Amarkɩ 4 - ZE'ELEGO PAALEGA

Buta makerɛ

¹ Ti Yezu le pɔhɛ pa'alegɔ Ateko nuuren, ti nɛrekuuŋɔ en ka tari makerɛ lagehɛ kaaɛ en mum, ti fole ka bɔna. Bala ti a zom yaga uureŋɔ zuo, ko'om la zuo, ti nɛrekuuŋɔ la mike zi'a doone.

² Ti Yezu pɔhɛ pa'alɛ ba yɛla zo'e zo'e dɔla mageha puan. A yele ba yeti.

³ “Kelehe ya suŋa. Kaara n yehe ti a ta lobege bumbuura.

⁴ En ta lɔbegera la, ti bumbuura la basɛba lu sadɔɔ zuo, ti niihe wa'am na pi'ihe bamam.

⁵ Ti Basɛba lu taŋa zuo, zi'an ti tintɔnɔ ka zo'e. Ti bumbuura wa yehe kalam kalam se'ere en sɔi la, tintɔnɔ ka zo'e ba tilen.

⁶ Ti wuntɛɛntuulega ŋmɛ'. Ti ba nyɛga la en ka ba' la zuo, ba ki mɛ.

⁷ Ti bumbuura la basɛba me lu gu'uhi zi'an, ti gu'uhi la zo'e na kpãrɛ ba ti ba ka iŋɛ.

⁸ Ti bumbuura la basɛba lu pu'uhegɔ zi'an, iŋɛ zukãra, gee zɔ'ɔra, gee wɔgera pa'aha, yagena zuto pita' pita', piyoobe piyoobe ti sɛba pun yagena kɔbehi kɔbehi.”

⁹ Yezu en yele ŋwana ba'ahɛ la, a yeti, “Se'em woo en tari tuba ti a wuna, a kɛleha!”

¹⁰ Yezu en ta bɔna a ma'a la, ti nɛresɛba en boi bilam la, la a zahereba pia la bayi' la, wa'am na soke en mageha la vuurɛ en de se'em.

¹¹ Ti a yele ba yeti, “Yamam ma'a en mi' Yinɛ sɔ'ɔlum la yelesɛ'a en sugɛ, gee sɛba en boi yiŋa la, sɛla woo dole la mageha puan bɔ'ɔra ba.

¹² Ti la bahɛ ti, ‘ba bihera gee ka nyɛta, ti ba kɛleha, gee ka bɔkera. Ŋwana ti ba kan tee ba suya ti Yinɛ di sugeri bo' ba.’ ”

¹³ Gee nyaa yele ba yeti, “Yamam ka bɔkɛ makerɛ dina wa vuurɛ? Gee ya nyaa wan iŋɛ la ŋwani bɔkɛ mageha la za'a vuurɛ?

¹⁴ Kaara la en lobege sɛla la dela yelehum la.

¹⁵ Bumbuura sɛba en lu sore zuo la dela, sɛba ni wam yelehum la, ti Sagena la wa'am na dikɛ yelesuma la ti ba burɛ ba sunsuya puan la kalam gee bahɛ ba.

¹⁶ Bumbuura sɛ'a en lu taŋa zuo dela Nɛresɛba ni wam Yelehum la to'e bu bilam bilam la nyɛɛma.

¹⁷ Gee ban ka ba' nyɛga la, ba ka yuure. Daaŋɔ bii namehegɔ han paaɛ ba yelehum la zuo, ba ni zagehɛ yelehum la mɛ bilam bilam.

¹⁸ Bumbuura sɛ'a en lu gu'uhi zi'an la dela, nɛresɛba en ni wam yelehum la,

¹⁹ gee ti timpaberɛ wa vom yɛla pakɛ ba, la tarega yɛla pa'ahegɔ yɛla, la ba suya en boti lɔgeseto yɛla wa'am na pɛregɛ yelehum la, ti bu kan ta'am wam.

²⁰ Bumbuura sɛ'a en lu zɛ'pu'uhegɔ zi'an la dela, nɛresɛba en ni wam yelehum la, to'e bu, nyaa ŋwana, pita' pita', piyoobe piyoobe, la kɔbehi kɔbehi.”

