Amatie 15 - ZE'ELEGO PAALEGA

Kiinduma malema

¹ Pooren ti Farasiiduma la gɔnmi'ineba ze'ele Yerusalɛm wa'am a zi'an na soke en yeti,

² “Ŋwani ti fum zahereba la galum kiinduma malema la? Ba ka peere nu'uhi gee dita.”

³ Ti Yezu lerege ba yeti, “Gee ŋwani ti yamam galena Yinɛ pa'alegɔ ya buuri malema zuo?

⁴ Se'ere en sɔi la, Yinɛ yeti, ‘Na'aha fum sɔ la fum ma, fum se'em en tɔgɛ be'em bo' fum sɔ bii fum ma dela fum ki.’

⁵ Gee yamam yeti, nɛra han yele a sɔ bii a ma yeti, suŋɛ se'ere woo ti fum wan nyɛ ni mam zi'an la, mam dikɛ de bo' la Yinɛ. Bala zuo, nɛre-ina daana ka na'aha a sɔ le yɛ'ɛha.

⁶ Bala, ya buuri malema wa zuo, ti ya ka bihɛ nyɛ Yinɛ yelefum wa.

⁷ Birekɔgehi wa, Azaaya en purɛ ya yele se'em la dela yelemɛŋerɛ. A yeti,

⁸ ‘Nɛrebana wa na'ahɛ mam mɛ la ba nɔya, gee ba suya zaaɛ mɛ la mam,

⁹ Ba pu'uhi mam la yoo, Ba pa'ali la asaala yɛla gee yeti Yinɛ pa'alegɔ.’ ”

Yelesɛ'a en galeni nɛra

¹⁰ Ti Yezu yi' nɛrekuuŋɔ la paaɛ a nɛŋan na yele ba yeti, “Kelehe ya, la ya bɔkɛ.

¹¹ Dagi sɛla en ki'ire nɛra nuuren en galeni nɛra, gee sɛla en ze'eti a nuuren na.”

¹² Pooren ti a zahereba la paaɛ en, yele en yeti, “Fum mi ti la daam Farasiiduma la mɛ, ban wum fum yele se'em la?”

¹³ Ti Yezu lerege ba yeti, “Tisɛka ti mam Sɔ en boi saazuo la ka sɛ wan vuuɛ.

¹⁴ Bahɛ ya ba ba ma'a, ba dela fɔɔhi en pa'ala fɔɔhi. Fua han data ka tadaana, ba za'a wan lu boko puan.”

¹⁵ Gee Pita yele en yeti, “Garehɛ makerɛ wa bo' tu.”

¹⁶ Ti a yeti, “Yamam me kelum ka tara bɔkerɛ?

¹⁷ Yamam ka nyɛti ti sɛla woo en ni doohe nuurɛ puan kɛ̃ ni sige la puuren ta tole yehe?

¹⁸ Gee sɛla en yeheri nuuren na, ze'eti la suure puan na. Dina en galeni nɛra.

¹⁹ Se'ere en sɔi la, suure la puan ti be'em ti'ihegɔ, nɛrekua, kabohi, yaluntuuma, nageyigum, aze' nyɛ daana pumparema, nɛreba tua zɛ'ɛta na.

²⁰ Bana en galeni nɛra, gee a ka pee nu'uhi gee dita ka galeni nɛra.”

Keenan pɔka sakerɛ

²¹ Ti Yezu bahɛ bilam, gee kiŋɛ Taai la Sidɔn sɔ'ɔlum puan.

²² Bilam bilam ti Keenan pɔka en ze'ele tinkaŋa mɛa puan yehe na vɔɔla baha na yeti, “Zɔ en nimbu'ɔ, Daana, Deviti dayua wa, en poyua ti kulekpa'bɛ'a tara ka mɛleha.”

²³ Gee Yezu ka lerege en se'ere. Ti a zahereba la ɛbegɛ en yeti, “Sa'ɛ en ti a kiŋɛ gee a ba' vɔɔla mɛ dɔla tɔ.”

²⁴ Ti Yezu lerege yeti, “Ba tum mam la Izirale piihi se'ehi en bɔregɛ la ma'a zi'an na.”

²⁵ Gee pɔka wa wa'am me na kpa' duma a nɛŋan, yɛta yeti, “Daana suŋɛ mam.”

²⁶ Ti Yezu lerege en yeti, “La dagi ma'a ti n dikɛ kɔma dia lobe bo' baahi.”

²⁷ Ti Pɔka la yeti, “Ɛ̃ɛ n Daana, gee baahi la diti di zɔra la en zɔgeri si duma dia zi'an la mɛ.”

²⁸ Bilam ti Yezu lerege pɔka wa yeti, “Pɔka wa, fum sakerɛ zo'e ya, la iŋɛ bo' fum wuu fum boti se'em la.” Ti pɔka wa poyua la nyɛ ka tibegɔ bilam bilam.

Yezu tibɛ nɛreba zo'e zo'e

²⁹ Yezu en ta bahɛ bilam la, a kiŋɛ doohe la Galilii ateko la, ta zom zoore zuo zi'ire bilam.

³⁰ Ti nɛrekuuŋɔ kina a zi'an na, tara wɔbehi, kɔɔrenɔ, fɔɔhi, gɔɔnɔ, la basɛba zo'e zo'e, tari ba na gã'arɛ Yezu nɛŋan, ti a me tibɛ ba.

³¹ Ti la iŋɛ nɛrekuuŋɔ la pakerɛ paaɛ paaɛ, la ban nyɛ gɔɔnɔ en tɔgeri, ti kɔɔrenɔ kina, ti wɔbehi kina, ti fɔɔhi nyɛta. Ti ba pɛgɛra Izirale Yinɛ la.

Tuha anaahi diihego

³² Pooren ti Yezu yi' a zahereba la paaɛ a nɛŋan yeti, “Nɛreba wa tari mam la nimbaalega, se'ere en sɔi la, ba boi la mam la dabeha atã en ŋwana gee ka tara sɛla wan di. N ka boti n bahɛ ba ti ba kule la kom. Se'ere en sɔi la, ba ta'am ta lige sore.”

³³ Ti a zahereba yele en yeti, “Bɛha ti tu wan nyɛ dia zo'e muɔ wa puan diihe nɛrekuuŋɔ kuna taaba wa?”

³⁴ Ti Yezu soke ba yeti, “Boroboro ba lɛ ti ya tara?” Ti ba yeti, “Ba yopɔi la zim fii wa.”

³⁵ Ti Yezu bo' nɛrekuuŋɔ la nuurɛ ti ba zi'ire tiŋa.

³⁶ Ti a to'e boroboro bayopɔi la la zim la. En bo' fara ba'ahɛ la, a fige boroboro la mɛ bo' a zahereba, ti bamam me dikɛ tɔrɛ nɛrekuuŋɔ la.

³⁷ Ti ba za'a di ta tigɛ, ti a zahereba la doohe lagehɛ boroboro zɔra la ti ba tigɛ gee bahɛ la, pirɛ pitɔ tuyopɔi.

³⁸ Sɛba en di la dela buraahi tuha anaahi, ti kɔma la pɔgehi kãlɛ ka pa'ahɛ.

³⁹ En keehe nɛrekuuŋɔ la ba'ahɛ la, a zom la uureŋɔ kiŋɛ Magadan tiŋa.