Amarkɩ 6 - ZE'ELEGO PAALEGA

Ba zagehɛ Yezu Nazareti

¹ Yezu bahɛ bilam gee wa'am a mɛŋa timpaberɛ na, ti a zahereba la doohe en wa'am na.

² Vo'ohego dabeherɛ, ti Yezu pɔhɛ pa'alegɔ zamehegɔ yire la puan. Ti nɛreba zo'e zo'e wum pa'alegɔ la ti la iŋɛ ba pakerɛ. Ti ba sɔkera taaba yeti, “Buraa wa nyɛ yele ana woo la bɛha? A Yɛm kirega wa ze'ele la bɛha na? Bihɛ pansɛka en boi a nu'uhi ti a tara tuna kirehi se'ehi!

³ Dagi kpa'ara la en bala, dagi Mɛɛri bia en bala, a yibehi dagi Yemesi, Yosi, Yudasi, la Simɔn. Dagi a tapa en bala boi la tu ka'lam wa?” Ti ba suure nyiie la en.

⁴ Ti Yezu yele ba yeti, “Nɔtɔgeheba ka tari zuo ba mɛhi tihi, ba mɛhi suurɔ, la ba mɛhi yiya puan.”

⁵ Ŋwana wa zuo, Yezu ka ta'am tum tuunkãra bilam han dagena nɛreba fii wa ti a dikɛ a nu'uhi pagelɛ ba zuto tibɛ ba.

⁶ Ti la iŋɛ Yezu pakerɛ la ban ka sakɛ bo' en la. Ti Yezu dɔla timbibehi puan pa'ala nɛreba yelehum la.

Zahereba pia la bayi' la tuunɛ

⁷ A ta yi' la a zahereba pia la bayi' la, wa'am a zi'an na, sigɛ ba bayi' bayi' ti ba yehe ta tum, gee bo' ba kpe'eŋo ti ba ta'na sa'aha Kulekpa'bɛ'ɛhi.

⁸ Gee yele ba yeti, ba da dikɛ sɛsɛla ba kinɛ wa puan, han dagena doore ma'a. Ba da tara dia, tapɔɔ bii ligeri ba funini puan.

⁹ Ba pire tagera gee da yɛ futo tuyi' tuyi'.

¹⁰ A yele ba yeti, “Ya han ta paaɛ yire se'ere puan ti ba to'e ya, boni ya bilam gura daanse'ere daarɛ ti ya wan bahɛ tinkaŋa.

¹¹ Tinsɛka duma han ka to'e ya, gee zagehɛ ti ba kan kelehe ya, yan baheri tinkaŋa puan la, kpa'ahɛ ya ya nama pu'uhegɔ bahɛ ka puan ti la dɛna yele iŋɛ gã'a.”

¹² Bala ti ba nyaa yehe ta muula yɛta ti, nɛra woo tee.

¹³ Gee nyaa sa'ahɛ Kulekpa'bɛ'ɛhi zo'e zo'e nɛreba puan, gee sɔ' bã'duma zo'e zo'e la kaam, tibɛ ba.

Yɔn ko'sɔɔra la kum

¹⁴ Ti Naba Hɛrɔd wum Yezu yele, se'ere en sɔi la, Yezu yu'urɛ yehe mɛ zi'an woo. Sɛba yeti , “A dela Yɔn ko'sɔɔra la en vo'e kum puan lebe na. Bala zuo ti pahi sina bɔna a puan tuna.”

¹⁵ Gee sɛba yeti, “A dela Elia,” ti sɛba me yeti, “A dela nɔtɔgeha wuu diimen diimen nɔtɔgeheba la ayima.”

¹⁶ Gee Naba Hɛrɔd en ta wum Yezu yele la, a yeti, “Bihɛ ya, Yɔn se'em ti mam yuum fike a zuo la, en vo'e lebe na.”

¹⁷ Se'ere en sɔi la, Naba Hɛrɔd mɛŋa en yuum tum pɛntiireba ti ba kiŋɛ ta nyɔkɛ Yɔn, bobe en, tari en na pagɛ paka deen doohe la a suuɔ Filipi pɔga Hɛrɔdiya ti Naba Hɛrɔd fã di la zuo.

¹⁸ Yɔn yuum yeti, “La dagi de sore ti a fa' a suuɔ pɔga. La kihi mɛ ti fum di fum suuɔ pɔga.”

