Amatie 10 - ZE'ELEGO PAALEGA

¹ Ti Yezu yi' a zahereba pia la bayi' la, bo' ba kpe'eŋo ti ba ta'na sɛfi'iha gee sa'aha ba nɛreba puan, gee tibera bã'ahi la teem woo.

² A tuntuneba pia la bayi' la yu'ura en ŋwana; Yia dela Simɔn, se'em ti ba Yi'ira Pita la, la a suuɔ Anduru, Yemesi en de Zebedii dayua, la a suuɔ Yɔn,

³ Filipi la Batolomi, Tɔmasi la Matu kuba tɔ'ɔha la, Yemesi en de Alifeyusi dayua la, la Tadeyusi,

⁴ Simɔn en de Keenan buuri la, la Yudasi Isikariyɔte se'em en wan koohe Yezu la.

Yezu zahereba la tuunɛ

⁵ Yezu zahereba pia la bayi' wa, ti a tum gee kagɛ ba yeti, “Da kiŋɛ ya sɛba en dagi Yuuduma buuri la zi'an zi'an, da kɛ̃ ya Samariyaduma tinsɛka puan.

⁶ Gee tugum kiŋɛ ya Izirale piihi wa en bɔregɛ wa zi'an.

⁷ Yan kini la, muuli ya faarɛ yelefum wa yeti, ‘Yinɛ sɔ'ɔlum la lɛm ya mɛ na.’

⁸ Tibɛ ya bã'duma, ihege ya kum, tibɛ ya kunkɔma, sa'ahɛ ya kulekpa'bɛ'ɛhi. Ya to'e la zaŋa, bala, bo' ya zaŋa.

⁹ Da dikɛ ya salema bii salempɛɛlega bii salema a sɛ'a ti ba yi'ira kɔpa ya sɛgana puan,

¹⁰ da dikɛ ya tapɔtɔ, futo tuyi' bii tagera pirefum buyi', bii doore, se'ere en sɔi la, ba wan bo' tuntuneba ba nuurɛ dia.

¹¹ Tinkãtɛ bii timbila sɛka woo puan ti ya kɛ̃, soke ya baŋɛ se'em en boi ka puan dɛna nɛresuŋɔ, la ya bɔna bilam ta paaɛ ya yɛhega.

¹² Ya han kɛ̃ yire puan, ni pu'uhɛ ya.

¹³ Yire la duma han to'e ya, bahɛ ti ya suma'ahum la sige de puan, gee ba han ka to'e ya, luke ya suma'ahum ka'a la.

¹⁴ Se'em se'em han ka to'e ya bii kelehe ya yelefum la, yan yeheri la, kpa'ahɛ ya nama puuhego bahɛ tinkaŋa bii yidinɛ puan.

¹⁵ N yeti ya la yelemɛŋerɛ ti, gakerɛ daarɛ la, la wan ta ana ma'ma' bo' Sodom la Gomora tihi gana tinkaŋa taaba.

Mɛlehegɔ kini na

¹⁶ “Bihɛ ya, mam tuni ya mɛ wuu piihi la sahi tiŋasuka. Wikɛ wuu kampiihi la, gee dɛna ya naana wuu dayɛma la.

¹⁷ Mina ya ba suŋa suŋa, se'ere en sɔi la, bamam en wan nyɔgɛ ya kiŋɛ tugum zi'ihi, gee ŋmɛ' ya ba zamehegɔ yiya la puan.

¹⁸ Ba wan tari ya kiŋɛ timbihereba la naduma zi'ihen mam zuo, ti la dɛna sɛla n gã' bo' bamam la sɛba n dagi Yuda buuri la.

¹⁹ Ba han ta dikɛ tihɛ, da fabele ya, yan wan tɔgɛ se'em bii yan wan lebehe ba se'em. Yan wan yele se'ere la, wan dikɛ bo' ya hankaŋa puan.

²⁰ Se'ere en sɔi la, la dagi yamam mɛhi en tɔgeri, gee ya Sɔ Sia la en tɔgeri dɔla ya puan.

²¹ Suuɔ wan ta kɔɔha suuɔ ti ba ku, ti sɔ koohe a bia, ti kɔma me ihege la ba dɔgereba ku ba.

