Amarkɩ 5 - ZE'ELEGO PAALEGA

Yezu tibɛ buraa n tari Kulekpa'bɛ'ɛhi

¹ Ti ba yakɛ Ateko la yakenɛ deyima la ha, Gerasene.

² Yezu en kɔ'ɔm ze'ele uureŋɔ la puan sige na la, bilam bilam, ti buraa ti Kulekpa'bɛ'ɛhi dɔla ka ze'ele yɔɔrɔ zuto tu'uha en na.

³ A kɛ̃'ɛ̃ra la yɔɔrɔ wa zi'an. Ti nɛra ka bɔna wan ta'am gu' en. Kuto zɔtɔ pun kan nyaŋɛ ba' n.

⁴ Se'ere en sɔi la, ba ni ba' n mɛ la bãhi la zɔtɔ, gee a ni kɔ' zɔtɔ la mɛ gee kɔ' bãhi la mɛ zɔra zɔra, ti nɛra ka bɔna tara paŋa wan gi' en.

⁵ Daarɛ woo yu'uŋɔ la wuntɛɛŋa, a boi la yɔɔrɔ zi'an wa, gee zɔna zɔya zuto, nyabera gee tara kugetampɛtihi ŋmata a mɛŋa.

⁶ En nyɛ Yezu ti a boi la zaaɛ zaarɛ la, ti a zɔ ta lu a nɛŋan.

⁷ Gee kaahɛ supi yeti, “Yezu, gaŋɛ za'a daana Dayua wa, fum tara la deni la mam? N dikɛ la Yinɛ bɛlena fum, ti fum da sagum mam.”

⁸ Kulekpa'bɛ'a wa n yeti ŋwana wa dela,Yezu pun bo' en la nuurɛ yeti, “Kulekpa'bɛ'a wa tole yehe a puan na.”

⁹ Ti Yezu soke en yeti, “Fum yu'urɛ?” Ti a lerege yeti, “Mam yu'urɛ dela tuha tuha. Se'ere en sɔi la, tu zo'e mɛ.”

¹⁰ Ti Kulekpa'bɛ'a la nyaa belum Yezu ninmu'urɛ ti a da dige ba yehe tiŋa la puan.

¹¹ Bala ma'a la ti kurikuri zo'e zo'e en boi kunkune zuo ha ɔbera,

¹² ti Kulekpa'bɛ'a la bɛlena en yeti, “Bahɛ ti tu kɛ̃' kurikuri wa puan. Bo' tu sore ti tu kɛ̃' ba puan.”

¹³ Ti Yezu bo' ba sore ti kulekpa'bɛ'ɛhi la yehi kɛ̃' kurikuri la nii la en de wuu tuha ayi' la puan, ti bamam me zɔ zom ateko la kunkune zuo, nyaa zulege sige ko'om la puan ha ta muhi ba za'a ki.

¹⁴ Sɛba en dole kurikuri la en nyɛ ŋwana la, ba zɔ mɛ ta muulɛ bo' sɛba en boi tinkãtɛ puan, la sɛba en boi timbibehi puan. Ti nɛreba la wa'am na ti ba bihɛ lan de sɛla iŋɛ.

¹⁵ Ban wa'am na paaɛ Yezu zi'an la, ba nyɛ ti buraa la ti Kulekpa'bɛ'ɛhi dɔla en la, zi' mɛ, yɛ lɔgerɔ dɛna a mɛŋa. Buraa sɛka ti Kulekpa'bɛ'ɛhi tuha tuha dole ni ka, ti ba zoti ni ka la en bala.

¹⁶ Sɛba en nyɛ sɛla en iŋɛ buraa la, la kurikuri la, n yele nɛreba sɛla iŋɛ.

¹⁷ Ti nɛreba la pɔhɛ bɛlena Yezu ti a bahɛ ba tiŋa.

¹⁸ Ti Yezu bɔna bini ti a zom uureŋɔ, ti buraa la ti kulekpa'bɛ'ɛhi dole ni en la bɛlena Yezu ti a bahɛ ti a doohe en, ta kɛ̃'ɛ̃ra la en.

¹⁹ Gee Yezu zagehɛ mɛ gee yele en yeti, “Kule yire fum mɛŋa nɛreba zi'an, la fum yele ba Daana la en tum yele kãtɛ se'ere bo' fum, la nimbɔ'zɔrɛ se'ere ti a dikɛ bo' fum.”

²⁰ Ti Buraa wa bahɛ bilam gee kiŋɛ Dekapolise timpaberɛ ta muula bɔ'ɔra nɛra woo Yezu en tum se'ere bo' en. Ti la iŋɛ nɛra woo pakerɛ.

Pugela vo'ore la Pɔka tibegɔ

²¹ Yezu le zom la uureŋɔ, le yakɛ ateko yakenɛ deyima la ha, ti nɛrekuuŋɔ lagehɛ kaaɛ en, ti a zi'a ko'om la nɔgbene.

