Amatie 20 - ZE'ELEGO PAALEGA

Tuntuneba n boi va'amen

¹ “Saazuo sɔ'ɔlum la ani wuu va'am daana en tari a tiihi wala va'am nyaa yehe bulika yu'uŋɔ yu'uŋɔ ti a ta ɛ tuntuneba ti ba tum a va'am puan.

² En tɔgɛ la tuntuneba la ba dabeherɛ yɔɔrɛ la en de dinaari ayima ku la, a tari ba kiŋɛ la a va'am la puan.

³ En le ta yehe gogo kaareŋa buwai' bɔba la, a nyɛ ti tuntuneba basɛba n zɛ'a yoo da'a la puan,

⁴ ti a yele ba yeti, ‘Yamam me kiŋɛ n tiihi wala va'am la puan ta tum, n wan yɔ ya la nari se'em.’ Ti ba kiŋɛ.

⁵ Ti a le ta yehe wuu wuntɛɛŋa en boi zuo tiŋasuka, la gogo kaareŋa atã puan iŋɛ la bala mɛa.

⁶ Ti la le ta dɛna wuu gogo kaareŋa bunuu zaanuurɛ bɔba, ti a le yehe ta nyɛ ti basɛba zɛ'a, ti a yele ba yeti, ‘Ŋwani ti ya zɛ'a ka'lam yoo beere n yilegɛ daarɛ?’

⁷ Ti ba yeti, ‘Nɛra ka dikɛ tɔ.’ Ti a yele ba yeti, ‘Yamam me kiŋɛ n tiihi wala va'am la puan.’

⁸ Yinɛ n ta ma'ɛ la, ti va'am daana la yele se'em n biheri a tuuma la yeti, ‘Yi' tuntuneba la, la fum bo' ba, ba yɔɔrɛ. Pɔhɛ sɛba n wa'am pooren na la ta paaɛ yia duma la.’

⁹ Sɛba n wa'am gogo kaareŋa bunuu zaanuurɛ bɔba la n paaɛ la, a bo' ba za'a la dabeherɛ yɔɔrɛ dabeherɛ yɔɔrɛ en dinaari ayima.

¹⁰ Lan paaɛ sɛba n wa'am yia la, ba ti'ihɛ ti bamam wan to'e ni gaŋɛ poorenduma la, gee ba za'a to'e la dabeherɛ yɔɔrɛ mɛa en de dinaari ayima ayima.

¹¹ Ban to'e la, ba gɔgeni mɛ la va'am daana la,

¹² yɛta yeti, ‘Poorenduma wa tum la gogo kaareŋa buyina ma'a gee ti fum bahɛ ti ba zuna la tumam, tumam n tugum tum ni bala la bulikan ha na, ti wuntɛɛŋa wuŋɛ tu.’

¹³ Gee va'am daana la lebehe ba ayima yeti, ‘N zɔ, mam ka tuue ya, ya ka ku ni nuurɛ la mam la dabeherɛ yɔɔrɛ en de dinaari ayima?

¹⁴ Tari ya sɛla n de ya dinɛ la kina. Mam mɛŋa n boti n yɔ poorenduma wa ti la zuna wuu mam bu ya se'em la.

¹⁵ N ka tari sore ti n iŋɛ mam boti se'em la n mɛŋa bunɔ? Bii ya yuunɛ mɛ la n bu'a la?’

¹⁶ Bala, sɛba n tole nɛŋa wan ta yee pooren, ti sɛba n yee pooren wan ta wa'am na tole nɛŋa.”

Yezu le tɔgɛ a kum la a vo'ore

¹⁷ Yezu en wa yɛ'a zɔna Yerusalɛm la, a doohe la a zahereba pia la bayi' la ma'a, ban ye' la, ti a yɛta ba sore la zuo yeti,

¹⁸ “Bihɛ ya, tu ye' zɔna la Yerusalɛm wa. Ba wan ta dikɛ Asaala Dayua wa iŋɛ malema kiinduma la gɔnmi'ineba nu'uhen, ti ba gakɛ en ti a dela a ki.

¹⁹ Ba nyaa wan dikɛ en iŋɛ sɛba n dagi Yuuduma la nu'uhen, ti ba ɛregɛ en, gee ŋmɛ' en, gee tari en ta kpa'. Gee dabeha atã daarɛ, a wan vo'e.”

Yɔn la Yemesi ma suhega

²⁰ Ti Zebedii dayɔɔhi ma wa wa'am Yezu zi'an na la a dayɔɔhi la, paaɛ na kpa' duma Yezu nɛŋan, suhɛ en ti a iŋɛ se'ere bo' en.

²¹ Ti Yezu soke en yeti, “Fum boti la beni?” Ti pɔka wa yeti, “Bu sore ti n dayɔɔhi siyi wa, ka yima ta zi'ire fum zuɔ nu'o ti kayima me ta zi'ire fum gɔbega nu'o fum sɔ'ɔlum la puan.”

²² Ti Yezu lerege yeti, “Ya ka mi' sɛla ti ya sɔkera wa. Yamam wan nyaŋɛ nyu wula wa ti mam bɔna bini ti n nyu ka puan wa?” Ti ba yeti, “Tu wan nyaŋɛ.”

²³ Ti Yezu yele ba ti, “Ya sirum wan nyaŋɛ nyu mam wula wa puan. Gee ya zi'ire n zuɔ nu'o la n gɔbega nu'o bɔba dagi mam n wan bo' bala. Bilam dela sɛba ti mam Sɔ maahum ka ti ka dɛna ba dinɛ la zi'an.”

²⁴ Zahereba pia la n wum dina wa la, ba suure n nyiie mɛ la ba suurɔ tu yi' la.

²⁵ Gee Yezu yi ba mɛ paaɛ a zi'an na yele ba yeti, “Ya mi ti, sɛba n dagi Yuuduma nɛheduma tari la yɛla ɔ̃bela ba nɛreba, ti ba nɛrekãreba la me pɛregera ba bala mɛa me.

²⁶ Gee la kan dɛna bala yamam puan, gee se'em en boti a dɛna nɛrekãtɛ ya puan, dela a dɛna ya yameŋa.

²⁷ Ti se'em me n boti a bɔna ya nɛŋa, a dɛna ya da'aberɛ,

²⁸ Wuu Asaala Dayua la n ka wa'am na ti ba tuna bɔ'ɔra en, gee a tugum tuna bɔ'ɔra, pun ta dikɛ a vom yɔ to'e nɛreba zo'e zo'e se'em la.”

²⁹ Ban baheri Yeriko la, ti nɛrekuuŋɔ zo'e zo'e n doohe a poore.

³⁰ Bilam bilam Ti Fɔɔhi siyi zi'a sore nuuren. Ban wum ti Yezu n dole bilam tɔla la, ba voole mɛ yeti, “Daana, zɔ tu nimbu'ɔ, Deviti dayua wa.”

³¹ Ti Nɛrekuuŋɔ la tahɛ ba la ninmu'urɛ yeti, ŋmɛkɛ ya nɔya la, gee ba tugum malum voole gaŋɛ la bala yeti, “Zɔ tu nimbu'ɔ, Daana, Deviti dayua wa.”

³² Ti Yezu teke ze'ele su'u, gee yi ba yeti, “Ya boti n iŋɛ la beni bo' ya?”

³³ Ti ba yeti, “Daana, bahɛ ti tu nini wa nyɛta.”

³⁴ Ti la ve'e Yezu paaɛ paaɛ, ti a paaɛ kalum ba nini la. Bilam bilam ti ba nini la nyɛta ti ba doohe en.