Amatie 2 - ZE'ELEGO PAALEGA

Baŋereba wa'am na bihɛ Yezu

¹ Naba Hɛrɔd saŋa puan, ban wa dɔgɛ Yezu Bɛtelehɛm en boi Yudiya puan ba'ahɛ la, bihɛ ya, baŋereba duma ze'ele dapɔya bɔba ha wa'am Yerusalɛm na,

² sɔkera yeti, “Bɛha ti ba dɔgɛ se'em en de Yuuduma naba la? Beni zuo, tu nyɛ la ka ŋmarebila dapɔya ha, wa'am na ti tu na'ahɛ en.”

³ Naba Hɛrɔd en wum ŋwana la, dabeem n kɛ en paaɛ paaɛ, la Yerusalɛm nɛreba za'a;

⁴ ti a yi' malema kiinduma la za'a, la nɛreba la gɔnmi'ineba lagehɛ na viihɛ ba zi'an ti ba wan dɔgɛ Kiresta la.

⁵ Ti ba yele en yeti, “Bɛtelehɛm n boi Yudiya puan, Se'ere n sɔi la, nɔtɔgeha la n gulehɛ se'em biŋe n bala:

⁶ ‘Fum Bɛtelehɛm, n boi Yuda puan wa, kan dɛna timbila Yuda naduma nɛŋan; se'ere n sɔi la, fum puan ti naba wan yehe na; dɛna dunkiina bo' mam nɛreba Iziraleduma.’ ”

⁷ Ti Hɛrɔd yi' baŋereba la bããlam ti a baŋɛ ba zi'an, hansɛka mɔpi ti ba nyɛ ŋmarebila la.

⁸ Gee nyaa tum ba Bɛtelehɛm yeti, “Kiŋɛ ya ta ɛ bia la ninmu'urɛ, ya ha nyɛ ka, bahɛ ya ti n tuberɛ wum, ti mam me kiŋɛ ta na'ahɛ ka.”

⁹ Ban wum Naba la sɔhega la ba'ahɛ la, ba yehe mɛ yɛ'a, bihɛ nyɛ ti ŋmarebila n bala, bɔna ba nɛŋa, ŋmarebila sɛka ti ba nyɛ dapɔya yia la, ti ka kina tara tara ta teke zi'an ti bia la bɔna la.

¹⁰ Ban nyɛ ti ŋmarebila la, ba nyɛɛm la nyɛɛŋɔ en ka tari makerɛ,

¹¹ Ti ban kɛ̃ yire la puan la, ba nyɛ bia la mɛ la ka ma Mɛɛri. Ti ba kpa' duma na'ahɛ ka, gee nyaa yu'uhɛ ba tuulum lɔgerɔ tapɔtɔ yehe salema, tuulum digelum la sɛla en tari nyuuŋo suŋɔ ti ba yi'ira Mɛɛ bo' ka.

¹² Yinɛ n ka'am ba zaaheŋɔ puan la ninmu'urɛ yeti, ba da lebe Naba Hɛrɔd zi'an la zuo, ban lebere ba mɛŋa tiŋa la, ba tee la sore deyima.

Ba zɔ loŋe Igipiti

¹³ Baŋereba la n kule la, ti Daana suŋera niiɛ a mɛŋa bo' Yosefe zaaheŋɔ puan yeti, “Ihege tari bia la, la ka ma zɔ loŋe Igipiti ta bɔna bini gura se'em ma'a ti n wan ta yele fum ti fum lebe na. Se'ere n sɔi la, Hɛrɔd maahum mɛ ti a ɛ bia la ku ka.”

¹⁴ Ti Yosefe ihege, tari bia la, la ka ma zɔ loŋe Igipiti yu'uŋɔ,

¹⁵ ta bɔna bilam tara tara ti Hɛrɔd ta ki. Yele dina iŋɛ ti la doohe la se'ere ti Daana pun tɔgɛ doohe a nɔtɔgeha puan yeti, “Igipiti puan na, ti mam yi' n dayua la.”

Kɔmbibehi kɔreŋɔ

¹⁶ Hɛrɔd n ta baŋɛ ti baŋereba la pã'ahɛ en mɛ la, a ukɛ mɛ kankaŋi, gee bo' nuurɛ ti ba doohe kɔrum bibudibeto sɛba woo n boi Bɛtelehɛm la ka kɔrɔmkɔrɔm za'a, kɔmsɛba n de yuuma ayi' bii sɛba n pun ka paaɛ bala, doohe la hansɛka ti a wum ti baŋereba duma la tɔgɛ bo' en la.

¹⁷ Dina wa tum doohe la se'ere ti Yɛremiya nɔtɔgeha la yuum purɛ yeti,

¹⁸ “Fabelegɔ en ze'eti Arama tiŋa na, kaahi dɔɔrɔ la fabelegɔ n voole baha na. Arakɛle en kele a kɔma beere buuri zuo, a zagehi pa'ahegɔ mɛ, se'ere n sɔi la, ba ka boi.”

Ba ze'ele Igipiti lebe na

¹⁹ Hɛrɔd en ta ki la, ti Yosefe yeti a bihɛ, ti Daana suŋera en bala niiɛ a mɛŋa zaaheŋɔ puan bo' en yeti,

²⁰ “Ihege, tari bia la, la ka ma la lebe Izirale tiŋa puan, se'ere n sɔi la, sɛba n dole bia la nama la ki ya.”

²¹ Ti Yosefe ihege tari bia la, la ka ma la lebe Izirale tiŋa.

²² Gee Yosefe en ta baŋɛ ti Akelaus en sooe a sɔ Hɛrɔd na'arɛ dɛna Naba Yudiya puan la, dabeem en kɛ̃ en ti a ka bɔta ti a lebe. Gee Yinɛ en ka'am en ninmu'urɛ zaaheŋɔ puan la, a ihege mɛ kiŋɛ Galilii.

²³ A ta kɛ̃'ɛ̃ra la tiŋa ti ba yi'ira Nazareti, ti la bahɛ ti nɔtɔgeheba n tɔgɛ se'ere biŋe la wa'am sira na, “Tu wan yi'ira en ti Nazaareŋa.”