²² Ti zamehegɔ yire nɛŋa daana ayima, yu'urɛ en yi'iri Yaaruse wa'am na ti a nyɛ Yezu. En nyɛ Yezu la, a lu la a nɛŋan,

²³ bɛlena en tabela yeti, “N bipugela bila en boi ha kɔ'ɔm yɛ'ɛha kum. Bala, wa'am na dikɛ fum nu'uhi pagelɛ a zuo ti a iŋɛ sum vɔna.”

²⁴ Bala ti Yezu doohe la en kiŋɛ a yire. Ti nɛrekuuŋɔ mikera dɔla en.

²⁵ Ti pɔka bɔna nɛrekuuŋɔ la puan luta sɛkãra yuuma pia la ayi'.

²⁶ Pɔka wa doohe tibeduma mɛ zo'e zo'e ta taregɛ, sagum a lɔgerɔ za'a, gee ti teere ka bɔna, la tugum malum nyalegɛ la nuurɛ.

²⁷ Pɔka wa pun wum Yezu yele mɛ, ze'ele nɛrekuuŋɔ la en boi Yezu pooren la, nyaa tole na kalum Yezu fuo,

²⁸ Se'ere en sɔi la, a yele a mɛŋa yeti, “Mam han pun kalum a fuo wa ma'a, n ban'an wa wan bahɛ.”

²⁹ Bilam bilam ti a sɛkãra lua la ŋmaaɛ, ti sɛla iŋɛ a iŋa puan ti a baŋɛ ti ban'an la sirum bahɛ mɛ.

³⁰ Bilam bilam ti Yezu baŋɛ ti paŋa ze'ele a zi'an yehe. Ti a ŋmɛreha a mɛŋa nɛrekuuŋɔ la puan kaara gee sɔkera yeti, “Ani en kalum n fuo wa?”

³¹ Ti a zahereba la yele en yeti, “Fum mɛŋa la nyɛ nɛrekuuŋɔ wa en mikere za'ara luta fum zuo na se'em, ŋwani ti fum le sɔkera yeti, ani en kalum hɔ?”

³² Ti Yezu ze'ele bããlam biha nɛrekuuŋɔ la kaara ti a baŋɛ se'em iŋɛ bala la.

³³ Pɔka la, en mi' sɛla iŋɛ a iŋa puan la, yehe na la dabeem, ti a iŋa gbɛ'ɛra, ti a lu Yezu nɛŋan, yele en yelemɛŋerɛ la za'a.

³⁴ Ti Yezu nyaa yele pɔka la yeti, “N poyua, fum sakerɛ en tibɛ fum. Kina la suma'ahum, fum me nyɛ tibegɔ.”

³⁵ Yezu n boi bini tɔgera la, ti nɛreba basɛba ze'ele zamehegɔ yire nɛŋa daana la yire wa'am na yele en yeti, “Fum poyua la pun ki mɛ. Ŋwani ti fum yeti fum daam pa'ala la?”

³⁶ Gee Yezu en wum ban en yele se'em la, ti a yele zamehegɔ yire nɛŋa daana wa yeti, “Da zɔ dabeem, yeen sakɛ.”

³⁷ Yezu en ye' yire la puan la, a ka bahɛ ti nɛra doohe en han dagena Pita, Yemesi, la Yɔn en de Yemesi suuɔ la ma'a .

³⁸ Ban paaɛ zamehegɔ yire nɛŋa daana wa yire la, a nyɛ la kɔ'ɔm ana saii zi'an woo, ti nɛreba kaaha gee fabela vɔɔla.

³⁹ Yezu en kɛ̃' yire la puan la, a soke ba yeti, “Ŋwani ti ya bahɛ ti zi'an woo ana bala saii la kaahega? Bia wa ka ki, ka gihi mɛ.”

⁴⁰ Ti ba la'ara en. Ti a bahɛ ti nɛra woo yehe yiŋa, gee ti a tari bia la sɔ la ka ma la sɛba en doohe la en wa'am na la, ti ba kɛ̃' bia la en ga' zi'an la.

⁴¹ Ti Yezu gurɛ pugebila la nu'o gee yele en yeti, “Talita kum” de vuurɛ dela, “Pugebila wa, ihege!”

⁴² Bilam bilam ti pugela wa ihege, pɔhɛ kina kaara (pugela wa de wuu yuuma pia la ayi'). Nɛreba la en nyɛ ŋwana la, la iŋɛ ba la pakerɛ zo'e zo'e.

⁴³ Ti Yezu ka'am ba la ninmu'urɛ ti ba da bahɛ ti nɛra baŋɛ yele wa. Gee nyaa yele ba ti ba bo' pugela wa dia ti ka di.