Amarkɩ 9 - ZE'ELEGO PAALEGA

¹ Ti Yezu yele ba yeti, “N yeti ya la yelemɛŋerɛ paaɛ paaɛ, ti yan ze' ka'lam wa, ya sɛba kan ki' gura ti ya nini ta nyɛ ti Yinɛ sɔ'ɔlum wa wa'am na la paŋa.”

Yezu iŋa teere

² Dabeha ayoobe n tole, ti Yezu tari Pita, Yemesi, la Yɔn ti ba zom zoore zuo ha ba ma'a. Ba nyɛ la Yezu iŋa n tee ba nɛŋan,

³ ti a futo la nyagera gee pelege yeri yeri pelegere se'ere taaba ti nɛra ka bɔna timpaberɛ wa zuo wan ta'am dikɛ sɛla pee lɔkɔ ti kɔ yehe paaɛ bala.

⁴ Ti ba yeti ba bihɛ ti Elia la Moose n bala tɔgera la Yezu.

⁵ Ti Pita yele Yezu yeti, “Pa'ala, ka'lam bɔŋa ani suŋa bo' tu. Bala bahɛ ti tu ti' suga atã ka'lam, fum deyima, Moose deyima, la Elia me deyima.”

⁶ Pita yeen daa ɛ baarena mɛ ka mina n yeti sɛla se'ere en sɔi la, dabeem n ba' kɛ̃' ba.

⁷ Ti sagbanɛ zibege na pi' ba, ti kua ze'ele sagbanɛ la puan tɔgɛ bahɛ na yeti, “Mam mɛŋa Dayua n ŋwana, se'em ti mam nɔŋɛ, kelehe ya en!”

⁸ Bilam bilam ti ba limehe kaaɛ, ka nyɛ nɛra nɛra gee gee la Yezu ma'a.

Elia lɛbega na

⁹ Ban ze'ele zoore la zuo sigera na la, ti a ka'am ba, ti ba da yele nɛra nɛra sɛla ti ba nyɛ gura ti Asaala Dayua wa ta vo'e a kum la puan na.

¹⁰ Bala ti ba tara yele wa ba ma'a, ba suya puan gee nyaa ti'iha a vo'e a kum la puan vuurɛ en de sɛla.

¹¹ Ti ba soke en yeti, “Ŋwani ti gɔnmi'ineba la yeti, Elia wan wa'am yia na?”

¹² Ti Yezu lerege ba yeti, “Eliya en sirum wan wa'am yia na, la a malum ze'ele sɛla woo suŋa. Ŋwani ti ba ye gulehɛ yeti, Asaala Dayua la wan doohe namehegɔ zo'e zo'e puan tole ti ba zeem en?

¹³ Gee mam yeti ya ti Elia pun wa'am mɛ na, ti nɛreba iŋɛ en ban boti se'em wuu ban pun gulehɛ a yele se'em la.”

Yezu tibɛ budibela n tari Kulekpa'bɛ'a

¹⁴ Ban ze'ele zoore la zuo sige na paaɛ Yezu zahereba basɛba la zi'an la, ba nyɛ ti nɛrekuuŋɔ n kaaɛ ba mum, ti gɔnmi'ineba la basɛba ŋmɛ'ɛra nɔkpe'ene la ba.

¹⁵ Nɛrekuuŋɔ la n nyɛ en la, la iŋɛ ba la pakerɛ, ti ba zɔ tu'uhɛ en, pu'uhɛ en.

¹⁶ Ti Yezu soke ba yeti, “Beni nɔkpe'ene ti ya ŋmɛ'ɛra la ba?”

¹⁷ Ti Nɛra ayima ze'ele nɛrekuuŋɔ la puan lerege en yeti, “Pa'ala, mam tari la n dayua wa wa'am fum zi'an na, se'ere en sɔi la, Kulekpa'bɛ'a n daani en ti a pun kan ta'am tɔgɛ.

