Amarkɩ 16 - ZE'ELEGO PAALEGA

Yezu vo'ore

¹ Vo'ohego dabeherɛ n tole la, ti Mɛɛri Magedalin la Yemesi ma Mɛɛri la Salome da' nyuunsuŋɔ kaam ti ba ta bi'ihɛ Yezu iŋa la.

² Yiimbeere bulika ma'aherɛ ma'aherɛ dabeha ayopɔi pɔhega daarɛ, ti suurɛ nan zɔna la, ti ba kiŋɛ yɔɔ la puan.

³ Ban ye' la, ti ba sɔkera taaba yeti, “Ani n wan ta bilege kugere la yɔɔ la nuuren bo' tu?”

⁴ Ban pɔri la, ba nyɛ ti yɔɔ kugere la bilege mɛ gã'a kinkɛleŋa ha. Kugere la ba' karegɛ mɛ ka tana ita.

⁵ Ban kɛ̃' yɔɔ la puan la, ba nyɛ la budibele paalega n yɛ fuwoko pɛɛlega, zi'an zuɔ nu'o bɔba, ti dabeem kɛ̃' paaɛ paaɛ.

⁶ Ti budibele paalega wa yele ba yeti, “Da zoti ya dabeem, mam mi' ti ya eere la Yezu n de Nazareti buraa la ti ba daa kpa' pumpuuredɔɔ la zuo la. A vo'e mɛ, a ka boi ka'lam. Bihɛ ya, ban daa dikɛ a iŋa la gã'arɛ zi'an ŋwana.

⁷ Gee kiŋɛ ya, la ya ta yele a zahereba la Pita ti a diŋɛ nɛŋa yɛ'ɛha Galilii ha. Bilam ti ya wan ta nyɛ en wuu eŋa daa pun yele ya se'em la.”

⁸ Ti ban yehe yɔɔ la puan na la, ti ba ɛkɛ kalam gee bahɛ yɔɔ la se'ere en sɔi la, dabeem la palen-ɛka n kɛ̃' ba. Ti ba kina gee ka sɔhera bɔ'ɔra taaba dabeem la zuo. [En yele ba sɛla za'a la, ba yele de la girega girega bo' sɛba n boi la Pita la. Pooren ti Yezu mɛŋa tum ba ti ba kiŋɛ ze'a woo ta muulɛ ninmu'urɛ la faarɛ yelehum wa n ka sageni wa.]

MAKI YELEHUM GIREGA BA'AHEGƆ ŊWANA MAKI YELEHUM WOKO BA'AHEGƆ ŊWANA Yezu niiɛ amɛŋa pa'alɛ Mɛɛri Magedalin

⁹ [Yezu n vo'e a kum la puan la bulika ma'aherɛ ma'aherɛ, dabeha ayopɔi pɔhega daarɛ la, a niiɛ a mɛŋa pa'alɛ la Mɛɛri yia, Mɛɛri Magedalin se'em ti a sa'ahɛ Kulekpa'bɛ'ɛhi siyopɔi a puan la.

¹⁰ Ti pɔka wa yehe ta yele sɛba n daa lagum bɔna la Yezu. Bala ma'a la ti bamam nan kele mɛ gee fabela.

¹¹ Gee ban ta wum ti Yezu vo'e ya ti pɔka la nyɛ en la, ba kelum ka sakɛ.

Yezu niiɛ amɛŋa pa'alɛ a zahereba bayi'

¹² Ŋwana pooren ti a le niiɛ a mɛŋa sadɔɔ kuyima le pa'alɛ a zahereba bayi' ti ba boi la sore zuo yɛ'ɛha timpaberɛ la kinkɛleŋa ha.

¹³ Ti ba lebe ta yele ba taaba la, gee ba ka sakɛ bo' ba.

Yezu niiɛ a mɛŋa pa'alɛ a zahereba pia la ayima gee tum ba

¹⁴ Pooren ti a zahereba pia la ayima la ta naaɛ taaba ti ba di. Ti Yezu niiɛ amɛŋa pa'alɛ ba gee nyaa nyɔna ba la ban n ka tari sakerɛ la ba tubegirega la doohe la ban ka sakɛ bo' sɛba n nyɛ ti eŋa vo'e ya gee yele ba la.

¹⁵ Ti a yele ba yeti, “Kiŋɛ ya timpaberɛ wa zi'an woo ta muulɛ yelesuma wa bo' nɛra woo.

¹⁶ Se'em woo n sakɛ bo' yelehum la gee sɔ ko'om n wan nyɛ faarɛ, gee se'em woo me n ka sakɛ wan nyɛ sageŋɔ.

¹⁷ Daalehum buna wan dɔla sɛba n sakɛ la, ba wan dikɛ mam yu'urɛ sa'ahɛ Kulekpa'bɛ'ɛhi, ba wan tɔgɛ zɛlempaala.

¹⁸ Ba wan nyɔkɛ bunsɛlenduma la ba nu'uhi, gee ba han pun nyu la yabega se'ere kan iŋɛ ba, ba wan dikɛ ba nu'uhi pagelɛ bã'duma zuto ti ba nyɛ ba tibega.”

Yezu zom saazuo

¹⁹ Bala Daana Yezu n tɔgɛ bo' ba ba'ahɛ la, a zom la saazuo, ta zi'ire Yinɛ zuɔ nu'o.

²⁰ Ti a zahereba la me yiregɛ zi'an woo ta muulɛ yelesuma la bo' nɛra woo, ti Daana la me tum nyalema la kirehi, ti la dɛna daalehum bo' yelehum la.]