ kugere la lebe pooren, zi'a de zuo.

³ Suŋera wa nyagere mɛ wuu saa bugum la, ti a lɔgerɔ pelege kerikeri wuu sakuga la.

⁴ Dabeem en sãɛ ba la zuo, ti gureba la gbi' pabegɛ ana wuu ba ki mɛ la.

⁵ Gee suŋera la yele pɔgehi la yeti, “Da zɔ ya dabeem. Mam mi' ti ya eere la Yezu ti ba kpa' la.

⁶ A ka boi ka'lam, se'ere en sɔi la, a vo'e mɛ, wuu en daa pun yele se'em la. Wa'am ya na bihɛ zi'an ti ba daa biŋe en la.

⁷ Kiŋɛ ya kalam ta yele a zahereba la yeti, Yezu vo'e a kum la puan. ‘Yelemɛŋerɛ, a boi ya nɛŋa yɛ'a Galilii ha. Bilam ti ya wan ta nyɛ en.’ Mam sɔɔleŋa en ŋwana bo' ya.”

⁸ Bala ti ba bahɛ yɔɔ la zi'an kalam la dabeem, la pupeelum kãtɛ, zɔ ta yele a zahereba la.

⁹ Ba yeti ba bihɛ ti Yezu en bala tu'uhɛ ba yeti, “Suma'afum bɔna la ya” ti ba kiŋɛ paaɛ en, gurɛ a nama, Na'ahɛ en,

¹⁰ Ti Yezu yele ba yeti, “Da tari ya dabeem, kiŋɛ ya ta yele n suurɔ la ti ba kiŋɛ Galilii. Bilam ti ba wan nyɛ mam.”

Gureba la nuurɛ

¹¹ Pɔgehi la n ye'ehe la, ti gureba la basɛba kɛ̃ tiŋa la puan ta yele malema kiinduma la sɛla woo en iŋɛ la.

¹² Ti Malema kiinduma duma la n sɔhɛ la yizuto kiinduma la ba'ahɛ la, ba za'a ku la nuurɛ ti ba bo' pɛntiireba gu'ureba la ligeri zo'e zo'e,

¹³ gee yele ba yeti, “Ta yele ya ba yeti, ‘A zahereba la n wa'am yu'uŋɔ na zu en kiŋɛ se'em ma'a ti guum zɛɛ tumam la.’

¹⁴ Ti ŋwana wa han lu Timbihega daana la tuban, tumam wan nyɛ en, gee gu' ti daaŋɔ da paaɛ ya.”

¹⁵ Ŋwana ti ba to'e ba ligeri, gee iŋɛ ban pa'ali ba se'em la. Yuuduma kelum tɔgera yele dina wa mɛ la zina.

Yezu tum a Zahereba

¹⁶ Ti a zahereba pia la ayima la kiŋɛ Galilii, zoore se'ere ti Yezu pa'alɛ ba la.

¹⁷ Ba nyɛ en la, ba na'ahɛ en mɛ, gee basɛba bu'uri mɛ.

¹⁸ Ti Yezu paaɛ ba na, yele ba yeti, “Paŋa za'a en boi saazuo ha, la timpaberɛ wa zuo dikɛ bo' la mam.

¹⁹ Bala, kiŋɛ ya timpaberɛ wa zuo za'a, la ya maahum zahereba bo' mam. Sɔ ya ba ko'om doohe, Sɔ la, la Dayua la, la Fa'a Sia yu'urɛ puan,

²⁰ gee pa'alɛ ya ba, ti ba nana sɛla woo ti mam bo' nuurɛ ti ya ita la. Gee tɛri ya ti, mam boi la ya mɛ saŋa woo, ta paara tiŋa wa ba'ahegɔ saŋa.”