Amatie 23 - ZE'ELEGO PAALEGA

Yezu zagehɛ Gɔnmi'ineba la Farasiiduma

¹ Pooren ti Yezu yele nɛrekuuŋɔ la, la a zahereba la yeti,

² “Gɔnmi'ineba la, la Farasiiduma zi' la Moose kuka la zuo.

³ Bala, iti ya sɛla woo ti ba pa'ala la gee dɔla kɔ suŋa suŋa. Gee da iti ya ba itegɔ la, se'ere en sɔi la, ba itegɔ la ka dole ba pa'alegɔ la.

⁴ Ba ni bobe la zeero en tibegɛ ka tana ziira dikɛ pagelɛ nɛreba bɔgerɔ zuo, gee bamam mɛhi ka maahum ti ba pun tiɛ ba nu'dibila lagum te'ele la fii me.

⁵ Ba tuni ba tuuma za'a ti nɛreba n nyɛ ba Se'ere en sɔi la ba pɛ la pa'alegɔ la tiihegɔ funini kãra, gee pɛ sãba wogerɔ yule ba futo la tiŋa.

⁶ Ba nɔŋɛ la ba zi'a na'ahegɔ zi'ihi, de'enɔ puan, gee me nɔŋɛ kugekãra zi'ihi la, zamehegɔ yiya la puan.

⁷ Ba me nɔŋɛ la nɛreba dɔbeta tiŋa da'ahi puan pu'uha ba, gee me nɔŋɛ nɛreba yi'ira ba Rabi. (Pa'ala)

⁸ Gee ba kan yi'ira yamam Rabi se'ere en sɔi la ya tari la pa'ala ayima ti yamam za'a dɛna suurɔ.

⁹ Da yi' ya se'em ti ya sɔ tiŋa wa zuo, ya tari la sɔ kayima ma'a, se'em n boi saazuo ha.

¹⁰ Bii ba yi'ira yamam nɛheduma se'ere en sɔi la, ya tari la nɛŋadaana ayima ma'a se'em n de Kiresta la.

¹¹ Se'em n de nɛrekãtɛ ya puan, eŋa n wan dɛna ya yameŋa.

¹² Se'em woo n zɛkeri ba mɛhi wan sige tiŋa, ti se'em woo n sigehe a mɛŋa, ba wan zɛkɛ a.

¹³ “Gee yele boi ya zuo, yamam gɔnmi'ineba la Farasiiduma, birekɔgehi wa. Ya gu' la nɛreba bahɛ saazuo ɛ sɔ'ɔlum la yiŋa, se'ere en sɔi la, yamam mɛhi kan kɛ̃, ti sɛba me han yeti ba kɛ̃ ti ya gu'ura ba.

¹⁴ [Yele boi ya zuo, gɔnmi'ineba la Farasiiduma wa, birekɔgenduma wa. Se'ere en sɔi la, ya dole fãara pokɔpa yiya, gee nɔŋɛ pu'uhi wogerɔ ti nɛreba nyɛ zuo. Ŋwana zuo, ya wan to'e sa'am kãtɛ diimen diimen gulehɛgɔ la tuseto ka tari ka'lam].

¹⁵ Yele boi ya zuo, gɔnmi'ineba la Farasiiduma, birekɔgenduma wa. Ya ni yagehɛ la ateko la tiŋa tihi ti ya ta tee nɛreyinɛ en dagi Yuda buuri, ti a lebege ana wuu yamam la, ba'ahɛ,ya ni iŋɛ en mɛ ti a malum dɛna bugum tiŋa bia sugum nuuren buyi' gana yamam mɛhi.

¹⁶ “Yele boi ya zuo, fɔnɛheduma wa, yamam yeti se'em han pɔ pu'uhegɔ yire la, la ka tari yele, gee se'em en pɔ salema la n boi pu'uhegɔ yire la puan, dela a tum pɔrɛ la en de se'em la'.”

¹⁷ Fɔgɔɔnɔ wa wa, ba ini n tari tuulum, salema la bii pu'uhegɔ yire la en bahɛ n bahɛ ti salema la tara tuulum la?

¹⁸ Ya me le yeti, ‘Se'em wuu n pɔ kaabegɔ bimbeni la, la ka tari yele, gee se'em n pɔ bo'olum la n dɔgɛ kaabegɔ bimbeni la zuo la dela a tum a dɛ.’

¹⁹ Bihɛ yan fɔ se'em, ba ini n tari tuulum, bo'olum la bii kaabegɔ bimbeni la n bahɛ ti bo'olum la tara tuulum la?

²⁰ Bala, se'em woo n pɔ kaabegɔ bimbeni la, pɔ dɛ mɛ la sɛla woo n boi de zuo.

²¹ Se'em woo n pɔ pu'uhegɔ yire la, pɔ la pu'uhegɔ yire la, pɔ de mɛ la se'em daana en boi de puan la.