¹⁹ Dina zuo ti Hɛrɔdiya tara diŋo la Yɔn, zigera ti a ku en. Gee ka nyaŋɛ.

²⁰ Hɛrɔd zoti Yɔn mɛ, se'ere en sɔi la, a mi' ti Yɔn dela tuuntɔɔ la fa'a nɛra bala ti a yuum gu'ura en. Hɛrɔd han ni wum Yɔn tugum a giila en ni kɔ'ɔhɛ, gee la bala za'a, a ni kelum bɔta a kɛleha Yɔn mɛ.

²¹ Gee fole en wa gã'arɛ bo' Hɛrɔd, doohe la Hɛrɔd iŋɛ la a dɔgum daarɛ de'eŋo bo' a yire tuntuneba, a kpɛ'ɛnduma la Galilii Na'duma.

²² Ti Hɛrɔd pɔga Hɛrɔdiya poyua yehe na wa' de'eŋo la puan, ti la pee Naba Hɛrɔd la a saama la puurɛ, ti Naba wa yele pugela la yeti, “Yele mam sɛla woo ti fum bɔta, gee n wan bo' fum.”

²³ Ti Naba wa pɔ yele pugela wa yeti, “Yele mam sɛla woo ti fum bɔta, la han pun dɛna la mam sɔ'ɔlum wa puregerɛ.”

²⁴ Ti pugela wa yehe ta soke a ma yeti, “N yeti n boti la bem?” Ti a ma lebehe bilam bilam, “Ta yeti fum boti la Yɔn zuo.”

²⁵ Ti pugela wa zɔ lebe Naba la zi'an kalam ta yele Naba la yeti, “Mam boti la fum dikɛ Yɔn ko'sɔɔra la zuo iŋɛ lapɛrega puan tari na bo' mam nananawa.”

²⁶ Ti Naba la suure sagum. Gee en diŋɛ pɔ la, la saama la en zi' gee wum la zuo, a kan ta'am zagehɛ pugela en yele se'em la.

²⁷ Bilam bilam ti Naba la tum a pɛntiira yeti, kiŋɛ ta tari Yɔn zuo na. Ti a kiŋɛ paka deen la puan ta fike Yɔn zuo,

²⁸ dikɛ iŋɛ lapɛrega puan tari na bo' pugela la. Ti pugela la me tari zuo la na bo' ka ma la me.

²⁹ Ti Yɔn zahereba ta wam, wa'am na dikɛ iŋa la ta laaɛ.

Yezu diihe nɛreba tuha anuu

³⁰ Ti Yezu zahereba la lagehɛ a zi'an na, nyaa yele en sɛla woo ti bamam tum gee pa'alɛ nɛreba la.

³¹ Ti Yezu nyaa yele ba yeti, “Wa'am ya na ti tu kiŋɛ ya muuen ha tu ma'a la tu ta vo'ohe fii.” Se'ere en sɔi la, nɛreba zo'e zo'e en kinɛ ba zi'an na gee lɛbera, ti saŋa la fii wa ka bɔna ti ba pun wan di.

³² Bala ti ba zom uureŋɔ yakɛ kiŋɛ muuen ha ba ma'a.

³³ Ban ye' la ti nɛreba zo'e zo'e nyɛ ba baŋɛ, nyaa yehe tinse'ehi n boi bilam la, kabela la nama diŋɛ ta paaɛ ban n ye' zi'an la ba yia.

³⁴ Yezu n ta paaɛ ko'om la nuuren la, a nyɛ nɛrekuuŋɔ la mɛ, ti nimbu'ɔ nyɔkɛ en. Se'ere en sɔi la, ba ani wuu piihi n ka tari dunkiina la. Ti a pɔhɛ pa'ala ba yɛla zo'e zo'e.

³⁵ Yinɛ n ta nyuulena la, ti a zahereba la paaɛ a zi'an yele en yeti, ka'lam dela muuen, ti yinɛ me nyuulum.

³⁶ Bala, bahɛ nɛreba wa ti ba yiregɛ, “La ba ta'am kiŋɛ tinse'ehi n lɛm wa la timbibehi wa puan ta da' dia di.”

