Amarkɩ 3 - ZE'ELEGO PAALEGA

Buraa nu'o n ki

¹ Ti Yezu le kɛ̃' zamehegɔ yire la puan, ti buraa bɔna bini ti ka nu'o ki.

² Ti Farasiiduma la ana bããlam gee bihera nyaa a wan tibɛ en vo'ohego dabeherɛ wa puan, ti ba nyɛ se'ere tɔgɛ.

³ Ti Yezu yele buraa la nu'o n ki la yeti, “Ihege wa'am n nɛŋan na.”

⁴ Gee nyaa soke ba yeti, “La de sore ti nɛra tum sum vo'ohego dabeherɛ puan bii a tum be'em vo'ohego dabeherɛ puan? A faaɛ bahɛ bii a ku?” Ti ba za'a yee suram.

⁵ Ti Yezu bihɛ ba woo kaaɛ, ti a suure nyiie. La daam Yezu mɛ la ban tari sukãberɛ se'ere taaba la. Ti a yele buraa la yeti, “Tiɛ fum nu'o la.” Ti buraa wa tiɛ ka nu'o la, ti nu'o la iŋɛ sum.

⁶ Bilam Bilam ti Farasiiduma la vaaɛ ihege yehe kalam ta naaɛ la Hɛrɔd nɛreba ti ba bihɛ ba wan iŋɛ se'em ku en.

Nɛrekuuŋɔ lagehɛ Ateko nuuren

⁷ Ti Yezu bahɛ bilam la a zahereba la gee kiŋɛ Ateko nuuren, ti nɛrekuuŋɔ ze'ele Galilii dɔla a poore.

⁸ Ban wum yelekãra sɛ'a woo ti Yezu ita la, ti nɛrekuuŋɔ ze'ele Yudiya, Yerusalɛm, Idumia, Yɔɔdan pooren ha la tinse'ehi woo n boi Taai, la Sidɔn tihi puan la, wa'am a zi'an na.

⁹ Ti a yele a zahereba la ti ba maahum uureŋɔ la bo' en nɛrekuuŋɔ la zuo, ti ba da ta bibige en na.

¹⁰ Se'ere sɔi la, Yezu tibɛ la bã'ahi zo'e zo'e, bala ti sɛba woo en bɛ̃'ɛri bibigera en na ti a kalum ba la a nu'o.

¹¹ Kulekpa'bɛ'ɛhi ni han tu'uha en, ba ni lu la a nɛŋan gee yɛta yeti, “Fum en de Yinɛ Dayua la!”

¹² Gee Yezu me ni tahɛ ba yeti, ba da vɔɔla ti se'em baŋɛ eŋa.

Yezu looe a zahereba pia la bayi'

¹³ Yezu zom la zoore zuo, gee yi' en boti sɛba la ti ba wa'am a zi'an na .

¹⁴ Ti a looe ba puan nɛrepia la bayi', sigɛ ba yu'urɛ tuntuneba sɛba en boi la en, ti a tuna ba ti ba yɛha muula yelehum la,

¹⁵ gee to'e kpe'eŋo ta'na sa'aha Kulekpa'bɛ'ɛhi.

¹⁶ En looe nɛrepia la bayi' la se'em n bala. Simɔn (ti a tee sigɛ n Pita)

¹⁷ Zebedii dayua Yemesi la a suuɔ Yɔn (ti a tee sigɛ ba yu'ura Buanegesi, de vuurɛ dela satahega kɔma).

¹⁸ Nyaa dikɛ Anduru, Filipi, Batolomi, Matu, Tɔmasi, Alifeyusi dayua Yemesi, Tadeyusi, Simɔn se'em en lagum pa'ahɛ sɛba nini en mu'ɛ ti Izirale bɔna fai la,

¹⁹ la Yudasi Isikariyɔte, se'em n wan koohe Yezu la. Ti Yezu kule.

Yezu la Beelezebule

²⁰ Ti nɛrekuuŋɔ la le lagehɛ na, ti ba pun kan ta'am di.

²¹ Yezu buuri la n wum la, ba yehe mɛ ti ba gu' en, se'ere en sɔi la, nɛreba basɛba tɔgeri mɛ ti, “A zuo en lobere.”

²² Ti gɔnmi'ineba en ze'ele Yerusalɛm na yeti, “Beelezebule n boi a puan, gee me tara Kulekpa'bɛ'ɛhi nɛŋa daana paŋa sa'aha Kulekpa'bɛ'ɛhi.”

²³ Ti Yezu yi' nɛreba la wa'am a zi'an na, nyaa dikɛ yetɔgum biŋere tɔgɛ bo' ba yeti, “Ŋwani ti Sagena wan ta'am sa'aha Sagena nɛreba puan?

²⁴ Sɔ'ɔlum han yelege zabera la bu mɛŋa, Sɔ'ɔlum bumɔ kan ta'am ze'ele.

²⁵ Yire han yelege zabera la de mɛŋa, yire dinɛ kan ta'am ze'ele.

²⁶ Bala, Sagena la han ihege zabera la a mɛŋa, yelehe, a kan ta'am ze'ele, gee a ba'ahegɔ n paaɛ.

²⁷ Nɛra ka boi n wan ta'am kɛ̃' paŋadaana yire ta fa' a lɔgerɔ han dagena a lu' paŋadaana la mɛ gee nyaa nyaŋɛ fa' en.

²⁸ “N yeti ya la Yelemɛŋerɛ wa, ti sugeri wan bɔna bo' nɛreba ba be'em woo la yetɔgeyooro seto woo ti ba tɔgɛ,

²⁹ gee se'em woo n tɔgɛ yetɔgeyooro bo' Fa'a Sia la kan malum nyɛ sugeri, gee a tuue la tuure se'ere en kan malum bahɛ en.”

³⁰ Yezu en yele ŋwana wa dela ban yeti, “Kulekpa'bɛ'a en dole en la.”

Yezu yelemɛŋerɛ buuri

³¹ Ti Yezu ma la a suurɔ wa'am na zi'a yire la yiŋa, gee tum ti ba yi' Yezu na.

³² Ti nɛrekuuŋɔ la n zi' kaaɛ en la, nyaa yele en yeti, bihɛ, “Fum ma la fum suurɔ n boi yiŋa ɛɛra fum.”

³³ Ti a lerege ba yeti, “Bani en de mam ma la mam suurɔ?”

³⁴ Gee nyaa bihɛ sɛba en zi' kaaɛ en la, gee yeti, “Mam ma la mam suurɔ en ŋwana!

³⁵ Se'em woo n tuni Yinɛ sumboolum la, eŋa daana en de mam suuɔ, la mam ma.