Pi'ɔ n vuge butolela

²¹ Yezu yele ba yeti, “Ba ni laŋɛ butolela yire puan dikɛ la pi'ɔ vugele ka, bii ba dikɛ ka ze'ele gɔregɔ leŋen, gee ka dikera sugeta ka sugelego zi'an?

²² Sɛla ka boi pi' kan pilege, bii sɛla bɔna sugɛ kan niiɛ peelum puan na.

²³ Se'em woo en tari tuba ti a wuna, a kɛleha!”

²⁴ Ti a le yele ba yeti, “Be'e ya tuba kɛleha sɛla ti ya wuna wa suŋa suŋa. Fum n makɛ se'em bo' la, bala mɛa ti fum wan lebehe to'e, gee kelum to'e pa'ahɛ.

²⁵ Sɛba en tari zo'e la, ba wan bo' ba zo'e pa'ahɛ, sɛba me en pun ka tari sɛla la, sɛla fii ti ba tara la, ba wan to'e la ba zi'an.”

Biileho makerɛ

²⁶ A me le yeti, Yinɛ sɔ'ɔlum la kɛ̃'a ani mɛ wuu nɛra en lobe a bumbuura la,

²⁷ gee lebe kule ta gihera gee ihegera beere en yilegeri woo ti bumbuura la ta tahɛ yehe na zɔ'ɔra ti a ka mina la iŋɛ se'em.

²⁸ Tiŋa la en ni bahɛ ti tile yehe yia na, tagela zuo ti nini nyaa wa'am zuo la puan na.

²⁹ Gee dia la han bi'ɛ ba'ahɛ, a dikɛ la a kɛɛrega yɛ'ɛha, se'ere en sɔi la, kɛ'a saŋa paaɛ ya.

³⁰ Yezu le yele pa'ahɛ yeti, tu wan dikɛ Yinɛ sɔ'ɔlum wa makɛ mɛ la bem, bii tu wan dikɛ la makerɛ deni makɛ bo' bu?

³¹ La ani wuu Nanginɛ biileho wa en pɔ'ɛ biila woo puan se'em wa ti ba dikɛ burɛ;

³² gee ba han burɛ en, a ni yehe mɛ dɛna tikãtɛ gana tiihi la woo, tɛ' yilekãra ti niihe zo'e zo'e tɛ'ɛra ba tugerɔ a ma'ahum la puan.

³³ A dikɛ la mageha kãra ana tɔgɛ yelehum la bo' nɛreba la. Ban wuni a se'em, ba wum.

³⁴ A ka tɔgeri se'ere bɔ'ɔra ba han dagena mageha puan. Gee a ni pa'alɛ la a zahereba la ma'a makerɛ woo vuurɛ en de se'em.

Yezu gu' sabeeo

³⁵ De daarɛ mɛa Zaanuurɛ, ti a yele a zahereba la yeti, “Bahɛ ya ti tu yakɛ ko'om wa yakenɛ deyima wa ha.”

³⁶ Ti ba bahɛ nɛrekuuŋɔ la, gee ti a zahereba la, la eŋa bɔna uureŋɔ la puan wuu eŋa en pun boni ku puan se'em la. Ti uurenɔ tuseto me lagum doohe en

³⁷ Ba yeti ba bihɛ ti sabeeo kãtɛ en bala vukera ko'om la puan ti uureŋɔ la yɛ'ɛha muhega.

³⁸ Gee ti Yezu gã'a uureŋɔ la gulengukɔ puan giha. Ti ba kiŋɛ ta niiɛ n yeti, “Pa'ala, la ka daani hɔ la tumam en yeti tu bahɛ yoo wa?”

³⁹ Ti a ihege tahɛ sabeeo la, gee yele ko'mi'ihi la yeti, “Suram! Ana bããlam!” Ti sabeeo la go'e, ti sɛla woo ma'ɛ.

⁴⁰ Ti a soke ba yeti, “Ŋwani ti dabeem tara ya? Yamam kelum ka tara sakerɛ?”

⁴¹ Ti dabeem sãɛ ba paaɛ paaɛ ti ba sɔkera taaba yeti, “Buraa kana wa ani la ŋwani en bala, ti sabeeo la Ateko ko'om nana en?”