²² Nɛra woo wan ta yaaɛ ya mam zuo, gee se'em n ŋmibe ze'ele ta paaɛ ba'ahegɔ n wan nyɛ faarɛ.

²³ Ba han mɛleha ya tiŋa kayima puan, zɔ ya loŋe tiŋa kayima. N yeti ya la yelemɛŋerɛ wa, ti ya kan ta'am lomehe Izirale tihi wa ba'ahɛ gee ti Asaala Dayua wa lebena.

²⁴ “Zahera ka gani a pa'ala, bii yameŋa gana ka kpɛ'ɛma.

²⁵ La ani suŋa ti zahera ani wuu a pa'ala, ti yameŋa ana wuu ka kpɛ'ɛma. Ba han yi' yidaana la Beelezebule, yu'yooro tuni taaba ti ba nyaa wan yi'ira a yire nɛreba la?

Se'em en de tu zɔta

²⁶ “Bala zuo, da tara ya dabeem la ba. Se'ere en sɔi la, sɛla ka boi pi' kan pilege, sɛla me ka boi sugɛ kan niiɛ na.

²⁷ Mam yele ya sɛla la lika puan, muuli ya de peelumen. Ban waahum sɛla bo' fum la, zom gɔhegɔ muulɛ de.

²⁸ Da zoti ya sɛba n wan ta'am ku inganɛ la ma'a gee kan ta'am ku sia la. Gee tugum zoti ya se'em en wan ta'am sagum inganɛ la sia la bugum tiŋa la puan.

²⁹ Ba ka koohe amɔkiiha duma ba yi' la kɔbevuŋa ma'a? Gee amɔkiiha la ayima me ka luti tiŋa ti ya Sɔ wa ka mina.

³⁰ La ya zuo zonto za'a a kãalɛ ba mɛ.

³¹ Bala zuo, da tara ya dabeem, se'ere en sɔi la, yamam tari tuulum gana amɔkiiha duma en zo'e.

³² “Se'em woo en ze'ele nɛreba tiŋasuka purɛ mam yu'urɛ suŋa suŋa, mam me wan ta ze'ele en Sɔ en boi saazuo ha la nɛŋan me purɛ a yu'urɛ suŋa suŋa.

³³ Gee Se'em woo en ze'ele nɛreba tiŋasuka zagehɛ mam, mam me wan ta ze'ele n Sɔ en boi saazuo ha nɛŋan zagehɛ en.

Dagi suma'ahum gee gakerɛ

³⁴ “Da ti'ihɛ ya ti mam wa'am na ti n tari la suma'ahum wa'am timpaberɛ wa zuo na, mam ka wa'am na ti n tari suma'ahum na, gee su'a.

³⁵ Se'ere en sɔi la, mam wa'am na ti n dikɛ la nɛra sa'ahɛ la sɔ, dikɛ poyua sa'ahɛ la ka ma, dikɛ poyua sa'ahɛ la ka danyaama.

³⁶ Nɛra dima paaɛ paaɛ ze'eti la a mɛŋa yire puan na.

³⁷ Se'em woo en nɔŋɛ a sɔ bii a ma gana mam ka nari ma. Se'em woo me n nɔŋɛ a dayua bii poyua gana mam ka nari mam.

³⁸ Se'em wuu n ka sakɛ dikɛ a pumpuuredɔɔ zi dɔla mam ka nari ma.

³⁹ Se'em woo n zigeri ti a gu' a vom wan bɔregɛ bu bahɛ. Gee se'em woo me n ka gagɛ a vom yele mam zuo wan nyɛ vom.

Yɔɔrɛ

⁴⁰ “Se'em woo en to'e ya, to'e la mam, ti se'em woo en to'e mam me to'e la se'em en tum mam na la.

⁴¹ Se'em en to'e nɔtɔgeha, en de nɔtɔgeha la zuo, wan to'e nɔtɔgeha yɔɔrɛ. Ti se'em me en to'e nɛretuntɔɔ en de nɛretuntɔɔ la zuo wan to'e nɛretuntɔɔ yɔɔrɛ.

⁴² Se'em woo en pun dikɛ ko'ma'ahega la wala bo' bumbibehi sina wa ayima ti ba de mam zahereba zuo, n yeti ya la Yelemɛŋerɛ ti, ba se'em kan koŋe ba yɔɔrɛ.”