³⁷ Ti Yezu lerege ba yeti, “Yamam mɛhi bo' ba dia ti ba di.” Ti ba yele en yeti, “Tumam wan ta'am nyɛ dinaari kɔbehi siyi da' dia bo' nɛreba wa ti ba di?”

³⁸ Ti a yele ba yeti, “Ya tari la boroboro ba lɛ? Kiŋɛ ya ta bihɛ.” Ti ba kiŋɛ ta bihɛ lebe na yele en yeti, “Tu tari la boroboro banuu, la zim i yi'.”

³⁹ Ti a bo' ba nuurɛ ti ba bahɛ ti nɛreba la tigehe taaba zi'ire muɔ la zuo.

⁴⁰ Bala ti nɛreba wa tigehe taaba kɔbega kɔbega, la pihinuu pihinuu zi'ire.

⁴¹ Ti Yezu dikɛ boroboro banuu la zim i yi' la, gorege bihɛ saazuo, purɛ sum bahɛ dia la zuo gee fige boroboro la, dikɛ bo' a zahereba la yeti, ba to'e tɔrɛ nɛreba la, gee figehe zim i yi' la me bo' ba za'a.

⁴² Ti ba to'e tɔrɛ nɛreba la, ti ba za'a di tigɛ,

⁴³ gee ti ba doohe va boroboro la, la zim la ti ba obe tigɛ gee bahɛ la, pirɛ pitɔ pia la tu yi'.

⁴⁴ Sɛba n di boroboro la paaɛ buraahi tuhekɔbehi sinuu.

Yezu kinɛ ko'om zuo

⁴⁵ Bala n ba'ahɛ la, ti Yezu bahɛ ti a zahereba la zom uureŋɔ diŋɛ nɛŋa yakera ko'om la yagenɛ deyima ha, Bɛtesaada bɔba, gee ti a yee keehe nɛrekuuŋɔ la ba'ahɛ.

⁴⁶ En bahɛ ba ba'ahɛ la, a zom la zoore la zuo ti a ta pu'uhɛ.

⁴⁷ Yinɛ n ta ma'ɛ la, ti a zahereba la pun bɔna uureŋɔ la puan mɛ yɛ'ɛha gee ti a ma'a yee bɔna doone.

⁴⁸ Yezu n ta nyɛ ti uureŋɔ la mɔŋa kpe'em bo' a zahereba la, doohe la kusebego n lobere tu'uha ba la, ti a sige ko'om la zuo kina tu'uha ba na. Sankaŋa ti la kɔ'ɔm ita la funa funa wuu gogo muma anaahi bɔba la, ti a kina tɔɔra ba na wuu a yeti a zom la ba uureŋɔ la zuo la.

⁴⁹ Gee ban nyɛ en ti a kina ko'om la zuo la, ti ba ti'ihɛ ti a dela kukɔ, ti ba kaahɛ.

⁵⁰ Se'ere en sɔi la, ba za'a nyɛ en mɛ ti dabeem nyɔkɛ paaɛ paaɛ. Gee bilam bilam ti Yezu tɔgɛ bo' ba yeti, “Nyɔkɛ ya ya mɛhi gee la dela mam. Da zoti ya dabeem.”

⁵¹ Gee nyaa zom uureŋɔ la zuo la ba, ti kusebego la ma'aɛ, ti la iŋɛ ba za'a pakerɛ.

⁵² Se'ere en sɔi la, ba pun ka bɔkɛ boroboro kirega la vuurɛ, gee me kãbɛ ba suya sina.

Yezu tibɛ nɛreba Genesarete

⁵³ Ban yakɛ ko'om la, ba paaɛ la Genesarete timpaberɛ, nyaa lu' ba uureŋɔ la,

⁵⁴ ze'ele ku puan sige na la, ti nɛreba pun baŋɛ en kalam,

⁵⁵ zɔta ɛɛra timpaberɛ la puan zi'an woo tara bã'duma n ga' ba sunɔ zuto, kina zi'an woo ti ba wum ti a boi bini.

⁵⁶ Ti zi'an woo ti Yezu kiŋɛ, tinkãra bii timbibehi puan, bii va'am puan, nɛreba ni tari la bã'duma yehe na beŋe da'ahi puan, gee belum en ti a bahɛ ti ba yeen kalum a fuo la timpaberɛ, ti se'em woo n ni kalum ni sirum nyɛ la tibegɔ.