¹⁸ Kulekpa'bɛ'a wa han ni ta gbirege en, a ni zɛkɛ en mɛ fɔbɛ timpaberɛ, ti nɔtɔ-fulunfuka gala, ti a ɔbera nyɛna, gee kuhɛ kankaŋi. Ti mam yele fum zahereba wa ti ba sa'ɛ Kulekpa'bɛ'a wa, gee ba ka nyaŋɛ.”

¹⁹ Ti Yezu lerege ba yeti, “Yamam akataresakerɛ saŋa-duma wa, mam wan bɔna la ya yuue la ŋwani? Mam wan doohe ya paaɛ la ŋwani beene? Tari ya en na bo' mam.”

²⁰ Ti ba tari bia la paaɛ a zi'an. Kulekpa'bɛ'a la en nyɛ Yezu la, a fɔbɛ bia la la timpaberɛ ti ka bilena kaara ti nɔtɔ-fulunfuka gala.

²¹ Ti Yezu soke bia la sɔ yeti, “La daam bia wa yuue la ŋwani?” Ti a yeti, “La pɔhɛ en la a bumbilemen ha.

²² Kulekpa'bɛ'a wa ni ta'am zɛ en mɛ lobe bugum bii ko'om puan, zigera a sagum en. Gee fum han wan nyaŋɛ iŋɛ sɛla, zɔ tu nimbu'ɔ gee suŋɛ tɔ.”

²³ Ti Yezu yele en yeti, “Fum han wan nyaŋɛ! Sɛla woo wan tum bo' se'em daana n tari sakerɛ.”

²⁴ Bilam bilam ti bia la sɔ la kaahɛ buki yeti, “N sakɛ ya, suŋɛ mam en bu'uri wa.”

²⁵ Yezu en nyɛ ti nɛrekuuŋɔ la zoti na la, ti a tahɛ Kulekpa'bɛ'a la yeti, “Fum Kulekpa'bɛ'a wa n bahɛ ti bia wa ka tɔgera gee me ka wuna wa, mam yeti fum ti fum yehe a puan gee da le malum kɛ̃' en yɛ'ɛha!”

²⁶ Ti Kulekpa'bɛ'a la kaahɛ supi gee zɛkɛ bia la fɔbɛ timpaberɛ, gee nyaa yehe, gee ti bia la gã'a wuu kum la, ti nɛreba la zo'e zo'e yeti, “Bia la ki mɛ.”

²⁷ Ti Yezu paaɛ gurɛ bia la nu'o, ve'e en ihege, ti a ta'am ze'ele.

²⁸ Yezu en ta kɛ̃' yire la, ti a zahereba la ba ma'a soke en yeti, “Ŋwani ti tumam ka ta'am sa'ɛ Kulekpa'bɛ'a la?”

²⁹ Ti Yezu yele ba yeti, “Kulekpa'bɛ'a kana taaba kan ta'am yehe han dagena pu'uhegɔ la nɔlurɛ.”

Yezu le tɔgɛ a kum la a vo'ore yele

³⁰ Ti ba yehe bilam yɛ'ɛha, dɔla Galilii tɔla. Ti Yezu ka bɔta ti nɛra baŋɛ,

³¹ se'ere en sɔi la, a pa'ali la a zahereba la. A yele ba yeti, “Ba wan koohe Asaala Dayua wa bo' saaleba ti ba ku en, ba han ku en, dabeha atã daarɛ, a wan vo'e kum la puan.”

³² Gee a zahereba la ka bɔkɛ pa'alegɔ kuna wa vuurɛ gee ti dabeem me tara ba la ba soke en.

Ani en gani za'a?

³³ Ti ba wa'am Kapɛnum na, ti Yezu ta bɔna yire, soke zahereba la yeti, “Beni nɔkpe'ene ti ya ŋmɛ'ɛri ni sore la zuo?”

³⁴ Gee ba yee la suram, se'ere en sɔi la, ban boni sore la zuo la, ba ŋmɛ'ɛri ni la nɔkpe'ene la taaba doohe la se'em en gani za'a ba puan.

