Amatie 1 - ZE'ELEGO PAALEGA

Yezu en de Kiresta la tuuhum

¹ Gulehegɔ wa dela tuuhum en de Yezu Kiresta en Deviti dayua, Aberaham dayua la.

² Aberaham dela Aziki sɔ, ti Aziki dɛna Yakɔbe sɔ, ti Yakɔbe dɛna Yuda la a suurɔ sɔ,

³ Ti Yuda dɛna Pɛrezi la Zera sɔ, ti ba ma dɛna Tama. Ti Pɛrezi dɛna Hɛzirɔn sɔ, ti Hɛzirɔn dɛna Aram sɔ,

⁴ Ti Aram dɛna Aminadabi sɔ, ti Aminadabi dɛna Nason sɔ, ti Nason dɛna Salemon sɔ.

⁵ Ti Salemon dɛna Boazi sɔ, ti a ma dɛna Arahab. Ti Boazi dɛna Ɔbɛd sɔ, ti a ma dɛna Arutu. Ti Ɔbɛd dɛna Yesi sɔ,

⁶ ti Yesi dɛna Naba Deviti sɔ. Ti Deviti dɛna Solomɔn sɔ, ti a ma dɛna Yuriya pɔga la.

⁷ Ti Solomɔn dɛna Yerobuam sɔ, ti Yerobuam dɛna Abiya sɔ, ti Abiya dɛna Asaf sɔ.

⁸ Ti Asaf dɛna Yehosafate sɔ, ti Yehosafate dɛna Yoram sɔ, ti Yoram dɛna Yuziya sɔ.

⁹ Ti Yuziya sɔ dɛna Yotan, ti Yotan sɔ dɛna Ahazi, ti Ahazi sɔ dɛna Hɛzekaya.

¹⁰ Ti Hɛzekaya sɔ dɛna Manaasɛ, ti Manaasɛ sɔ dɛna Amɔsi, ti Amɔsi dɛna Yoseya.

¹¹ Ti Yoseya sɔ dɛna Yekonaya la a suurɔ. Sankaŋa en de apɛregɛ loŋe Babilɔn la.

¹² Ti apɛregɛ-loŋe Babilɔn saŋa la pooren, ti Yekonia dɔgɛ a dayua Salatiɛle, ti Salatiɛle dɛna Zerubabɛle sɔ,

¹³ ti Zerubabɛle dɛna Abiyud sɔ, ti Abiyud dɛna Eliyakim sɔ, ti Eliyakim dɛna Azɔr sɔ,

¹⁴ ti Azɔr dɛna Zadɔki sɔ, ti Zadɔki dɛna Akim sɔ, ti Akim dɛna Eliyud sɔ,

¹⁵ ti Eliyud dɛna Ɛliyaza sɔ, ti Ɛliyaza dɛna Matan sɔ, ti Matan dɛna Yakɔbe sɔ,

¹⁶ ti Yakɔbe dɛna Yosefe sɔ, Mɛɛri sira la sɔ, Mɛɛri se'em en dɔgɛ Yezu, se'em ti ba yi'ira Kiresta la.

¹⁷ Bala, buuri tuuhum la za'a, ze'ele Aberaham ta paaɛ Deviti dela buuri tuuhum pia la anaahi. Ze'ele Deviti ta paaɛ apɛregɛ-loŋe Babilɔn saŋa la dela, buuri tuuhum pia la bunaahi. Ze'ele a apɛregɛ loŋe Babilɔn ta paaɛ Kiresta kinɛ saŋa la, me dela buuri tuuhum pia la anaahi.

Yezu en de Kiresta dɔgum

¹⁸ Nananawa, Yezu en de Kiresta la dɔgum en doohe la sadɔtɔ kuna. Lan wa eŋa ti a ma Mɛɛri yeti a ele Yosefe la. Gee se'em ma'a ti ba ta yeti ba nyaa zi'ire la taaba la, a nyɛ ti pun tara la puurɛ, Fa'a Sia la paŋa puan.

¹⁹ Gee Yosefe a sira la, ka bɔta a diihe en vi nɛreba nɛŋan la, maahum mɛ ti a bahɛ en bããlam.

²⁰ Gee en ti'ihɛ ku ti a iŋɛ ŋwana wa la, ti Yinɛ suŋera niiɛ a mɛŋa bo' en zaaheŋɔ puan yi' en yeti, “Yosefe, Deviti dayua, da tara dabeem ti dabeem ti fum to'e Mɛɛri ti a dɛna fum pɔga. Se'ere sɔi la, bisɛka puurɛ ti a tara wa, dela Fa'a Sia la paŋa n bahɛ ti la iŋɛ bala.

²¹ A wan dɔgɛ la budibela ti fum sigɛ ka yu'urɛ Yezu. Se'ere en sɔi la, eŋa n yeti a faaɛ a nɛreba ba be'em puan bahɛ.”

²² Yele ana za'a iŋɛ ti la bahɛ ti Daana la en tɔgɛ se'em doohe a nɔtɔgeha puan la wa'am sira na. La yeti,

²³ “Bihɛ, pɔgesakãherɛ wan nyɔkɛ puurɛ dɔgɛ budibela, ti ba sigɛ ka yu'urɛ Emanuwɛl.” De vuurɛ dela, “Yinɛ boi la tɔ.”

²⁴ Yosefe en ihege a guum la puan la, a tum doohe la Daana suŋera la en bo' en nuurɛ se'em la, to'e Mɛɛri ti a dɛna a pɔga.

²⁵ Gee Yosefe ka makɛ naaɛ la Mɛɛri ta paaɛ se'em ma'a ti Mɛɛri dɔgɛ budibela la, ti Yosefe sigɛ ka yu'urɛ Yezu.