Amarkɩ 7 - ZE'ELEGO PAALEGA

Yaabeduma malema pa'alegɔ

¹ Ti Farasiiduma la Gɔnmi'ineba basɛba ze'ele Yerusalɛm na, lagehɛ taaba Yezu zi'an.

² Ba nyɛ mɛ ti Yezu zahereba la basɛba diti mɛ la galeŋɔ nu'uhi, ba ka pee ba nu'uhi la gee dita.

³ (Se'ere en sɔi la, Farasiiduma la Yuuduma la kan malum di dia han dagena ba pee la ba nu'uhi ti si yehe suŋa. Ban dole ba yaabeduma malema ninmu'urɛ se'em n bala).

⁴ Ba me ka diti sɛla en ze'ele da'a na gee ka pɛɛra la. Ba yaabeduma malema zo'e zo'e boi mɛ ti ba dɔla wuu, ko'om wama, dugerɔ, la nyɔgum dugerɔ peere.

⁵ Ŋwana ti Farasiiduma la, la gɔnmi'ineba la soke en yeti, “Ŋwani ti fum zahereba la ka dɔla tu sɔyaabe duma pa'alegɔ la, gee dita la galeŋɔ nu'uhi?”

⁶ Ti a yele ba yeti, “Nɔtɔgeha Azaaya yuum tɔgɛ yamam birekɔgenduma wa yele la asira, wuu lan gulehɛ se'em yeti, ‘Nɛrebana wa na'ahɛ mam mɛ la ba nɔya, gee ba suya zaaɛ mɛ la mam.

⁷ Ba na'ahɛ mam la zaŋa, Ba pa'alegɔ dela asaala puti'irɛ, ti ba yɛla dɛna asaala mi'ilum.’

⁸ Ya bahɛ Yinɛ nɔze'elego la mɛ, gee tugum gurɛ ya malema.”

⁹ Ti a lebe yele ba yeti, “Ɛ̃ɛ, ya mi' la sore suŋɔ seko ti ya wan doohe zagehɛ Yinɛ nɔze'elego la gee gurɛ ya malema!

¹⁰ Se'ere en sɔi la, Moose pa'alegɔ la yeti, ‘Na'aha fum sɔ la fum ma.’ ‘Fum se'em woo en tɔgɛ fum ma bii fum sɔ be'em ba ku hɔ.’

¹¹ Gee yamam yeti, nɛra han yele a sɔ bii a ma yeti, ‘Suŋerɛ se'ere woo ti fum wan nyɛ ni mam zi'an la dela kaabegɔ bunɔ.

¹² Nɛra han diŋɛ yele ŋwana, a kan le suŋɛ a sɔ bii a ma yɛ'ɛha,

¹³ Ya bahɛ ti Yinɛ yelehum la ka tara vuurɛ, ya yaabeduma malema wa zuo. Ti ya ita yɛla zo'e zo'e en ani wuu yele ana wa.”

¹⁴ Gee nyaa le yi' nɛrekuuŋɔ la na, yele ba yeti, “Ya za'a kelehe ya mam suŋa, la ya bɔkɛ.

¹⁵ Sɛla en ze'eti yiŋa kɛ̃'ɛ̃ra nɛra puan kan ta'am galum en, gee sɛla en ze'eti nɛra puan yɛha na en galeni en.” [

¹⁶ Bahɛ ti se'em en tari tuba ti a wuna, kɛleha.]

¹⁷ En ta bahɛ nɛrekuuŋɔ la gee kɛ̃' yire la, ti a zahereba la soke en makerɛ la vuurɛ.

¹⁸ Ti a yele ba yeti, “Yamam me ka bɔkɛ? Yamam ka mi' ti sɛla en ze'eti yiŋa kɛ̃'ɛ̃ra nɛra puan na kan ta'am galum en?

¹⁹ Se'ere en sɔi la, dia ka sigeri nɛra suuren gee a puuren nyaa ta yehe na.” (A doohe la ŋwana yeti dia woo ka kihi).

²⁰ Ti a yeti, “Sɛla en ze'eti nɛra puan yɛhera na en tugum galena en.

²¹ Se'ere en sɔi la, nɛra suure puan ti ti'ihɛ be'ero wuu yaluntuuma, nageyigum, nɛrekua,

²² kabohi, nyika, putoo, pã'ahegɔ, dɛgerɔ, nintɛrega, yu'sageŋɔ, pa'ali mɛŋa, la gerum tuuma.

²³ Yele ana wa za'a ze'eti la nɛra puan na galena en.”

Yezu tibɛ buraa en de waŋa gee dɛna gɔɔŋɔ

²⁴ Ti Yezu ze'ele bilam kiŋɛ Taai timpaberɛ, ta paaɛ kɛ̃' yire puan, ka bɔta ti nɛra baŋɛ ti a boi bini. Gee a kelum ka ta'am piiɛ dɛ.

²⁵ Pɔka bipugela ti Kulekpa'bɛ'a dɔla en. Ti pɔka wa wum Yezu yele, wa'am na kpa' duma a nɛŋan.

²⁶ Pɔka wa tɔgeri la Giriki gee dɛna Sarofonisiya buuri. Nyaa belum Yezu ti a sa'ɛ Kulekpa'bɛ'a la a poyua la puan.

²⁷ Ti Yezu yele en yeti, “Bahɛ ti kɔma la di tigɛ yia se'ere en sɔi la, la dagi ma'a ti nɛra dikɛ kɔma dia bo' baahi.”

²⁸ Gee pɔka wa lerege Yezu yeti, “Naa, baahi la n ga' gee ti kɔma la dita ti sɛla zɔgera la, baahi la wan pi'ihe.”

²⁹ Ti Yezu yele en yeti, “Fum en yele se'em wa zuo, kula gee Kulekpa'bɛ'a la yehe fum poyua la puan.”

³⁰ Ŋwana ti pɔka wa kule ta paaɛ, nyɛ ti a poyua la ga' mɛ, ti Kulekpa'bɛ'a la pun tole.

³¹ Yezu ze'ele la Taai timpaberɛ lɛbera, dɔla Sidɔn timpaberɛ sore, tɔɔra Galilii mɔgerɛ la, Dekapolise sɔ'ɔlum puan.

³² Ti ba tari buraa en wam gee me ka ta'na tɔgera wa'am a zi'an na. Belum en ti a dikɛ a nu'o pagelɛ buraa la zuo.

³³ Ti a tari buraa la yehe nɛrekuuŋɔ la kinkɛleŋa a ma'a, ta dikɛ a nudibehi tum buraa la tuban, gee tubehɛ nɔtuurum iŋɛ a nu'dibila zuo, dikɛ kalum buraa la zɛleŋa.

³⁴ Gee gorege bihɛ saazuo, gee si'im paaɛ paaɛ gee yele buraa la yeti, “Ɛfata” de vuurɛ dela, “Be'e.”

³⁵ Bilam bilam ti buraa la tuba be'ehe, ti ka zɛleŋa lorege ti ka tana tɔgera suŋa suŋa.

³⁶ Ti Yezu kagɛ ba ti ba da yele nɛra nɛra. Gee en ka'am ba se'em la, ba tugum malum yele gaŋɛ la bala.

³⁷ Ti la ba' iŋɛ nɛreba pakerɛ paaɛ paaɛ. Ti ba yɛta yeti, “A ita a sɛla woo la suŋa. A bahɛ ti waŋa wum ti gɔɔŋɔ ta'na tɔgera suŋa suŋa.”