³⁵ Ti Yezu zi'ire timpaberɛ, yi' a zahereba pia la bayi' la na yeti, “Fum se'em woo en boti fum dɛna yiadaana dela fum bɔna pooren gee dɛna yameŋa bo' nɛra woo.”

³⁶ Ti a yi' bia wa'am ba nɛŋan na, nyɔkɛ bia la zãla a nu'uhen, gee yele ba yeti,

³⁷ “Fum se'em woo n to'e bia wuu kana wa mam yu'urɛ wa zuo, to'e la mam. Se'em woo n to'e mam me , ka to'e la mam ma'a, gee se'em daana n tum mam la na.”

Se'em n ka zaberɛ la tɔ, boi mɛ la tɔ

³⁸ Yɔn yele Yezu yeti, “Pa'ala, tumam nyɛ la nɛra ayima ti a yi'ira fum yu'urɛ sa'aha Kulekpa'bɛ'ɛhi, ti tumam zigera ti tu gu' en, se'ere sɔi la, a ka dole tu.”

³⁹ Gee Yezu yele ba yeti, “La dagi ya gu' en, se'ere en sɔi la, nɛre se'em n yi' mam yu'urɛ wa tum kirega, kan ta'am kɔ'ɔm ŋmɛregɛ nananawa bii beere ha tɔgɛ mam yu'urɛ wa be'em.

⁴⁰ Fum se'em woo n ka zaberɛ la tɔ, boi mɛ la tɔ.

⁴¹ Yelemɛŋerɛ ti yɛta ya wa, ti se'em n bo' ya ko'ma'ahega ti ya nyu, yan de Kiresta dinɛ la zuo, a daana yɔɔrɛ kan malum bɔregɛ la fii me.

Be'em pã'ahegɔ

⁴² “Ya se'em han dikɛ bɛregɔ biŋe mam kɔma wa ayima n sakɛ bo' mam wa ti a lu, la wan ani suŋa ti ba dikɛ nɛɛrɛ lu' a yugela za'aɛ en bahɛ ko'omen ti a muhi.

⁴³ Fum nu'o han tara fum tuna be'em, ŋmaaɛ kɔ bahɛ. La ana suŋa ti fum ta kɛ̃' vom kamba'ahɛ la puan la nuyiŋɔ, la nyani fum ta kɛ̃' bugum timpaberɛ la nu'uhi siyi zi'an ti bugum la ka kiŋera la.

⁴⁴ [Zi'an ti zunzuya sɛ'a n diti ba la ka kiira, ti bugum sebo n diti ba la ka malum kiŋera].

⁴⁵ Fum na'arɛ han tara fum tuna be'em, ŋmaaɛ dɛ. La ani suŋa ti fum ta kɛ̃' vom kamba'ahɛ la puan la na'yinɛ, nyana fum ta kɛ̃' bugum timpaberɛ la puan la nama ayi', [zi'an ti bugum la ka kiŋera la],

⁴⁶ [zi'an ti zunzuya sɛ'a n diti ba la ka kiira, ti bugum sebo n diti ba la me ka malum kiŋera].

⁴⁷ Fum niho han tara fum tuna be'em, kpikɛ bu bahɛ. La ani suŋa ti fum ta kɛ̃' Yinɛ sɔ'ɔlum la puan la ninyimɔ, nyana fum ta kɛ̃' bugum timpaberɛ la nini i yi'.

⁴⁸ Zi'an ti zunzuya sɛ'a n diti ba la ka kiira, ti bugum sebo la me n diti ba ka malum kiŋera.

⁴⁹ “Ba wan magehɛ nɛreba la bugum bihɛ.

⁵⁰ Yaarum ani suŋa mɛ, gee bu za'ahum han yehe, fum wan iŋɛ bu la ŋwani ti bu le za'ahum? Bahɛ ya ti ya vom ana wuu yaarum sumɔ la, gee boni ya la taaba la suma'ahum.