²² Se'em woo me n pɔ saazuo, pɔ la Yinɛ na'am kuka la, la se'em n zi' ku zuo la.

²³ Yele boi ya zuo, yamam gɔnmi'ineba la Farasiiduma wa, birekɔgenduma wa. Se'ere en sɔi la, ya bo'ori ya pia pia bo'olum pun ta ta' la ziirɔ ti ya yɔ' ti ya dugɛ, la ya zɛsaala za'a, la yele-pigehi pigehi gee tum bahɛ yelekãra sɛ'a en boi nɔze'elego puan dɛna buurɔ, nimbɔ'zɔrɛ la sakerɛ. Yele ana en de ni ya ita gee da bahɛ yele pigehi la me.

²⁴ Fɔnɛheduma wa, ya tugum tubihɛ la zu'a bahɛ, gee vole yugenɛ.

²⁵ Yele boi ya zuo, yamam gɔnmi'ineba la Farasiiduma wa, birekɔgenduma wa. Ya peere la wanɛ la laa poore, gee ba puan pirɛ mɛ la nyika la faaɛ lɔgerɔ ma'a.

²⁶ Farasii fɔɔhi wa. Pee ya wanɛ la puan yia bala ti yiŋa la me wan ana filam.

²⁷ Yele boi ya zuo, yamam gɔnmi'ineba la Farasiiduma wa, birekɔgenduma wa. Ya ani mɛ wuu yɔɔrɔ, ti ba ŋmɛ bɔmbɔrehe peelego iŋɛ tu, ti tu yiŋa ana suŋa, gee ti tu puan pirɛ la ki'in kuba, la dɛgɛ seto woo la.

²⁸ Bala mɛa ti ya yiŋa vom ani tuuntɔɔ nɛreba nɛŋan, gee ti ya puan la dɛna birekɔgenɛ la ŋmɛleŋɔ.

²⁹ Yele boi ya zuo, yamam gɔnmi'ineba la Farasiiduma wa, birekɔgenduma wa. Ya dole mɛta la nɔtɔgeheba la yɔɔrɔ gee dɔla gula yɛla zɛ'ɛta ti ya tɛra tuuntɔɔ duma la,

³⁰ gee yɛta ya mɛhi yeti, ‘Tumam yuum han boni, tu yaabe duma saŋa ha la, tumam yuum kan lagum ka'ɛ ni nɔtɔgeheba la ziim.’

³¹ Ya tɔgeri yele sɛ'a en yuum iŋɛ wa bahera la ya mɛhi zuto, se'ere en la ya dela sɛba en yuum ka'ahɛ nɔtɔgeheba la ziim la yaahi.

³² Yi kɔ'ɔm tum ya ya yaabeduma tuuma la ti la pirɛ.

³³ Bunsɛlenduma wa kampiihi buuri wa Yamam wan iŋɛ la ŋwani piiɛ ti ba kan gakɛ kɛ̃ ya ta bahɛ bugum tiŋa la puan? Dikɛ ya bahɛ bugum la puan?

³⁴ Se'ere zuo, bihɛ mam tum nɔtɔgeheba, yɛm duma, la gɔnmi'ineba. Ti ya ku basɛba, kpa' basɛba, gee basɛba me, ya ŋmɛ'suŋa suŋa ba mɛ ya zamehegɔ yiya la puan, gee dɔla tihi tihi mɛleha ba,

³⁵ Bala zuo ti tuntɔɔduma la woo ziim la ti ba ka'ahɛ timpaberɛ wa zuo la taala wan dɔla ya . Ze'ele tuuntɔɔ daana Ebɛl, ta paaɛ Barakaya dayua Zekariya se'em ti ya ku biŋe tuulum saraa la la kaabegɔ bimbeni la tiŋasuka la.

³⁶ N yeti ya la yelemɛŋerɛ wa, ti nɛrebana wa ziim taala wan dɔla hankana buuri wa.

Yezu kele bo' Yerusalɛm

³⁷ “Yerusalɛm, Yerusalɛm, tinsɛka en kuuri ka nɔtɔgeheba gee lɔbera sɛba ti ba tum a zi'an na la kuga. Saŋa zo'e zo'e ti mam zigera ti n lagehɛ ni fum kɔma wa bɔbeyinɛ wuu nua n kã'ahɛ ka kɔma iŋɛ ka kelumpagehi puan se'em la, gee fum ka boti.

³⁸ Bihɛ, fum yire la n bala nyaa lebege daboo zɛ'a wa.

³⁹ Se'ere en sɔi la, mam yeti fum mɛ wa, ti fum kan le malum nyɛ mam, gura ti fum ta ya'ɛ fum nuurɛ yeti, ‘Sum sirum boi mɛ la se'em daana n wa'am Daana la yu'urɛ puan na la.’ ”